Hahe'po'a'nnu Me'tehe'-Me'tehe' Mangkedo (Kulre'hi') ¹ Su lrou papo'nane', pai mababa'lro'-mababa'lro' mangkedo (kulre'hi') naihompong su salra'nu tuma'-tu'hu'nu Mabuduata, ingene lragi mapada'-pada'nu mababa'lro'-mababa'lro' kulre'hi' naiho'mpongte su salra' ngkumu' su galre'-galre' i, si'de kasaba' mapatu'ntu'tenu kagagionu buni'-buni'a'n (ta'ya maha'dusu') agenu tatu'ntu'an kulre'hi' (tatu'ntu'a'n kadadosan), o'ngkamai mamapa'ha' su tatu'busa'nnu Mabu bua'nu dosa-dosa nsi'de palretene' makahuge'ge' sahi'o'ko parca'ya su pasi'i'nsau si'de. ² Bo, dongka pai nga'sa' toumata timu'hu'te su kagagionu mangi'dopo' su ti'ndalrennu kadadosan (ta'ya si moral), bo si'de ene'tenu makababo'boho' ti'ndalrennu kabanaran. ³ Yoka agenu atei gansoko' si'de manga'lra' u'ntung bua' ngkumu' su kagagionu mapaidaonu kakobo'a'n-kakobo'a'n nahe'me'nu kulre'hi'; ingenebo hahe'po'a'n si si'de kasaba' ta'yamai napi'lrasa' bua'nu papo'naken, bo kahuge'ge'a'nnu i'dopo' nsi'de kasaba' pandang-pandangken. ⁴ Yoka, adabo Mabuduata kasaba' ta'yamai nanotolro' sibi'Ne du'ngkulru'nu kinadadosa'nnu si'de toumatanu kalrutuanNe, kasaba' dongka mapamalre'ng si'de su hu'a'ngnu neraka bo mapahante nsi'de su hu'a'ngnu po'mpong madalrung malri' maidao su lrou pagagogutan su kasaduanen (Pagagogutannu Komalrigi' Mabi'da), ⁵ bo adabo Mabuduata lragi ta'yamai nanisilri' napahuge'ge'nu dunia po'naken su lrouni Nolru' kasaba' mababa'lro' insau agenu pi'tu' taha'na'ne, yoka napasupu'nu dalrukun lra'mo' napahuge'ge'nu dunia yoka toumata-toumata du'ngkulru'nu ene' nanindenante Mabuduata; ⁶ bo adabo Mabuduata napahe'po'tenu Banua Sodom bo Gomora agenu putungnu Brinstom bua'nu lrangi napahugege'nu Banua Dadua ene' nu'a'lri' abu, yoka mapakiselrei su toumata-toumata o'ngkamai apanu kalri'mu'a'n lraginu Mabu kasaba' dongka mu'a'lri' su toumata-toumata ha'nusu' nangi'dopo'nu dalrai (kadadosan) su galre'-galre' i su kasaduanen; ⁷ bo adabo Mabuduata kasaba' napasalra'mata'ni Lot, kasaba' toumata banar ene', mante nangi'dopo'nu masusa yoka nahadan bua'nu kalri'mu'nu toumata-toumata kasaba' ta'ya mati'ho'nu sanihi', ⁸ (kasaba' ta'ya nano', i Lot nangi'dopo' hunti'a'nu lrou su salra'nu si'de toumata dalrai, ingenebo himukudu' banarne kasaba' nasusa tangada' yoka nakabua bo nandi'ngihi'te maya kinakalri'mu'-kinakalri'mu' dalrainu toumata-toumata su ti'ku'ne;) ⁹ mante Mabuduata tanga'-tangada' mati'ho' apanu kalri'mu'a'nNe kasaba' mapamolro'so'nu toumata-toumata banar bua'nu "kasukaen" (papandang) bo mapahe'po'nu toumata-toumata dalrai su Gogutanu Komalrigi' Mabi'da su kasaduanen. ¹⁰ ha'nusu' si'de makakoa mapakikannu a'o' mbatangen su hu'a'ng sibi'nu kadadosan, bo si'de ta'yamai makahe'kennu pamarenta. Agenu ta'ya sipangampei bo mapanga'saha'nu a'o' mbatangen, me'tehe'-me'tehe' kulre'hi' ene' ta'ya