¹ Ma kolano Ahasyweros wopareta o taungu o ratu moi de monahalo de tumudingi defoloi o india ma daerah ² mabati o Etiopia ka. maorasi ma gena, Makolano Ahasyweros womatamie awi bobareta madokuka awi kadaton Susan marabaka. ³ ma deka o taung saangeka ami bobaretaka, de uma orarame waaka mangale to una awi nyawa ya lalago de to una awi leleani. De awi surudado ya ngodu o Perisia de o Media no de onyawa ya hohoromati de o nyawa yo popareta o daerahka la yahinu awi simaka. ⁴ una asa wa sikelola to una awi harata, awi mulia awi pareta de wisuba de sihoromati de awi si rarame o wange isi geto geto ya aka me bati o wange ratu moi de mopri tupaange. ⁵ De orasi ma wange ya edo, makolano we ahe moili orarame o nyawa ya ngodu a ngopa hekola o dodihimo, imo mate o kadaton o Susan marabaka orarame magena madeka o wangi tumidingi. ⁶ Okadaton mariho magena ya leru de o lenan, marupa da aare de da bibisi, de isi piliku de o lenan halus marupa da ungu de isipiliku de o rate perak ma golingasu marmer ka. O marmer ma rupa, sosawala, dabibisi daaare de datataro. De datataro de yahado o dipan siaka o mas de o perak no. ⁷ Ona yosidailako o anggur o udo-udo guraci ma rabaka, udo--udo mageto imakadahewa moi de moi. O kadato ma anggur isidailako duruhe idala sababu ma kolano awi sininga daloha. ⁸ Youdo mote de o kia isitatapuka de yagegegowa, sababu komagena ma kolano wasulo awi kadato ma roriri la o anggur yahike mote de o nyawa mageto manga dupa. ⁹ Ratu Wasti muna lo maaka o rarame mangale o bi ngopedeka makolano Ahasyweros awi kadatoka. ¹⁰ manga rarame ma wange tumudingika ma gena makalano awi sininga isanangi sababu o anggur waudo, una wasulo o Hehuman, Bizta, Harbona, Bigta, Abagta, Zetar de Karkas, ¹¹ ma ngale ongo Ratu Wasti mi ngaho la ma kolano wirisima de o kadato ma tuala wisingado, mangale isikelelo ami loha tomuna ami kawasaka, sababu muna ami jamani duruhe daloha. ¹² Duma ongo ratu wasti muna mamotewa ma kolano awisulo, ode awi nyawa o kadatoka yomomanara magena yosiadoka so una duruhe witoosa. ¹³ kagena de ma kolano wosano awi nyawa-nyawa icocawaroka, ode yasahe o adati de o galepu idodoma sababu komagena ma kolano awi biasa o nyawa icocawaroka yangodu ode o bobita de o pengadilan yananako, ¹⁴ de o bi nyawa ma kolanoka yototorifa ena gena: O Karsena, o Tarsis, o Meres, o Marsena, de o Memukan, o nyawa yalalago yatumudingi o Persiano de o Mediano magena, ka ka ona bato idadi ma kolano wirisima de ona lo o parati ikukuru yamake o kadatoka, ¹⁵ mote de o bobita, o kia bilasu yaaka de ongo ratu wasti, sababu muna mamotowa ma kolano awi sulo ode awi nyawa o kadatoka yomomanara yosingasu munaka" ¹⁶ Ma kolano awi simaka de awi nyawa yomomanara manga simaka, o Memukan wotemo," ongo Ratu Wasti ami salah gena ma kolano kawa, duma o bi nyawa yabilalagoka de awi kawasaka yogogoge ma kolano Ahasyweros Awi daeraka dangodu. ¹⁷ Sababu, ongo Ratu wasti ami goko de ami bane done o ngopedeka dangodu yanako de manga roka ya siceke de ona yotemo, ma kolano Ahasyweros wo golo ma ratu wasti ma hino, duma muna mo holu. ¹⁸ Wange manena, o nyawa yalalago manga pedeka o Persia de o Media yo iiseka ami goko de ami bane isingangasu o hali imatetero komagena ma kolano Awi nyawa yalalago yangoduka, de asa idala mi hina de mi siceke. ¹⁹ Nako so o hali manena ma kolano Awi sininga ya dahe, dohakala ma kolano wo sisupu o bobita de wo silefo o Persia de o Media manga undang-undang marabaka, mangale o hali magegena idadiwa ya piki kiaka ma Wasti yaaku kawa ma Kolano mo wi risima. Dohakala ma kolano wa hike o Ratu ma riho o ngopedeka ma somoaka ifoloi daloha mangale Muna. ²⁰ Ma orasi ma kolano awi bobita wa aakaka magena yosingangasu Awi pareta ma daera dangoduka, ngopedeka dangodu asa yahoromati manga roka ona, o nyawa yalalago ekolah o nyawa yaceceke. ²¹ Gogolo magena mote ma kolano de Awi nyawa yalalago manga mau sidago ma kolano waaka koloko o Memukan wo tetemo. ²² De,ma kolano o surati wo sidingo o tutuda o daeraka yangodu mote silelefoka de o bi bangsaka mote de manga bahasa masirete mangale yanau yangodu yodadi o rumah tangga masahe manga tahuka.