1 Israel yidakna pu anggur kama dehta be,kawube. Kiki bana buatyi wuna,kiki buta na ge nyi bana rayina hadau maraka. Kiki dahhawe tanage,kiki dahha nage nyi bana rayina watu ha dede hala hatau. 2 Ateda yidda naha bawege.Batauge, yidda da tagu dahodi jalada.Mori enga ha muk kanadi hadau marakada mono naha ta bohtadi watu hadededa hala ha tauda yidda. HAPOHTA KAJAPATA ATA ISRAEL 3 Oro, batauge yidda enga liddage, " Yitta lakma rajada ge oro yitta aida madautani Mori. Agawe harayina raja tubada yitta ?" 4 Yidda da rayina jaji palleka,haura kobo,katna jaji dajalage kana tummu kaddi tujawe pu Upas ta huppu oma. 5 Ata Samaria enga madautada oro ana hapi Bet-Awen. Tau takka nage,ana huhuna enga kalalluda orona,tangada rato enga hoda orona,oro manadana na yela bedi. 6 Ana hapi rada enga ngidiyi ta Asyur ba maraka ta Raja Langna; Efraim enga da kolena makke,Israel enga dadi makke oro pahha inyakada. 7 Raja Samaria enga ha li lokodi tujayi karaga yayu kata lede ta weyo. 8 Lete majobera Awen,jala Israel,enga ha li lokodi.Tara warri enga tummudi ta hadau maraka da. Yidda enga lidage ta letena, " Hatoda gama namai!" mono tabra letena," Ta bohtawu tabarama nami!" ISRAEL ENGA TAGU DAGE JALADA 9 " Wali ta lado Gibea,yau um rayi bena jala,ta Israel.Ta nedala,yidda kadde gabani.Wale hatau kakna gabadi ata ai lurha,enga diki da ta Gibea? 10 Nauwa na dadiwe bagu paluyi yidda, kabihu ata kama kahha gabadi yitta,yidda enga raddidi oro dudadi jalada yidda. 11 Efraim tujai ana hapi paha nuabe, kabaina dekedi tangadi. Nauwa manawaradi kahokida ka dahhaki,Nauwa ug tauyi Efraim,Yehuda da karekata dahho,Yakub enga wirta nage tana dauna. 12 Habarage ka tena, mangattila dokuge manawara.Bugerage tana beru tubamu,oro ba rahi nage bama yegani Mori,kahha Nyi bana mai,hanuagu yau waige katena. 13 Yau ka rekata bewu kajapata,um magatti bewu aika lurha,um yabeni wuyo paleka. Oro bataudage inna, yau ha gora bewe taumu ta keretamu,mono ata hataumu kabutala. 14 Ha inyawuge oro karingaka hatau kadadi ta jonga atamu,tangadi gallu hatau enga ha mukkadi.naha mera dawe ba hamukkage Bet-Arbel ta laddo hatauyo, pa inya oledi anana enga hamukkadi. 15 Enga tauda dagela tabaramu,ta Israel,oro hada butayi japatamu. Kole mata laddo hudda,Raja Israel enga pungadi kahha dukadi."