¹ Hakab ategu, ana dauna kadau takage balakawai, nyila merana nade atana malohho nyikadau kaha gew. ² Nyidadahoni takabu kaharehana katoroyi mona kaulla na taumma dikini lado hangenga beda amana. ³ Katauda jalana naage dida, balakawa hoda, hita da'a ata hoda wadi panu tana. ⁴ Ma'belage, diknage nehe rahina lado, Allah nahalewai ana-Na, kadadi wali talawayi, monno nadadina takabu Hukum Taurat, ⁵ tannam kakahkai yida kadana takabu harehana hukum taurat tannam bada bibbawe makeketa banna anada. ⁶ Oronage mikna anana Allah nahalewai wad biha ana-Na ta ateda kamaikani "Allah ama". ⁷ Mige walle hil ata da magimi, tabollo ana danagim. Nyiyuyo balakawau, Allah naha dadi gim miyo kaduge ledeni Kristus. ⁸ Nuthona, aim tadahoi Allah, miyo na ata gimi nama yega-yegage begge wallei Allah kelmoi. ⁹ Nyi batauge, be bam tada dalli Allah, nyi narehi tada dahoi Allah, ahakkamam haga dawalim dokoni wad pan tana kaloja monno ai kamanu gauna? Him aw ada'hom bakda atal gimmi? ¹⁰ Yauwu rayi da hoge hakako dahowe dihalado-dihalado, dida wulla, rahi-rahge, monno dau-dawu! ¹¹ Nawa'gu madautawa bara-Ga joligu n'ne ha rayigu tuttummu baraga ai laka gawuge. ¹² Naw'wa ka'raiwe tabara-Mu, olebay-olebay, da'diwe kataudana nawwa oronage duggu bagu tuja allawe ka tauda dummu. ¹³ Miyo wallem jalamma tabaragu. Mim tadawe, ka ulge nawa gutalaragimige kadaha tabaramu oronage pakha ngihi hapada begu. ¹⁴ Lang batalka tuba taugu taugu wu'u dawe ma kaba tabaram, yawu walem paddamawu monno walem hibbamawa. Nyiba tauda dahoge, nawwa him mai taboka bam hamerega malaikat Allah, ka taudana meraknage nawa ba Yesus Kristus dauwuyi. ¹⁵ Agalinnai ratu kanyuru hapadda bemu nehe batauge? Malohho, nawwa dawe baggu takkiwe tutge mi ka ull, bana dadi hewe, kahakkaguni matamu monno yigani tabaraggu, um'auwum. ¹⁶ Nyi ba tauge um'muh dawalga oronage baha tingoguge kadahha tabarammu? ¹⁷ Rat ata na roti dahowe kana kolege, tabollo hatikkida walena dahhamwe. Yidda waleda pelu'kmani monno hamanneg nawwa u'gmayega dahodi yidda. ¹⁸ Nadahhawe bada lagahara bada rayige tutge aroge dahha, monno walle  nyikelmawe bag olegimi. ¹⁹ Bag anagimmi, oromi, dadi dahingwe bag taguge kalawara ha ana kahha dikkini Kristus kaha dedala tabaramu. ²⁰ Nawwag manneg, nawwa dadiwe bag oelgimmi batauge monno u'm wungngage li'gu oronage nawwa beyi hangadagu orom miyo. (Hagar dan Sara sebagai Contoh) ²¹ Tak gage tabaragu, taa.. yauwu kabaige morha ta kabu Hukum Taurat, miyo wallem rangnge memakmawe Hukum Taurat? ²² Oronage badage hatolha, Abraham dudadi ana kabani na; nade wuyo na dadi walta atana lawaiyo, monno nade wuyo walta lawaina kahoila. ²³ Nyiba taudage, ana walta ata lawaina naha anani walta kana dauwuna, nyidawe ana walta lawai kahoila naliwe jajikira. ²⁴ Hamatara dage agawe dadi kataudana tajka oronage rade duda lawayi datajkai rade duda jajkira nade wuyo jajikira walta lete sinaina monno naha anadi rade lakawa atanai Hagar. ²⁵ Nyikna nadei Hagar batauge, Hagar tajka lete Sinai ta Tanah Arab, marada ta Yerusalem batayge nehe oronage nyikna morha larrita ata-atana na oled anana. ²⁶ Mabegge, Yerusalem ata lawai kahoila, nyiho inyada yidda. ²⁷ Oronage badage hatolha: "magahara, ta lawai woto aikaha ana memada" nawula monno na ege ate, taa yauge aika tada hingge ha ana. Bak'bak, rehi buta dahoiyi anana nade lawai nameha monno kabakdana laiyina." Yesaya 54:1 ²⁸ Olebai-olebai, yauwu kana anana jajikira kataudanai Ishak. ²⁹ Banuthona, lakawa kadadi walta kanadauna nahamma yillaiyi lakawa dadi walta wad, kataudana kadadi mema inne. ³⁰ Mabegge, agai hatakna lina Morida? "wuggai atana lawai nat monno ana na oronage ana ata na lawai nattu wallena bana ole umma oledi monno ana lawai hoila, waldahoge talawai dauna hoila. ³¹ Oronage, bag olebai-olebai gimmi, yitta wale lakawa-lakawakmada kawalta atana lawai, tabollo walta lawai hoilada.