NAMI TAMA'A YO EYKNEWE AYOM APAHANG ¹ Eyknewenun nami tama'a ata'ay alolo Tuhan om mi. ² Yiming, yiwi, uuada ahol. Oyndo prente o minumi, woy med uuara phi'i. ³ Ee du'uyn ee iiweseng no'o iiuur low oyn pli'i mati ta. ⁴ Omong bala, ha'ay we mating puyn yi eyknewe ano'o ari'ing ey, eede yuwunun ;ano'o mati Tuhan o tayom o tapahang alolo ata'ay we om mi. MANGSING WOY MED TUWUNG DU EY ME'EHE EY AALEPENG. ⁵ Aaring kuli masing nu du Tuwung du ey me'ehe eyalepeng ba ara pli'i mati ta ara aada ahol mi du'uyn didi ara bang beng om mi ara om abulu puyn mong wede'e Kristus du'uyn. ⁶ Ha'ay mong wede'e nami kreyeng arleng du'uyn e nami edunu puyn nami no'o om ano'o snang. Bo aringdu Kristus o masing yo. Du'uyn hi panen aten du Lahatala Ey om alolo ara om mi. madang ⁷ O'kereyeng o blente du om pirnu puyn mong wede'e Tuhan ahama du'uyn a med nami no'o o arahama dang. ⁸ Wede'e iiring du na ahol eydu kuli mangsing nami tuwung miyebeng ey no'o panene Tuhan Ey uyl-uyl med ene. ⁹ Tuwung nun iipanene aten ma mangsing nun du arhama ari'ing wayl du y'no'o du'uyn we iiahol ey du tuwung du'udyn didi yuwunun ey tuwung du hama-hama ara Meres mi. No'ohi ey mi ale'e ey mitra'adang. LAHATALA O BLENTE DU BARPI PUYN ¹⁰ No'ohi iikua'a ma ara Tuhan mi du'uyn didi kua'a ara O kuasa om mi. ¹¹ Lahatala o blente barrpi puyn du'uyn ee iiring du toho seteng o ba'akluyu du uuteteng. ¹² Wede'e tey adimi du ahiri med wi arahama bo p'rente ara teteng bu'ung eni towong teteng. Kwa'a ba ara ba ara ku'upli'ita du'uyn didi tutung kwa'a ara seteng o homi yaha ba ara buungta, ¹³ Du'uyn we Lahatala o balepe du barrpi puyn du'uyn we iiring du iitahang no'o ara toping oyndo mi. Yel ho'o ma he dumi, no'ohi barrpi du o'ho lalang no'ohi iiring du woy toho ee. ¹⁴ We toho dumi ara sap-uyl du ii abi'ing o abulu du puyn ara ahang wading mi. Woy med kashliling puyn. ¹⁵ Du'yn didi eypiling puyn ara sur m'dulung uutaro'ong ara temitawuyl iilong mi. ¹⁶ Na leleng ayrnu mi o atino'o ahol du puyn du'uyn he w'leweng ud apeti ho'o ma he du iielete no'o. ¹⁷ Iil abulu moy med homi m'dulung o pede du aring duru we Lahatala ampa'a ¹⁸ No'ohi oo o mi yel aring ana ara a o mi pa'a om mi du barrpi uuabang. a o mi pa'a duru we ano'o kwa'a. Aa o mi pa'a med nami m'dulung towong ohadana. ¹⁹ Aa o mi naring di narahama du'uyn we na na nata aya'a na nami towong aramating no'o. Suru m'dulung o twuni didi na uubang no'o. ²⁰ Wede'e sur m'dulung du nou uuahowo wede'e na spiri bang mi yo bo oo omi no'o hadana du'uyn ee o atino'o du na kwa'a toho uumating. MAHENE NO'O O OHO MI ²¹ Tikhikus, no di'ayl ara o atino'o mi mangsing ba pa'a bala ara Tuhan om mi leleng ayrnu uumating du'uyn e iiahol naring o rupu toro'oyn na o atino'o we arleng. ²² Nou ey du ahowo iiolap yang du'uyn e iiahol uubang ni yom ano'o dil'u ma he. ²³ Temi tawoyl il loling no'o ara pi barpi taring ta ma timing Lahatala we mi woy med pi Tuhan Yesus Kristus mi. ²⁴ Il loling no'o hama ara iibarpi e'yaha ara pi Tuhan Kristus Yesus e yaha puyn yang uuyohoyndang.