Liha Nuwa Tutuda Ata Kahha Tena ¹ Hangatta kige karawawe manawara kahha olebaina. ² Namu hakita kige tutge bamu hajolani limmamu taka takda tabarada ata kali pallakka kamu waige rayige inne hada, kapirra ata da dikki beddi malaikat lokko mera aima dammu dagge. ³ Namu kiyi ata katta galluna kanna hamera dauwe miyo bata gallumi oledi yida, ape jallakiyi ata pahamma yillada oronage miyo dagim lar ta tauda. ⁴ Hawuna engadahogge ta'kduge lokko banna bannuge bam hiwe tangam ata, monno karawa kiwe piyahaumamu dajalagge kaenga kigge banna murrahawe, oronage Allah enga hoku nanni ata kahamma rihkawe monno yida kahha loyo wikna. ⁵ Hamma rauge taumu wal ta baina ammaha, monno hatutkige taumu wal ta kadana tabarammu oronage Nyi nahhanewe, "Nauwa walle na enga'kmagge bagu tanna gimmi, monno walle nadadi mauwe bagu hiklagimmi." Ulangan 31:6. ⁶ Nyidawe, yitta liddage badda hanewe waige hatena kabannuna: "Morigu Nyi katulga, monno nauwa monno nauwa walleg madauta'kmauwa. Agawe inne harayi dagga ata ta baraggu." Mazmur 118:7. ⁷ Namu kiyi didda ka kodogimmi, yidda kahha nu'uwa beggimmi linai Mori tabarammu. Hamatra kiddi ngihhidi walta hada morhada yidda monno ohkidagge hada hatena yidda. ⁸ Yesus Kristus engage hamera, mananna, laddo nehhe, monno kahha walimurri-walimurri. ⁹ Illa daka miyo kahha jallorammi waige hanuwa kabutala mnno aiha tadam miyo; oro hada kadahha lohho ateda nakulhawe oro kanyurru, walle ukku tuba haya'kma daddi yidda aika manggauna tabarada yidda kahha hakakowe. ¹⁰ Dage nataradda yitta kawali ta ata kahha madi kareka murrahha walle da duda maggwe tutu yayo. ¹¹ Monno, oro tauda walid ta ranga lohho rana hangiddida Rato Madakka ta koro kahadda tengna kamanuta hawalina jala hatuyi tabali kareka, ¹² Nyidawe, Yesus dummo mayilla tabali binna kalla harona tuba hatenguyi ana huhu-Na waige ra dau-Na. ¹³ Oro bataudage maida yitta kadda tabbokayi Yesus tabali hadauwu kareka, monno kadda ditdwe hamelo kahha mera waige hamelo haditabenn-Na. ¹⁴ Oronage inne, inne tapannu tana walle la'kma haronada yitta ka engana dana kahha ana murru, tabollo yitta tangrage remage harona ka amna. ¹⁵ Oroge inne, ledeni'i Kristus yitta ka engada badda manuta maraka mahadi tabarai Allah, kada hanewe ta ro wida ahha manada nagge ngara-Na. ¹⁶ Illam dangngage rayige kadahha monno bawewe agayi kadana tabarammi maraka kataudanna inne nadahha dangngage ate nai Allah. ¹⁷ Doku kiddi tabarada ka kodo gimmi monno kangakka tabarada yidda oro yida'kna karawa middi urrami monno ka yiho tagu baleha. Nyi bataudage yidda darayige waige ege ate, walle dawaimagge kangurka oro inne hadami walle da yi ma'kmigge ha utu danga. ¹⁸ Umsembayang jalla kigamma dimma la oronagge nami mahatenawe dage ate murrahamma kadahha kaengage haruwe rayige tangngage hada waige hada kamanghina. ¹⁹ Nauwa ug harehammi tutge sembayangna waige kahha tetakkana dajjalagge nauwa kaggu gehawa hagga tabarami. ²⁰ Batauge, Allah pu moli kamma ringuna, kahha kadde haggayi Yesus, Mori da yitta, Paama Majawa Kalangna ta ana bebbe-Na waige ra jaji aikahaduka. ²¹ Kaengage aina hadamomi larta ta tangngage hada kadahha tutge barayige tangngage ha kabbu ate-Na. Monno pahain Nyi kanna rayi ulla ta tauda yitta tutge hadahha wage ate-Na ledeni Kristus Yesus, monno tabaranagge manadan-Na kahha walmur-walmuri. Amin. ²² Ole baigu, nauwa ug harumi miyo tutge bamu range hanewe hanuawagu waige maoloya oro hatakki bagu hanuagimmiinne hatolhaggu kadubhakiwe tabarammi. ²³ Nauwa ug baige takkimigge bakkahha ole baiyi'k nadda yitta, Timotius, dahha hubenni walta gallu. Monno nyi ambenni tabaragu, yida, nauwa enga marangnga gunni maidikkige rahi tabbokam miyo. ²⁴ Hadikka dagge maringna nami ta barada ka kodogimmi monno tabarada tangngada ata katengna, olebaida yitta, walta Italia hadikkige maringna tabarammi. ²⁵ Kanyurru kawaltai Allah na irru kam miyo tangngammi.