KRISTUS DO GEDE ¹ Lai bO ninuku niefanei, Tuhan gigom ba mi tahokang mi tafuma, nau ba awola na bile ye taboho oho na ten ye taboho ka unanati ge oho do ten do yowa do yap. ² Kui - kui oho yo ge yeyerang ama de beka ahala gagaten oho yo ge yeyerang amanuka de gi foka da sunat oho ge yerang. ³ Ped oho do amanuka sunat geng kafura, Lahatal gi wewen po luku gohama Yesus Kristus, lai he pi tom kiding ka hiyaka gi upan urumai ufeteng. ⁴ Ned gi go kafura oho na yang nuku urumai dobahe ohoh hiaka gido, amanuka afenai de kir - kir ufan nuku ufeteng dobahe gotorui de gtewaka foka gido ned u tew mi tau: ⁵ Ned uru gi mi tidaroko bo nang sunat, Israel amanuka geng kafura aramang Benyamin, ama Ibrani de Ibrani lolong torat parenta gegalul he ned hoko farisi amanuka. ⁶ Ni uyala unahokang oho amanuka gabeka gahal lai he iye dofeng de parenta torat mia na ka nogapita. ⁷ Dobahe falupu de rupa - rupa de awola na u senang wer hoko na galeke he ka nawala nuka, Kristus go yoma. ⁸ Usep rupa karnuku oho yahot kalaba na ma Yesus Kristus ni Lahatal gi go yoma, nau karnuku Ge gi mi lea, ge Kristus falupu nap dorai, falupu oho na goyoma he ya hot aloho ba gohama, mode na wai Kristus ba gap. ⁹ Na Kristus gotomu ka ufan de ned hoko ama feng de ni newaka mia hoko ra, dobahe parenta torat gi gom mia ra dobahe ni nom kafura ma Kristus oho do ie kafura Lahatal ni nom kiding mia. ¹⁰ Mode na no gen gi wewen birang gi gogagamu ya hot Ded warai imon wai mi dahihi. ¹¹ Gi gogagamu na imin wai mi nahihi birang garupaka. ¹² Ke ufan de na gen yang mikana ra, dobahe na uyehuhung mode yo gen yahot Kristus Yesus da napun. ¹³ Ni nuku ni afenai, na ka geleke ufan yed oho na yapun yai dobahe ie nuku na gaten oho utayofong dobahe ie nuku na mi galul gaten, nado namol gareng oho na utayofong, wer hoko nado naho gareng wai hoko ba na tau rui. ¹⁴ Natei laka gena ni nom ururumai oho na gopun, sorga Lahatal Yesu Kristus gi gom mia. ¹⁵ Mai pofalupu poi kir - kir go nuku gang kafur ohowarai ra de ya ka kir - kir ge warai, Lahatal da mi di wewen mang petang uyehung. ¹⁶ Gi gogamu oho mai pi birang de gen garupaka hoko gopun. ¹⁷ Ni nuku ni afenai ni hoko ba geyagal nuka - nuka amanuka de kafura ba gegalul niyed warai. ¹⁸ Amanuka de salib Kristus gang bebeka oho towang, ge wei oho awola po mia na yang u yehung, wer hoko di na ten uyehung uyawowa neng hinow u hia. ¹⁹ Birang weka uru he imon rai garupaka, ama gi Lahatal oho ge gatoko ba utayan, ama gi udadahokang oho towa maniang, ama gi kir - kir oho ge hiaka gi ba u kir -kir. ²⁰ Doba ped hoko pi afeng ir sorga, ge oho ge tahokang ge tafuma, Tuhan Yesus Kristus birang ir gagarohai gogalel. ²¹ weka ari he pi tewaka foka de hiaka gi hoko da u afenai tan ma gi gewaka naling maholang goyoma go hili, giwewen Kristus weka ari he falupu ge ba go luku.