mata'ku' mahahinu (manelrese') kumakaho'a'-kumakaho'a' tinanuman, ¹¹ mante si'de toumatanu kalrutuan ene', kasaba' mangka'u'ha' bo mangkangatasa' lrumembo si si'de, ta'yamai bahanei mami'hei a'a'donu bo'boho' (dolra') si si'de su hibanu Mabu. ¹² Me'tehe'-me'tehe' mangkedo (kulre'hi') iye' kasaba' o'ngkamai kumakaho'a' ta'ya si i'munne, si'de bina'ntehe' galre' hogo'n bo bunon; si'de nandolra' apanu ta'yamai kasalri'sigi' nsi'de, ingenebo si'de dongka pogo'a'n su hu'a'ngnu kahuge'ge'annu o'a' nsi'de; ¹³ si'de dongka kasampelrannu dadalrai kasaba' baba'e'he'nu kalri'mu' dalrai nsi'de. Si'de nangatei adabo si'de galre' tabe'-tabelron su lrou matene', ene' kasaba' lri'a'ga nsi'de. ¹⁴ Si'de kasaba' ipu bo dolra', yoka lru'mi'a'ganu kulre'hi' si'de sangkungnu kumu' kuma'n madinga'-di'ngan. Si'de pai mata tou nahe'me' agenu sinogounu zinah bo ta'ya ma'ngkede' mangalri'mu' dosa, si'de nama'ndang toumata-toumata kasaba' himu'kudu'ne malrotei, bo atei nsi'de nabi'asa'tenu i'dopo' manga'ngkang mayane'. Si'de kasaba' ana'-ana'nu binabo'boho' !. ¹⁵ Si'de nanindenante dalren matu'lridi' bo nantu'hu'te su dalren kanabo'n (cilaka), o'ngkamai dalrenni Bileam bin Beor, yoka masibi'nu manarima tata'nda'n su kalri'mu'nu dalrai. ¹⁶ Tou manen ingene, i sie' nakadea te'poho' matuhapa' bua'nu poni (kabalro' ko'talra') insau su ti'ndalrennu salri'bane, yoka kakobo'a'nnu poni ene' o'ngkamai pu'lrungnu toumata kasaba' napata'nga'ngnu kinakalri'mu' dalrai ni tou mababa'lro' lri'o'ng ene'. ¹⁷ Toumata-toumata iye' o'ngkamai kumbu'a'nnu ake mamada' bo o'ngkamai hibu' nihu'mpage'ntenu balrada'. Pompong malri' madalrung kasaba' pinasadiate si si'de. ¹⁸ Agenu bahi'ga' mapanga'saha', tou pampang, si'de nanbo'toso' toumata-toumata kasaba' napolro'so'te bua' nsi'de ha'nusu' masibi'kennu dadalrai bo makakoakennu mangi'dopo' su sinongounu lre'o'so' bo mahi'lri'o'ng agenu ba'lrine'. ¹⁹ Me'tehe'-me'tehe' kulre'hi' ene' napakodounu kalru'a'sen, mante su pasingkatau nsi'de naisu'ken su hu'a'tanu kapapatean. Yoka, apamainu kinaba'ta'ennu toumata, si sie' toumata ene' dongka nipahu'a'tane'. ²⁰ Yoka, adabo si'de naipolro'so'te bua'nu lromboinu dunia dalrai su ti'ndalrennu makakilra'lra' su Mabu bo si Tou Makasalra'mata' si kite, i Cristo Yesus, tou senebo si'de nabalri' kasau timu'hu' dunia dalrai ene' bo kina'i'ntounete, si'de kasaba' dongka mana'bo kasau mangkadalrai bua'nu kadadalraiain su po'nane'. ²¹ Bo'bodo'ne adabo si'de kasaba' ta'yamai nakakilra'lra'nu dalren kabanaran ene', manga'se' si'de nakakilra'lra'tenu dalren matulridi' ene' tou pa'lrusu'ne nahimbalrui bo nasalriba kasau. ²² Si'de kasaba' saheinu bahi'ga' si'ndigi' o'ngkamai: "Kapuna kima'n kasau sasukane' " bo "Babi manen nidenote na'u'hasa', galre'te mabei kasau su lrota ti'ntuna'ne".