¹ Tungale too sanu momaracaya onjoi Yesus ijoo'e Kristus neluange la'e Allah; ma Tungale too sanu masayangeli Siama, masayange teule li unga sanu neluange la'e Siama. ² Kangkai injeina, nootoita onjo li'ite noasayanita unga-unganu Allah, watu no'asayanita Allah ma noturu'ita parinta-Nye. ³ Pa injeinima sayanggu Allah, onjo notaatita parinta-Nye; ma parintah-parinta-Nye labai moboat. ⁴ Pa, nugaungopa sanu neluange la'e Allah ma'adaage juniaa; ma injeinima kemenangane sanu na'adaangome juniaa: imaan note. ⁵ O'iga sanu ma'adaage juniaa onjo lauje liio sanu momaracaya onjoi Yesus nu Unga nu Allah? TUMUHU SEENDE-ENDENYE ADAANGE LI LALONG YESUS ⁶ Liiomeine sanu nodua'e kangkai ogo ma nu laa: Yesus Kristus; labai boi kangkai ogo, tapi kangkai ogo ma nu laa. Roh me sanu nonyabii pa Roh me injoo'e sanu tutuu. ⁷ Pa, adaange totolu sanu nonyabii li surga: ⁸ Roh, ogo ma nu laa; ma totolunye injoo'e boi soung. ⁹ Onjo notarimata kesaksiannu manusia, kesaksianu Allah mo'uigonye. Pa, kesaksiane sanu bineea'u Allah injoo'e kesaksian tentaange Unga-Nye. ¹⁰ Too sanu momaracaya kangkai Unga nu Allah adaange kesaksiane injoo'a kangkai liio. Too sanu lauje momaracaya kangkai Allah nogutume-Io nebali topo nipu lantarane too injoo'e labai momaracaya antage kesaksiane sanu bineea'u Allah tentaange Unga-Nye. ¹¹ Ma, injeinima kesaksiane injoo'e: Bineea'ome nu Allah kangkai li'ita tutuhuange seende-endenye, ma tutuhuange injoo'e adaange li lalongu Unga-Nye. ¹² Tungalu too sanu naadaange Unga adaange tutuhuang; Tungale too sanu lauje adaange Unga nu Allah labai adaange tutuhuang. TOO SANU NELUANGOMAE LA'E ALLAH LABAI MOGOTU DOSA ¹³ Tinulisa'o'uma so'ale injeine kangkai li'oe sanu momaracaya lilalongu tope Unga nu Allah bala nootoimia onjo li'oe adaange tutuhuang seende-endenye. ¹⁴ Ma, injeina keyakinane sanu adaange kangkai li'ite li tolo-Nye, injoo'a onjo bai nuga nopomongite sesuai kangkai e'seilu-Nye, no pe'ilongoa'o-Nya li'ite. ¹⁵ Ma, onjo nootoita Io me'ilongoa'e li'ite, nugaungopa nopomongite, nootoita onjo li'ite adaangome sanu pinomongite la'e-Io. ¹⁶ Onjo adaanga too sanu me'e ito soungaangonye mogutu dosa sanu labai momatujua'e a'pateangoma'e, ambo'onya too injoo'e momonggi, ma Allah mombeea'e tutuhuange kangkai too sanu mogutu dosa sanu labai momatujua'e a'pateangoma'e injoo'e. Boi, adaanga sounge dosa sanu momatujua'e a'pateangoma'e; lia'e labai momeilua'e onjo io haruse mo'utanya untuke dosa injoo'e. ¹⁷ Jojoo sanu labai tutuu injoo'e nu dosa, tapi adaange dosa sanu labai momatujua'e a'pateangoma'e. ¹⁸ Nootoita onjo tungalu too sanu neluange la'e Allah labai mogutu dosa, tapi liio sanu neluange la'e Allah monjagai'io labai dadanye. ¹⁹ Nootoita onjo asalote la'e Allah, ma jojooma'e juniaa adaanga lilalongu kuasa sanu Majaa'e. ²⁰ Injopa, nootoita onjo Unga nu Allah nodua'ome ma nombeea'e pengertiana kangkai'ite ba nootoita Liio sanu tutuu; injopa li'ite adaange lilalongo-Nye sanu tutuu, lilalongu Unga-Nye, Yesus Kristus. Liiome Allah sanu tutuu ma tutuhu seende-endenye ²¹ Unga-unga'e, agaala'a li'oe la'e berhala-berhala.