Ngihige Padadi Hagga ¹ Dani wu ata Farisi ka ngaranai Nikodemus. nyi wuyi ata pa ama ata Yahudi. ² Diha wu gadi, nyi namai tabarai Yesus mon linage, "Rabi, nami matadawe inna yau ba Guruwu ka amna wali tai Allah oro wale lakma wu ak ata kadadi rayidi tada ha rayomu yau, dukai Allah kadayo ole dangagu." ³ Na balehawe Yesus tabrana, "Katu takka nage Nauwa luguge tabaramu, nada wu ata ai hadadi haggani, nyi wale nadadik mawe etawe Kalingora parehai Allah." ⁴ NIkodemus na kanukayi, "Aga linak kawe wu ata bana dadi hagga wali kole nyi bana katu bena? Dadik haggal kakwe nyi bana tama hagga ta tiyo inyana?" ⁵ Balehawe Yesus tabarana, "Tau takka nage, Nauwa luguge tabaramu, nyi wu ata ai hadadi hagani wali ta we mono waddi, nyi wale na dadik mawe tama lari ta kalingora nai Allah. ⁶ Agawe hadadi wali ta nayo egage kanawe, mono agawe ha dadi wal ta Waddi engage wali ta Waddi . ⁷ Ilam hangatara dangage oro nauwa baluguge tabaramu, ' Mi hadadi hagga hogimi. ' ⁸ Nada rereha goyaka ba giyo nyi dau auna kako mono mi um rangeyi punyina, tabolo mi walem tadak mawe giyo dawu walina mono giyo dawu kakona. Tauda dumo nage wu ata ha dadi wali ta Waddi." ⁹ Nikodemu na kanukkawe, "Agalinak kawe tangage inna bana dadiwe?" ¹⁰ Yesus nabalehawe, "Inna yau wale guru ata Israel kaduwu, tabolo yau walemu yapak mawe tangage inna? ¹¹ Doku dage, Nauwa luguge tabaramu inna nami naha newe tutu aga nami hatadama mono paha dela kama tutu agawe nami ha etama, tabolo mi walem hibak mawe paha delakama nami. ¹² Inna Nauwa bagu tak gimige tutu hege panu tana mi wale mu hatenak mawe, aga linak kawe mi bamu hatenawe Nauwa bagu takkiwe tutu hada Surgawi? ¹³ Wale wu hing mana ata ka pane ta Surga, ai Nyika kaburube wali ta Surga, haluguna Anana Kadadi Ata. ¹⁴ Kataunai Musa bana hapaneni kaboko amaha bahi taburaka ta marada gilra, tauda dumo nage Anana kadadi ata paha madehta hoyi, ¹⁵ dajalage tangana ata kaha tena tabaraNa kolege morha aika duka kana. ¹⁶ Oroi Allah hada manawara nage panu tana inne, Nyi nayiyi AnaNa ka naha dajalage tangana ata kaha tena tabaraNa walena lilokokma, tabolo kolege morha Aika dukana. ¹⁷ Oroi Allah naha lewayi anaNa lari ta panu tana wale mai hokok manage panu tana, tabolo dajalage panu tana kapa hoilawe ledini AnaNa. ¹⁸ Ata kaha tena tabaraNa wale hokuk madi, tabolo ata ai kaha tena dabedi takabu hokuna oro nyi aida hatena ta ngara ana nahaNa Allah. ¹⁹ Nyikwe hokuna inna: Magaha amibege ta panu tana, tabolo kadadi ata rehine baidahoge kapagtana wali tama gakaha oro agawe yida harayida japatawe. ²⁰ Oro tangana ata karayina japata na butge ate magakaha mono wada mai jalakma ta magakaha inna dajalage tangadi harayi wale hilu keke tayi. ²¹ Ta nyiduwe, ata karayige katena na mai tama gakaha inna daja lage kaha dedoge haryina inna karayige lar tai Allah." Yohanes Hadelakage Tutu Yesus ²² Bewe inna, Yesus mono ana hakodoNa kako ta tana Yudea. Neda bali, Nyi na bewe mahigona oledi yida mono harihayi. ²³ Yohanes dumo naha rihai ata ta Ainon kadeha kawe Salim oro butawe we nedaa bali. Tangada ata amidi mono hari hayi. ²⁴ Mahigi inna, Yohanes wale hatamak mahoni ta gallu. ²⁵ Mono, nadadiwe pasepa sala pahangadana tajongada ana hakodona Yohanes mono wu ata Yahudi tuba hamurahana. ²⁶ Yida databokayi Yohanes mono lidage, "Guru, ata ka olegu tabali lai we Yordan, loho tubana Nyi yau um padelaka bege, etewege, Nyi dumo naha rihayi mono tangana ata kamai tabaraNa." ²⁷ Yohanes na bale hawe, "Kadadi ata wale nadadik mawe hiba aga hingkai, likege hada inna ba yinage tabarana wali ta surga. ²⁸ Mi dau inna dadiwe bamu yiyo padelaka inna nauwa kalli lugu bege, 'Nauwa wale Mesias mawa,' tabolo nauwa paha lewawa tutu uluni Nyi. ²⁹ Ata kada ana lawaina kaha umana duka dahege kabani kaha umana; tabolo ole atena kabani kaha umana, kadede m0no karangeyi, tillu lagaharayi ban rangeyi kabani kaha umana. Yiwe, lagaharagu inne bannu nagege. ³⁰ Nyi narehi madakaho mono nauwa kiki maraha guge." ³¹ "Nyi ka amina wali dete yikna kadauwu dete tangage, Nyi kawali tapanu tana yikna kawali ta tana mono dulkawe tutu hada kadana tapanu tana. Nyi ka mai wali ta surga yikna tapanudi tangage. ³² Nyi na yiwe hadelaka tut agawe ha eta mono ha rangeNa, tabolo ata walena hibak mawe padelakaNa. ³³ Ata kahibawe padelakaNa mangakuge katau takkana nadai Allah ba nyi katena. ³⁴ Oro, ata paha lewai Allah enga ha dikki dage hatakki Allah oro Allah nayiyi WadiNa ai kaha dukka. ³⁵ Ama nama manawarani Anana momno nayinage tangage lari talimaNa. ³⁶ Ata kaha tena tabara Ana kadawuge morha ai kadukkana, tabolo ata ai kadokuni Ana enga wale na etak mawe morha, tabolo butu atei Allahengage tabarana."