Ruwolo tu Mone Adja-Mone Adja do Pote ¹ Pa awe do uru, do era nabi-nabi do pote pa te lora dau Deo, mi awe nade le do era ne mone adja-mone adja do pote pa telora mu, nga adja dara-dara ne li adja-li adja do ta pe ape, rihi-rihi do hihe Muri do alla pehibu pepeha'u ro hakku ta hewakka ke ne dakka lua apa ne pa ngi'u ro miha. ² Nga, do ta ae ne dau ta pedutu mi muri mada ro do do bule nga hada, pelae ri ro ke ne rudjara mola mira ne ta kare ta wagge. ³ Nga leru ro ta kale mangngi ti mu nga pedai pote appi; ru wolo tu ro rai uru he peladjo doke, nga lua apa kerewe ro pe badje doke. ⁴ Rowi, kido pe heti'i anni ke Deo pa awe tao hala malaikat he, tapulara ta nab'a we ro la dara rai djaru dje djula ro dje petuki pa dara era doke rabba rai tade dae la awe peohe, ⁵ nga kido henge ke ri Deo raiwawa du uru pewala nga ti Nuh we, he dau do pelebe peke ne lua do mola hela'u nga do pidu dau do hade he, tapulara pedakka ne ei wa ma raiwawa do'do tade Deo; ⁶ Ne wole ri Deo rae Sodom nga Gomora dje pemae ne due bue rae naanne tade djadi ta awu ta kepanna, dje pedjadi ro ta mi hehi telia tu nenga ne do ta djadi pa dau do kebat'to do muri mada pa awe do ta madae; ⁷ Nga ki pehelama ri Deo Lot, dau do mola mira ne, do hedui nge rowi alu muri mada do apa kerewe he nga ti dau-dau do'do tada uku nga hada, (pada dara awe do nababa, Lot muri mada pa telora ro he lodo-lodo, nga tarra ne hemanga no ne hedui kingad'i nga kirangngi ne wue ai wue tao ro do apa kerewe he mido ngad'e nga do rangngi no;) ⁹ Ri Deo do rihi toi minami ne golo ne mah'hu dau-dau do mola nga ti lai hakku nga ta ramma ne dau-dau do tao apa tu tawolo pa lodo peohe, ¹⁰ Ne do kemolo ne ro dau do pe tobo lua ddai ngi'u pa dara lai do apa kerewe, nga pekebue do do pereda. nga rihi gi'ga nga wue anni, mone adja-mone adja pote nga meda'u do ta kare menihi bara do ga, ¹¹ dje nepetu ne malaikat he do rihi rui nga rihi higa ngati ro, pe mah'hu do li peanynyi do mi li kara wag'gi penadja nga ro pa hedapa Muri. ¹² Mone adja-mone adja do pote nahede do mi bada do'do bule nga i'a mau dara he, nga do pemetana tu ta ramma nga ta pemade we; kara wag'gi rowi ro pa lai do'do toi nga woie ri ro, do ta pe appa pekerewe nga pemae tebo tai ro; ¹³ ro ta nappi kebi ri lua kebat'to ta mi pai pala wue ai wue tao ro do wo appa he. Ne ege ri ro ki nga nginu mawo pa awe nattu lodo rai ta mi heh'hi lua mengallu dara. Ro djadi ta ra'i ta ru merama, menggallu dara pa dara kewarru dara pa awe ta nga'a hela'u nga mu. ¹⁴ Ne pa dara namada ro do tobo ri dai ta kenyo we nga pengaha do ti tao do hala, ri ro pelu ne dau-dau do keloe manne he, dai ne ade ro do mami ke pa dara wue ai tao keriu. Ro hede ke ne ana-ana do nara ru wolo! ¹⁵ Ta djane ri ro ne ru djara do mola nga lake ne ru djara do kelak'ku, naanne mi ru djara Bileam ana Beor, do dai ta hammi wad'do pa djagga no do woapa ne. ¹⁶ tapulara, nara bani nga no taga lua pag'ga no ri hengi'u keledai do bangnga, i'a pedai li hemi pedai li dau he tade pengaha ne na nabi ne ti djagga do wo apa ne. ¹⁷ Dau-dau nahede mi mada ai ei do kemangu nga mi buru do hepi'o ri ngal'lu he. Kerabba guru rai do pemoke ke tu ro. ¹⁸ Nga pedai wue anni, tapulara do mukoho, ri ro ta hi ne dau-dau do alla ta pe mah'hu anni nga ti ro do muri namada pa dara huli teballi nga lua dai matta dara nga bute kewita. ¹⁹ Mone adja-mone adja do pote na harre, jaje ne lua balla kattu, tapulara ro miha djadi ta do peannu anni pa lua apa kerewe. Lai ti nenga we do pewawe he dau, pa no ke ne dau naanne ne pe annu anni. ²⁰ Lai ki alla ke ro pepe mah'hu ti keewita raiwawa do apa kerewe ri tade ke Muri nga Mone Peie Pea di, Yesus Kristus, tapulara dai leto bale wari la raiwawa do kebatto naanne nga pereda ri no, moko djadi ta rihi do wo apa nga ti do uru ne. ²¹ Ne woie ne no ta do tade ri ro ne rudjara mola mira ne, nga ti ta alla pe tadde dje nuni anni nga ti uku do mau do alle pe wie pa ro ne. ²² Ro heke de mi do gabe ri li peradj'a do petu nade: "Ta mi ngaka do bale la djore maddu no, nga mi wawi do alle pepe djiu ei ke bale wari la kerupu lubu"