¹ Ta gida hadauwu walige inne hatau monno kahagabbana kadaddi ta jongam miyo? Walle kawalkawe inne takka ma'k atemu kahha tauna neddo larita taumu? ² Miyo um kama'kge inne dihha wuyo, nyidawe miyo mam hamatem ata. Miyo dage kawi ta ate monno walle na dadimawe ba kolege, nyi nyidawe miyo mam hatuna monno hagabanna. Miyo wallem kolemanna oronage miyo ayim karaidamo. ³ Walleka, miyo karaiyi, tabollo wallem kolemanna oronage miyo karaiwe um hakappewe waige kajala, inne tutge habaige kama'k atemu. ⁴ Ta, miyo katagdagge kama'kna, wallem tada miyo bam ole atekagge inne pannu tana ba nyiwe hamuhhu waiyiyi'i Allah? Oronage, iyai ka kabaige ole atege inne pannu tana, nyiyo naha daddige tauna muhhuyi Allah. ⁵ Agalinna dawe inne miyo hangadam Jurrata Bihha banna hanewe walle mangkappege, "Ngahu pahadaunai Allah ta tauda yitta nakabbu ateni waini kawi? ⁶ Tanyiduwe, Allah nayibe kammaringna karehi piwalli. Oronage inno, Jurrata Bihha nahanewe, "Allah nagabbaddi ata kawutogo, tabollo nayidi kamaringnguna tabarada radde ata ka libawa atena.” ⁷ Oronage, pahaddegela tauwumu tabarai Allah. Gabbani kabalka, tannam nyiyo kanna malai walta tabaramu. ⁸ Dahhekaula tabarai Allah monno Nyiyo kanna dahheka tabaramu. Hamurrahaddi limmamu, ta ata-ata kajala, ta ata-ata kahanga atena. ⁹ Ate kammaninni, milla ate, marabbeha ate; inne malhammu kanna jeludawe marabbeha ate monno ege atemu kanna jeludawe ba'k. ¹⁰ Halibawage atemu ta aro Mori, nyiwe Nyiyo kanna hamdehtawu. Illam Mapaddawu Monno Illam Tagu Kejukayi Ole Atamu ¹¹ Olebai-olebai, illam takkawe inne kajapata ta jongamu. Na ata banna takkawe kajapata tutna olebaina, lohho tagu kejuyi olebaina, hanewe gabbage ukpareha monno natagu kejuwe ukpareha. Nyi inne miyo bam tagu kejukawe ukpareha, miyo wallekarayi da'kmanagimmi ukpareha, tabollo tagu keju damige ukpareha. ¹² Wu daheyi Kayiwe Ukpareha monno Katagu Keju, nyi'kna Nyiyo ka angta patolkanna monno halilokona; tabollo iyadakammi miyo mam tagu kejuyi olem ata? Hab|Kabbu Ate Allah Tatil Tangngage Hakabbu Ate Kadadi Ata ¹³ Nabatauge, rangngemla ta miyo inne kahanewe, "Nehhe lado monno koka nami enga kako homa ta harona inne monno inno, engana bali mojage dihhd dawu, malajana, monno kolena utu," ¹⁴ mo miyo wallem tada mawe agawe kadadi koka. Agaka gauge inne morhammu? Inne morhamu natuja habungu kahudda tuddu, monno dajjalage nabungngawe. ¹⁵ Dokdakagge, linna dahowe miyo bamhanewe, "Nyi Mori banna kabbu atege, nami engama morha monno engama rayige inne lohho inno.” ¹⁶ Tabollo nabatauge, miyo um kabobidammi neddo tawutogomi; kabobi kataudanna hadana kajapatawe. ¹⁷ Nyidawe, nadde wu ata banna tadawe agalinnawe banna rayina kadahha, tabollo walle narayimagge, nyiyo na jala.