¹ Rai ngati Simon Petrus, na annu nga dau pe pu Kristus Yesus, natu na do alla ta hammi ne lua manno do hela'u nga do unu rowi ji lake jara lua mola mira Deo nga Mone Pehelama di, Kristus Yesus. ² Haja Ruba dara Muri di Deo, haka nge nga mangallu dara pa dara ta pe tada nga Deo nga Yesus, Muri di. Dau-dau do pedoa nga do Bile ri Deo ³ Deo mone higa do alla ta wie ke pa di ne hari-hari lai do pe pa pe mahhi nga muri mada do mmau jara lai mmau dara do gae ta wie ri No je do alla ta pedoa di natu tala Ga Jamma Dida Medera nga lua wo ie No. ⁴ Nedo lake jara no, Deo do alla ta wie ke padi li jaji-li jaji No do da'i Mone ae nga do dai maha ne kebue ngita ne jaji-jaji do na harre do ta uda ta nara mu je iko la abba pala la dara Deo, le ma pe jau anni nga apa nga kerewe pa rai wawa do na de, do dakka rai ti lua dai ngi'u miha. ⁵ natu lua pedabbo napu nanne, pe wohe la'a rui we nga petarra-tarra nattu ta pe tobe ne lua manno nga lua wo ie,wo ie nga mmau dara, ⁶ Je mau dara nga lua makka te makka wangnge, je lua makka te makka wangnge nga lua rui dara, je lua rui dara nga lua mmau, ⁷ Je lua mmau nga lua Pehaja Pedai a'a nga ari le ma nga lua dai do ado tu ngi'u miha. ⁸ Rido mina harre ke, kita hari-hari he na hede do era pa ngi'u mu je gae tape tabe-tabe haku mu ado ke do jadi ta parahuma he we jedo wue pa dara lai petada nga Muri di, Kristus Yesus. ⁹ Ri do mina harre ke, dau da do bule nga hari-hari naharre wala wari doke nga dau do d'o nara tahe leo nga keteme ngi ado mido baddu he rowi do ballo ri no tado no do alla ke ta pe mo rai ti halla ludu no do awe do ludu. ¹⁰ Ri do mina harre ke, wo tu ahhu-tu ahhu ya, pe wohe la'a rui we do petarra-tarra wari ko natu ta peketeme nga pe teleo ta do mu do tarra-tarra ta dau do pe doa nga do bile; rowi ki ri jagge ri mu, ado ke mu do magae ta keloli. ¹¹ nga mina harre, ke lae la dara rae pereda do Peloro Muri nga Mone Pehelama di, Yesus Kristus, do ma gae ta gi'e pe balle na tu mu. ¹² Ri na nanne ke hakku ne lai dai ya natu ta pe he nge mu pa hari-hari lai do na harre, ta majji le ma ta do alla ta toi ke ri mu nga do alla ke ta pe kadde ri mu nga ke tarra pa dara lai do petu do unu ri mu awe na de. ¹³ helama muri namada pa ammu pa Rai Wawa dona de, ya do paralu ta pe reke mu tu tape darru nga mu jara lua ta pe he nge mu, ¹⁴ rowi do toi ri ya do ma gae ta janne ne era pe pengaha do na de mi do ala ta pedelo pa mu ri ya nga ke teme rowi Muri di, Kristus Yesus. ¹⁵ Je ya do ma gae ta pe wo he la'a rui nga ke tarra-tarra ngita alla ya ta lodo, mu do nara ta he nge ne lai-lai do na hede hari-hari. Haka Hi Namada Pa kattu Jara lua Ga jamma Kristus ¹⁶ Je ado ji do pedute ne li jawi-li jawi do pe era kara pe era nga ri dau rai wawa nga pote nga appi pa dara nga ta pe tade pa mu ne kuaha nga lai dakka Muri di, Kristus Yesus, tapulara ji hede haka hi do ngadde jara lua Ga nga Ke le'e No. ¹⁷ Ri do mina harre ke lai Ga lai Jamma ne do hamme ri Yesus rai ngatti Deo Ama, mi awe do alla ta pe peke ri Deo Do Ga do Jamma, "nade ke Ana Ya do hajja do d'dai ya titu wata pa No we ya ne do d'dai." ¹⁸ Rangnge ri ji ne li na nanne do dakka ngatti surga, pa awe era ji hela'u nga No. pa kolo lede do mmau do megala ¹⁹ ji le ma tataba ta pe rue ri li pe dai-li pedai Deo do uru, nga do ie le ma ta he leo ri mu nga petu, mi pe heleo lapu ai do weo pa dara kerabba, tade perammo mea riru ne hau la dara ade mu. ²⁰ tapulara, ne lai do rihi ketutu do jamma ta toi rowi mu da d'o bule ne li pedai Deo do uru do terora pa dara li buku Deo do mau do megala do dakka rai ti li kewahhu dau rai wawa, bale ma pi'a do he ahhi he ne li pe dai Deo ne do dakka rai ti lua dai dau rai wawa; tapu lara dau-dau do pedai li nga ngara Deo pa dara lua he wewe ri Henga Do Mmau Do Megalla.