¹ Olebai-olebai, mi dauyo tadawe tubage hadikma nami tabarami wale na lilokokmawe. ² Langka nami bama mayila ai dikhoge, katauna hatadami, hamayila mono pada ta Filipi, nami madauge madona lari tai Allah tanage batalarage Li ege ate Allah tabaramu tatilu butadi kama gaba. ³ Oro, paha apema nami wakna walik mawe taka inora aika muraha, ai waleka kapaleka, ⁴ tabolo kataudana nami hangonai Allah tanamu kaha tena dage Li ege ate, tauda dage namla bama hanewe, wale kana daha waina ata, tabolo kana baige Allah kakiraha mage atema nami. ⁵ Nami walema kalmaikma waina hanewe-hanewe kama raino, katauna naha tadami, waleka waina wini oro magamha Allah nyikma hakahami nami. ⁶ Nami jala walema mayegak mana madaika wali ta ata, langka wali tamiyo waleka ta ata heka, langka tauna ledu-limana Kristus kami dadiwe kirahawe tabaramu. ⁷ Kabalige, nami waige hada mawu maloya tajongami, katauna wuhainya kaha madi mono kaka rawayi ana-ana dauna. ⁸ Nyida, lari tama nawara aika anana ta baramu, nami makabatege yiwe tabaramu wale nyi kelmawe Li ege ate Allah, tabologe morha da momo nami oroge midauyo bada kiduge manawarama. ⁹ Oroge, miyo namu, olebai-olebai, maromatage mono ula biktama nami, aga nadawe ulana lado mono gadi tanamu nami ilama hama yilami tajongage nami bama talarage Li ege ate Allah tabaramu. ¹⁰ Miknala, kaeta-tadawe, loho dumo Allah, pira tauge murahana, tenana mono aikama pada nami bama morha tajongami kahatena. ¹¹ Kataunami patadami, nami panuwagimi, agu ate halewami diha-diha katauna wu haama tabarada ana-ana dauna, ¹² tanam miyo morha doguge hakat atena Allah, kamai kagumi na lar talingora manadana nyiyo. ¹³ Nam jala enage manuta tabara Allah tutge kadadine, tutna bam hibawe linai Allah, naha rangemi waltanami, miyo hibawe wale kataudakmana hanewe kadak ata, katauda dana naka tau takana, naha newenai Allah, katangrana rayi ula tajongami ata-ata hatena. ¹⁴ Olebai-olebai, miyo dak bemi ata-ata kadok bege kalingora-kalingora Allah lar tai Yesus Kristus kadana tai Yudea oroge mi jala pada bege kama yila kaha mera, kawali ta jonga ata ole kabihu daumu, katauna palidada walta ata-ata Yahudi ¹⁵ kabada hamateyi Mori Yesus loho jala bai kato, loho wugama nami. Yida walda maromatakmani Allah loho muhumi tangana ata. ¹⁶ Yida datonma nami kama hanewe tabarada ata-ata aika Yahudi tanam yida kaha tolkayi. Tauda dage yida hakitage panwe dokda, tabolo but ate na burbewe tabarada yida kabanana. Hamakna Paulus tanam kalo elo hagayi kalingora Tesalonika ¹⁷ Olebai-olebai, babe tutuwe nami baha wategama walta miyo, kadak taka, wale waina wadi, nami makamakge hatahoka dangagimi. ¹⁸ Oroge, nami kamakge mai tabaramu, loho nauwa dau Paulus, bada hapira wuda bena, tabolo kabalka natonma nami. ¹⁹ Oroge, iya kayi hamane, ege ate, waleka kamanadana, hamadaka dangama nami ta arona Mori Yesus nim ba amiNi? Walekma miyo? ²⁰ Miknage kama nadana mono ha ege dita dangama.