¹ Ta ata-ata pote, um rangngewela! Um ho monno kalalliwu tutge mayilla nimmi kama birraka tabaramu. ² Hapotemu kole na bauwuyi lohho kalabbemu na yabedi wana. ³ Mah rara monno mah kakamu na tai rara beyi, monno katirara inno wudawe tadka kahama ngejinguwu lohho ka yaguge kanamu kataudana latti. Miyo ojobenna hapote ta lado-lado pahha dukka wai. ⁴ Rangngelah, kahewada radde ata kaullagugge omamu, miyo hapattimmu waige matippu, kawula gabbagu. Monno, kawulada radde kahha deteyi na dikke beyi takka tillu nai Mori hagala loda. ⁵ Miyo um morha bemmi ta tana larta kamma jabola monno dita koko dauwuna, miyo um ha muglabegge atemu neddo ta lado ba ropo ranga. ⁶ Miyo um hokubenna monno hamatemi ata hatena, monno nyiyo walle nagabba maggu. Taggoranna Neddo Tammayilla ⁷ Oronage innoge, olebai-olebaigu, maloyamla kahha dikkinni Lado Baamminni Mori. Torrodai baagalinna nadde petani banna remadi wudi kahadda dahha walita ngihi tana, narema waige maloya kahha baamminni na kawunga urra monno hanghuwai urra. ⁸ Miyo wi'kna maloya daho, hakulhagge atemu oronage rahi ammini Mori daggetanagge. ⁹ Olebai-olebaigu, illa ngurru-ngurrukam dihha monno dihha tannam miyo kailla hokugimmi. Etayila, Katagu Keju nadedebe ta aro bau binna. ¹⁰ Olebai-olebaigu, kadadi tujjaneddo tama yilla monno maloya, etayila radde nabi kahanewe ta ngarai Mori. ¹¹ Nami lagahara dagge limmadagge radde yidda kataggoranna. Miyo um rangebewe taggoranna Ayub monno um etawe ba agalinnawe hakabbu atenai Mori neddo murge, nai Mori banna bannuna milla ate manawara monno dahha ate. Illam Hauraka ¹² Tabollo nyige, olebai-olebaigu, ta pannu tangngage inno, illam haurakka miyo langba tutu aga langkawe. Takwe "Ngo" nyi ngoka monno "Wallema" nyi bawalleka tannam miyo kaillam monu neddo ta hoku. Kuahage Sembayang Monno Hatena ¹³ Nedo tajongami miyo da katangranna mayilla? Nyiyo na sembayang dahonna. Mo da katangranna ege ate? Nyiyo namma nyanyi dahonna lawitti. ¹⁴ Neddo ta jongam miyo da katangranna kalawara? Nyiyo nakka maika dahhonna bai ata-bai ata jemaat monno yidda da sembayang dahonni monno da ora dahonni waina welengha ta ngara Mori. ¹⁵ Sembayang pahha dikki waige hatena nahha tolkayi nadde ata kalawara monno Mori nahha kaddeyi nyiyo. Monno, inno nyiyo banna rayikanna doku-jala, nyiyo ha walibenni. ¹⁶ Oronage, inno miyo um hama ngaku wikdahodi jalami monno um hasembayang wikdahonna tannam miyo kam taggaha. Sembayang ata katena bahha dikki kagge waige katau takka-takkana, namma dakka kuahage. ¹⁷ Elia nyi ata katauda allananni yitta. Nyiyo na sembayangna waige katau takka-takkana tannam kaillana burru urra, monno urra walle naburruma neddo ta loda mojage tauda dawu anni wulla. ¹⁸ Dajjalage, nyiyo na sembayang walna, nyiwe inne langta manna haburna urra monno tana na gtummuge wuna. Tullunni Ata Katabali Tabara Allah ¹⁹ Olebai-olebagu, baragga nyi daka ta jongammi miyo kahekora walta takka tena, lodoge da ata katullunni na ata tabali, ²⁰ madamgela na ata kamma rangnga haggan na ata kajala hagga nedda ta laraa katena monno pahoila nanni urra na ata walta mate monno katoni jala buta.