Hanuwa Tutu Haumana ¹ Batauge, tutu hada ha tolhamu tabaragu: na daha dahowe tubana kabani tutu aina joja lawai. ² Tabolo, oro ba dage jala harayi dadi at, tangana kabani na daha dahowe kadayo ole uma dauna mono tangada lawai kadayo lai dauna. ³ Laina na panu dahowe ha dauna tabara ole umana, tauda jala nage wu lawai tabara laina. ⁴ Lawai walena kawaha dak mage tau dauna, tabolo laina.Tauda dumo nage kabani wale na kawaha mage tau dauna, tabolo ole umana. ⁵ Ilami hama rau wiki kami, likege ba haworo daba we ta mahigo ai kamojana daja lage mi kamu malogami yi mahiggo tutu sembayang. Bege, morha hawuwalna daja lage kabalka ilna kaba gimi oro aim muka moge lar bamu patuwe taumu. ⁶ Tabolo, nauwa ug takkiwe inna wuwe maloga, wale parehak maguge. ⁷ Nauwa ug mannege tangana ata tujawe taugu. Tanyiduwe, tangana ata nakolege kanyuru dauna wali tao Allah, nada wu ata walim tahada inne, mono wadeka ta hada inna. ⁸ Tabarada aika haumana mono lawai balu, nauwa luguge na rehi na daha hoge tubada yida nyi ba engana lari ta hada katujawa nauwa. ⁹ Tanyiduwe, nyi yida aina dadi kawe pattuwe tauda, na daha dahowe yida bada ha umana. Oro, rehi na daha dahoge ha umana wali bana tunuda hada kama yarha. ¹⁰ Ta barada kaha umana, nauwa ug yiwe harehagu inne (wale wali ta nauwag mawe, tabolo wali tai mori), haluguna lawai ilna tananai laina, ¹¹ (tabolo bana kajorkaka tanani laina, nyi enga dahoge bana haumana, waleka hagga moli dangani laina), mono laina ilna pahewa dangani ole umana. ¹² Tabara karehi wal inna, nauwa ug tak gimige (nauwa, wale Morig mamiga) inna ba daka ole bai kada ole umana ai kaha tena, mono lawai nada au morha dangani, iln pahewa dangani ole umana nada. ¹³ Tauda dumoge nada wulawai kada laina ai kaha tena, mono kabani nada na morha ole dangani, ilna tanani laina nada. ¹⁴ Oro wu kabani aikaha tena nada naha tenguyi ole umana, mono lawi ai kaha tena naha tenguyi laina. Nyi ai tauda ge, anamu enga oto radi, tabolo batauge yida da tenguna. ¹⁵ Tabolo, nyi ai kaha tena nada kabu atege pahewa. Lari tahada tujana inna, anguwu waleka bagu watto gimi walemi hilma makattikma.Ta nyiduwe, Allah na maika beda yitta tutu morha lari ta moli kama ringna. ¹⁶ Oroge ta lawai, aga linawe mi tadawe aga lina dawe bamu hamane marayi laimu? Waleka, aga lina dawe mi bamu tadawe, ta kabani, aga lina dawe bamu hamane marayi ole umami? ¹⁷ Tabolo, tujawe ha iya kabenai Mori tutu tangana ata, taunai Allah bana kamaikadi yida diha-dih, kaengada morha lari ta hada kataudana. Tauda dumoge nauwa ug harehami tangami kangotenNa. ¹⁸ Apa da ata ha maikakole nyi bana kabunyi be? Nyi ilna pungage tada kabunyina. Dakakna ata kole ba maikani nyi aika kabunyi ho? Nyi ilna hil kabunyika. ¹⁹ Oro, kabunyi loho aika bunyi, wale alpu banning mage. Tabolo, kabanning na yidawe manudu ta tangadi parehanai Allah. ²⁰ Tangana ata enga dahona lari tahada katujawe kole nyi ba maikani. ²¹ Inna mi wumi ata paha lewa kole ba maikagimi? Ilam gela gagage hada inna. Tabolo, nyi mi bana dadiwe ata ka hoilabe, rehi