KIR - KIR YA HOT KRISTUS ¹ Gare pi Kristus gom miatewaka nuka de ia kadon go nuku go aka wen panen mia tedom ka te alama hili, tom te sorai ² yom nuku kir - kir nuku de ni nahi da u mayahang, yena yarana go nuku go aka ewn panen mia gi gogamu nuka. ³ Dei nan ke gaten ka kir - kir ge galul, i ahokang de ihi ke gowa ra u dei. Teu mi nuka he ufan ama afenai do mi nuka ⁴ Dei tatara yi birang ba u kir - kir, dobahe pi afenai gi birang di bai ⁵ Goyepeng kir - kir hoko yanai hama mia, ya hot Yesus Kristus ba warai, de Lahatal gi rupa pun, dobahe da ka datela mira Lahatal gohama. ⁶ Lahatal gi gom mimia oho ten gopun. ⁷ Giminuka he, Da di dewaka gaten yahot nan ke ka goa Da dang gaten yahot madal warai mode amanuka gohama. ⁸ Ge Girupa amanuka warai ohodo Da doluku gena Da imon, kul salib tau imon. ⁹ Ge ohodo Lahatal da teu ugatela, lai bo ganei magena ganei de hiyaka fulang fal upu gen. ¹⁰ Mode ge ganei Yesus oho falupu te buku nati, hiaka hoko tau wai ma hiaka ge weu mia, ¹¹ talib oho ufan Yesus Kristus oho do Lahatal ge, gimang warai leya falaka. ¹² Oho do ni nuku - ni afenai mang towarai de ya geyagal mi kana, tew - tew wer na ka hota. I nuka I hama ukareang mura te farot. ¹³ Mode Lahatal da tom mi kareang mode pi nuka ba uyala, wai u kareang nau do tom gaten rumai tom gowa nuka hama. ¹⁴ Nan karnuku golelang galalai ka ukilikil dei ukadon ukamaku ¹⁵ mode ya ka ahala yahot Lahatal gi kan de ka ahala dei ama de gom dalikil ganai hama mia, mode gi laka oho da hiaka hoko ufalaka. ¹⁶ Lahatal gi gamow kawal bibirang gopun rumai, mode ya uru de Kristus gi mia he na ge feteng na ka taki. ¹⁷ Ned ama na wel yahot persembahan korban gi gawatau lai he i om kiding mi u kareang, falupu pi tom umayahang. ¹⁸ Yedi bai, yi mob kalang dohama, yom u rumai wai urumai yo hama - hama. ¹⁹ Tuhan Yesus gom mia na ufan de hanokai Timotius gaboho yap gede. ²⁰ Ya hot ned ama afenai ka noa de Ded warai, bo gom kafura gatoko kafura yi nuka ubalenta. ²¹ Ama afenai ama di kareang ba golelang, Yesus Kristus gi da gogaba. ²² Yedi ya gen Timotius yang kareang gena hoko, de da nowa kareang towarai de Lahatal go gamow kawal ya hot wel da ma gimang gena. ²³ Oho do na uyehuhung na gaboho yap mi ya, ²⁴ na Tuhan mi rumai nonakal di he na yap hoka. ²⁵ Ge oho do na ukir - kir kul usep Epafroditus gaboho yap gade, dedibai ni nuku de niel kareang do, wai ama de pakang pun ya yap do. ²⁶ Ge oho do ded gom tew u sorai hanokai yap mode yo gen ded ka gafia. ²⁷ Usep, ded gafia ra he imon doba he Lahatal da di tedom magen - dobahe nedi bai mode ama gom dei uhiki. ²⁸ Oho do na tew uyala gaboho da wai yap gade mode yom umayahang ya yang gerui yai. ²⁹ Epafroditus go nunuka Lahatal gom mia. ³⁰ Oho do Lahatal gi kareang hoko ra he da imon, da danohong da dawai ma geben nau ba ya ma a gowa de umanai.