Yesus Na Baha Dadi Ledu Ana Hakodona ¹ Ai diki hoge lado madaka Paskah, Yesus na tadawe ba diki nage rahiNa ina Nyi panu tana ini ta Amana, kole bana nawaradi ha dau dauNa ta panu tana, Nyi namanawaradi yida kaha dukage. ² Ba enga hoge ya gadi, kabalka na tama ta atenai Yudas Iskariot, anai Simon, kama lajani Yesus. ³ Yesus, kole bana tadawe Ama bana yi kaha benage tangage ta limaNa, mono ina Nyi mai wali tai Allah, mono enga hagga nai tai Allah, ⁴ Nyi na dede wali ta ya gaddi mono na laige kalabe madakanNa, loho na ngala kaba linen mono na katge ta baggeNa. ⁵ Bege, Nyi nabiwe weyo ta wu baskom mono kapunage baha dadi Ledu ana hakodoNa loho nahopi dadi leduda yida waidi kaba ha katna ta bageNa. ⁶ Loho, Nyi nadiki tai Simon Petrus mono nyi linage tabarai Yesus, "Mori, Yau um bahagadi ledugu?" ⁷ Yesus na balehawe mono linage tabarana, "Agawe harayiGu, mi walem yappak mawe batauge, tabolo nimila mi um yapawe." ⁸ Petrus linage, "Yau walem kal bahak magadi ledugu!" Yesus Baleha, "Nyi Nauwa aigu bahami, mi walem kolek mana daumi lar ta Nauwa." ⁹ Simon Petrus linage tabraNa, "Nyi bataudage Mori, ila ledu kel kagu, tabolo limagu mono katakku jalagu!" ¹⁰ Yesus linage tabarana, "Ata kaha rihabe duka dahege bana bahayi leduna, tabolo na muraraha tangage ngihina. Miyo um muraha bemi, tabolo tangami wali ta miyo walem murahak mahomi." ¹¹ Oro Yesus tadawe ba iyayi kama lajani Nyi, nyidawe oroge Nyi malinage, "tangami walem murahak mahomi." ¹² Nyiwe, kole ban be Yesus bahadi leduda ana hakodoNa, tau haga nage kalabe madakaNa, mono haga taha DauNa, Nyi linage tabarada yida, "Apa mi um yappakwe agawe inna harayiGu tabarami? ¹³ Miyo um takwa Nauwa Guru mono dumo Mori. Inna um wingige oro Nauwa Guru takkawa mono Mori. ¹⁴ Nyi Nauwa, ba Mori miga mono Guru miga, ug baha bemidi ledumi, mi dumo um ha baha ledu wik hona. ¹⁵ Oro, Nauwa ug yibegimi tuja tabarami dajalage mi dumo rayige tujana Nauwa harayiGu tabarami. ¹⁶ Waige katau takana, Nauwa uga takki gimige tabarami, wu ata halewa walwna rehi madakkakma wali ta marabbana, wale dumo wu ata paha lewa walena rehi madakkakma wali kaha lewayi. ¹⁷ Nyi mi bamu tadakwe tangage inna, miyo um maringina bamu rayi duge. ¹⁸ Nauwa walegu hanewek mawa tutum mi tangami. Nauwag tadawe iya hing kayi ha pedeGu, tabolo Nats nade nabanu hoge, 'Ata kaya gani rotiGu na keke tabeyi kamikna tabaraGu. ' ¹⁹ Nauwag ug tak gimige batauge, aina dadi hoyi hada rada bana nyi dadi kayi, mi enga hatenami inna Nauwakna Nyi. ²⁰ Waige kaha tetakkana, Nauwa luguge tabarami, tangana ata kahibayi ata paha lewaGu, hibba naga Nauwa; mono ata kahibawa nauwa, hiba nani Nyi kaha lewawa Nauwa." Yesus Na Takkiwe Iyayi Kamalajani Nyi ²¹ Be halina Yesus kataudana, Nyi naha ojayi ta waddi mono natakkiwe, "Tau takka-takka nage Nauwa ug tak gimige tabrami, wu wali tajongami dani kamalajaga Nauwa." ²² Ana hakodona daha torro-torro wikda mono nagibo kayi katakkuda ba iyayi Nyi hatakna. ²³ Wu ata ana hakodoNa na ngodo hadde ta kurnai Yesus. Nyikna ana hakodona hada manawaraNa Yesus. ²⁴ Bege, Simon Petrus na yiyo tadka tabrana kapiku kanuka nani Yesus tutu iyayi hatakkNa. ²⁵ Nyiwe, ana hakodona ka hadde takurrnai Yesus nada naka nukayi TabaraNa."Mori, iyayi ata nada? ²⁶ Yesus nabalehawe, "Ata nada yikna nyi tabarana Nauwa hayigu kadipka roti inna, Yesus nayiwe tabarai Yudas, ananai Simon Iskariot. ²⁷ Mono, kolei Yudas hibawe kadipka roti inna, Kabalka tama nani. Oroge inna, Yesus linage tabarana, "Agawe harayimu, geha rayige!" ²⁸ Walak hing mana wali tayida katamrana yayo yapawe ahaYesus malina dage tabarai Yudas. ²⁹ Kapirrana wali ta yida da yapa dawe oroi yudasu kanarroni patti hadau amaha dajalage Yesus malina dage tabrana, "hiwula hawai hoda yitta ta lado madaka, "waleka dajalage kapiku yina ba agana tabara ata milla. ³⁰ Nyiwe, kole bana hibawe kadibka roti, Yudas kako nage ta bali hadu neda mema; mono neda mema dumo na gak bege. Yesus Naha Newege Tutu Matena ³¹ Ba kolei Yudas kako, Yesus linage, "Batauge rahi nage Anana kadi ata baha manadai mono Allah bah manadai ledeni Nyi. ³² Nyi Allah baha manadai lar ta Nyi, Allah dumo enga ha manadai ta Nyi lar ta tauNa, mono enga geha hama naadai Nyi. ³³ Bagu Ana gimi, Nauwa hak mowe bagu ole gimi la. Mi um mayegaga Nauwa, mono tujawe hatak begu tabrada ata Yahudi, batauge ug tak gimige tabrami, 'Ba giyo Nauwa dau kakogu, mi walena dadik mawe bamu mai. ' ³⁴ Wuwe Pareha beru Nauwa ug yibemige tabarami, haluguna dajalage mi kam hama nawara wikimi, katujana Nauwa bagu manwara gimi, tau dahomi mi bamu manawara wikimi. ³⁵ Waige bataudami, tangana ata enga tada nagimi miyo ana hakodo Gimi, halugna mi bamu hama nawara wikikna.' Ha Ape Yesus Tabrai Petrus ³⁶ Simon Petrus naka nuka tabarai Yesus,"Mori,gi Yau dau kakomu?" Yesus na Balehayi nyi, "Ba gi dau kakoGu, mi walena dadik mawe bamu dokuga Nauwa batauge, tabolo nimila mi enga doku miga Nauwa." ³⁷ Petrus naka nukka tabaraNa, "Mori, aha nauwa walena dadik mawe dokuga Nauwa batauge? Nauwa enga yiguge ngahugu tubamu Yau!" ³⁸ Yesus na baleha, "Yau enga yimuge ngahumu tubaGu? Waige katau takkana Nauwa ug tak gimige tabarami, manu waleda kukukma aim ha dal wuda hoga kabalga Nauwa."