na daha dahoge wai dagela mahiggo inna. ²² Oro, nyi pa maika lari tai Mori ba ata paha lewayi, nyi ata kahoila beyi dauni Mori. Tauda dumoge, kole ata kahoila ba kamaikani, nyi ata paha lewanani Kristus. ²³ Mi muraha bemi waige himi ba bemi, oro bataudage mi ilam dadi ata paha lewa nagimi ole atami. ²⁴ Bagu angu wugimi,nyiwe tangana ata kana engana dangani Allah, lari ta hada kataudana nyi ba kamaikani. Hanuwa Tubada Ata Ai Kaha Umahona ²⁵ Batauge, tutu ata aika ha uma hona, nauwa wale lakma harehagu wali tai Mori. Tanyiduwe, nauwa ug yigimi hangadagu ba wu ata, waige manawarai Mori, dadiwe baha tenawe. ²⁶ Nauwa ug yapa dawe hada inna dahawe lari ta hada kapitona batauge, haluguna rwhi naha daha hoge tuba wu ata tutu engana tuja kada memana. ²⁷ Apa mi makattimi ta wu lawai? Ilami katruhu kawe pahewa. Apa inna mi wale um makat kak homi ta ole umami? Mi ilam mayegana ole umami. ²⁸ Tabolo, nyi mi bamu ha umana, mi walem jalak mami. Mono, nyi wu bau winne ha umana, nyi walena jalakma. Tanyiduwe, yida kaha umana enga lidage tangage kapitona morha panu tana, mono nauwa ug kabu atege mi kam hilpami ta hada inna. ²⁹ Bagu ole bai gimi, ha kabu ateg wale agak mawe dageta nage mahigo. Nyiwe wali batauge, nyammadi yida kada ole umana, morha kamerana ai dayo ole umada, ³⁰ yida dahoyo mere aika hoyi, yida ka lagahara mere ai kalagaharai yida ka hiyo mere ai da dauda, ³¹ mono yida kawaige hada panu tana inna,mera ai wai dage. Oro, hada panu tana bataugetamrage bunga. ³² Nauwa ug kabu atege hilpa wali ta gela gaga. Ata ai kaha umana kana hangadage tutunai Mori, aaga linak kawe nyi baha dadiwe ha daha nage atenai Mori. ³³ Tanyiduwe, ata kaha umana hangada nage hada panu tana, aga linawe bana dadiwe hadaha nage atena ole umana, ³⁴ mono ha matarana naha bawege. Lawai ai kaha umana mono bau winne da gela gagage hada tubanai Mori dajalage nyi kana tenguna, tauna mono ngahuna. Taabolo, lawai kaha umana na gela gagage hada panu tana inne, aga linawe nyi dadiwe bana hadaha nage atena laina. ³⁵ Nauwag takkiwe hada inne tutu utu daumu, wale tau magu hirra tabaramu, tanyiduwe tutu hada ka daha dajalage ha ulamu tabarai Mori wale na margak mawe. ³⁶ Nyi badaka ata kaha ngadage inna nyi na rayi bege hada kayanana tabara bau wine oro bau wine rada haipewe dadida mono tauda dapoge hadage, haikani nyi kana rayige agawe hakabu ate na, nyi walena jalakma; hai kadi yida haumana. ³⁷ Tabolo, nyi natubabe lari ta atena, wale tillu paha ruhug mawe, dage kawaha ata ha kabu ate dauna, mono pohta bewe lari ta atena tutu ai ha uma dangadi bau wine rada, yiwe nyi dumo narayige ka daha. ³⁸ Yidawe, nyi bana ha umadanagana lawai nyi rayi nage kadaha, tabolo ai naha uma danagani lawai nada, harayi dumona dahawe. ³⁹ Lawai kama katti ta laina na morhaho. Tabolo, nyi laina mateka, nyi hoila nage tutu haumana langka ia hingguyi ha kabu atena, ata nada lari tai Mori. ⁴⁰ Tanyiduwe, dokuge paha ngadagu, nyi rehi na lagahara howe nyi ba engana lari ta hadana, mono dokuge nauwa dumo dau alani Wadi Allah.