¹ Ma ngoosa ma tupaangeka ma taongu ma sinotoka ma orasi ma kolano Darius wopareta, ma JOU Awi demo ibola o Zakhariaka o Berekhya ma ngopa o Ido ma dano ma demo komanena, ² "Ma JOU duruhe Witoosa nia ete de nia toporaka. ³ Sababu magena onaka nia dedemo: komanena ma JOU o dunia wapopareta Awi demo, 'Una-ka nimakiliho,' komagena ma JOU Awi demo, 'so Ngohi lo done nginika tokahika,' ma JOU o dunia wapopareta Awi demo. ⁴ Upa nimaaka koloko nia ete de nia topora. O bi nabi itdotdoma onaka yodedemoka, yotemo: Komanena ma jOU o dunia wapopareta Awi demo, nimakiliho nia oho ma ngeko datotorouno de nia bi tilaku datotorouno! Duma ona Ngohi isigisewa de isidoohawa, ma JOU Awi demo. ⁵ Ona kiaka, nia ete de nia topora? So o bi nabi yooho ka sidutu ikakali? ⁶ So Ai bi demo de Ai sitatapu ode Ai bi leleani o bi nabika tasusuloka gena nia ete de niatoporaka yaadoka? Kagena de, ona yoma toba de yomatoduba de yotemo, 'Ma JOU wafanggalika mote de tongone nanga goko de nanga bane datotorou, komagena Una waaka ngoneka!" O JARA NGAI IHA ⁷ Ma wange monahalo de ihaka ma ngoosa mogiowo de sinotoka, ena gena o Syebat ma ngoosa, ma taongu ma sinotoka ma kolano Darius wopareta, ma jOU Awi demo ibola o nabi Zakharia o Berekhya ma ngopa, o Ido ma danoka, ma demo komanena, ⁸ "Ma orasi puputu, ngohi takelelo yanau wimoi o jara dasosawalaku wobane! Una o bi gota murad ma hutu ma risoaka womaokoye o bi gota murad o dirasu ma rabaka, enamomongo awi duduka o jara dasosawala, dagugula, de daaare. ⁹ Ngohi tosano, "Ai tuangi, ma ngale o kia dangudu manena?" O Malaekati ode ibobicara de ngohi isango, ngohi done ngonaka tosikelelo ma ngale dangodu manena," ¹⁰ O nyawa yomaooko o bi gota murad ma hutu ma risoaka magena wotemo, "Ma JOU ona wasulo ma ngale o dunia yakiloli." ¹¹ Ona yobicara ma JOU Awi malaekatka ode imaooko o gota murad ma hutu marisoaka magena, yotemo, "ngomi o dunia mia kilolika." Igogougou, o dunia ma rabaka dangodu o kia-kiawa idadi." ¹² Kagena, de ma JOU Awi malaekat itemo, "Ya JOU o dunia napopareta, so ma dekakiasi Ngona o Yerusalem de o bi kota o Yehudaka nadodara ode Ngona nadoosaka madeka o taongu moritumudingi?" ¹³ Ma JOU o malaekatka wasango ode ngohika ibobicara magena de o bi demo daloloha de inasisanangi. ¹⁴ O Malaekat ode ibobicara de ngohi magena itemo ngohika, "Ma JOU o dunia wapopareta Awi demo nisingangasu, Ngohi o Yerusalem de o Sionka duruhe toufa. ¹⁵ Duma, ngohi duruhe tadoosa o bi bangsaka ode yamaloku manga oho gena isanangi. Ma orasi Ngohi itoosa ngaroko ka sutu, ona o dorou yaakaka. ¹⁶ Sababu magena, komanena ma JOU Awi demo, "De o dodara Ngohi done tomakiliholi o Yerusalemka." Ai tahu done kadoka isigoko, Ma JOU o dunia wapopareta Awi demo, de ma gago isitutuga done yodiliali o Yerusalem ma tdokuka. ¹⁷ Ma moili nisingangasu, ma jOU o dunia wapopareta Awi demo: Ai bi kota done todingira-ngiraku de o sanangi. Ma JOU done o Sion wosiputuru de o Yerusalem wahiri. O TADU NGAI IHA DE O BESI YOAAKA YARUHA ¹⁸ Ngohi ai lako tapelenga, de takelelo o tadu ngaiiha. ¹⁹ Ngohi tosano o Malaekatka ode ibicara de de ngohi, "o kia ma ngale manena dangodu?" Maena isango ngohika, manenahe o bi tadu ode yosisarahaka o Yehuda, o Iarael, de o Yerusalem. ²⁰ Kagena de ngohika ma JOU wosikelelo o besi yoaaka yaruha. ²¹ So, ngohi tosano, "O bi nyawa yahihino magena done o kia yaaka?" Maena isango, "Manenahe o bi tadu ode o Yehuda isisarahaka so o nyawa moi lo yomoroiwa manga sahe yatide. O bi nyawa manena yahino ma ngale ona yadasawang, ma ngale yosisariwi o bi bangsa manga tadu ode yatitideka o tadu o Yehuda ma tonaka, ma ngale yosisaraha."