¹ O'ou sanu naadaangome ulela'e pamulanye, sanu ilongomamime, sanu initomamime kangkai matamame, sanu pinatasangomame ma dinadanu umbungomame, injoo'ume s Gombo'e tutuhuang, ² tutuhuange injoo'e nanyatame ma initomami-Me. Li'ame nonyabii ma obambala'e kangkai'oe tentaange tutuhuange seende-endenye injoo'e, sanu adaangome kangkai Siama ma pino'itaa'ome kangkai li'ame. ³ So'ale sanu initomame ma ilongo injoo'e, pineilua'omame teule kangkai'oe ba li'oe teule adaange po'osounange kangkai li'ame. Tutuunye, po'osounangomame injoo'e asalonye la'e Allah Siama ma unga-Nye, Kristus Yesus. ⁴ Jojoo so'ale injeine tinulisa'omame kangkai'oe bala adandalanoome mebali mohu'e. MELAMPA LILALONGU MENSILAAG ⁵ Ineina bambale sanu ilongomame tentaange Liio ma pino'odua'omae kangkai'oe, iome Allah sanu mensilaage ma lilalongo-Nye tu-tutuu labai adaange o'nopang. ⁶ Onjo li'ite momeilua'e adaanga po'osounangote kangkai Liio, tetape li'ite tutuhu lilalongu o'nopang, li'ite mongakale ma labai mogutu sanu paila'e. ⁷ Boi, onjo li'ite melampa lilalong mensilaage, selilio aime Io li lalong mensilaag, li'ite adaange sounge po'osounang kangkai taninye, injopa laani Yesus, Unga-Nye, mongalana'e li'ite jojoo la'e dosa. ⁸ Onjo li'ite momeilua'e li'ite lauje o'dosa, li'ite monipu ambo-ambo'ote ma lauje adaange sanu tutuu li lalongote. ⁹ Onjo no'akuita dosa-dosate, Io sanu mesetia ma maadil untuke mongampuni dosa-dosate ma mongalana'e li'ite jojoo la'e sanu majaa'e. ¹⁰ Onjo li'ite momeilua'e li'ite laupe pernah nogutu dosa, li'ite mogutu Liio mebali ponipuong ma gombo'o-Nye lauje adaange li lalongote.