helama tona ie na tu do Herani pa era Tesalonika ¹ Helama Tona Ie nga ti Paulus, Silwanus, nga Timotius, wie do Herani pa Tesalonika do pa dhara Deo Ama di nga Muri di Yesus Kristus. ² Lua hajha ruba dhara Deo nga helama tona ie ti Deo Ama di nga ti Muri di Yesus Kristus. ³ Do jamma di ta peha'e kolo li wo ie la hedapa Deo na tu mu, tuwuah'hu-tuwuah'hu, jhe do wata ta do mina harre ke. Rowi, ju ke ne lua manno mu jhe do ju lema ne pehajha pe dhei hedau nga hedau. ⁴ Rowi do mina harre ke jhi lema miha pedai nga tunge jhara mu pa hedapa do herani unu Deo, rowi lai makka te nga lua manno mu pa dhara hedui herui, do lake ro mu. Jhara Lua Happo Deo ⁵ na ane ke ne Teleo li pe happo Deo do mola do mira, rowi mu do jamma ta era pa dhara rae pereda Deo. rowi mu lemma ta alla ke ta hedui herui. ⁶ Jhe nga lema do jamma pa Deo ta bale rowi lua hedui pa ro, do alla pe hedui mu. ⁷ tapulara, do ta wie pa mu ne tunge do alla pe hedui nga lema pa jhi, pa awe puru Muri di, Yesus ti era do mmau do megala nga kika Deo do meliri dhara, ⁸ nga ai do weo do keduu na tu ta ma wolo ro, dho'o wae ta tade Deo, nga dho'o wae ta pedute ne li hagga dhara Yesus, Muri di. ⁹ Ne ddau do na harre do ta lake ne ru wolo do peloro, jjau nga ti dhara kewolo Muri nga ti dhara kuaha No do kelodo ne. ¹⁰ Ki dai ro ta dakka na tu ta ketute kelodo pa telora ddau do mmau, rowi mu do parahajha lema nga li kelolo jhi. ¹¹ Rowi do mina harre, dota habbajha jhi na tu mu, henao pa Deo, ro mii jhi ta jamma mu pa lau pedoa mu jhe pe tobbe hari alle ne lai dhei tu ta tao lai do wo ie nga lua manno pa dhara kuaha No. ¹² mii jhi ketute kelodo ne ngara Muri di Yesus pa dhara mu, nga mu pa dhara No, pedutu nga lua penau nga ruba dhara Deo di nga Muri di Yesus Kristus.