Silri' bua'ni Simon Petrus ¹ Bua'ni Simon Petrus, a'i'ngka bo mababo'ka'ni Yesus Kristus, pinaidao su si'de kasaba' nakadeate parca'ya o'ngkamai kinadeate ngkami' su kagagionu kabanarannu (katulridannu) Mabuduata bo i Tou Makasalra'mata' Ngkite, i Cristo Yesus. ² Mante gilri'di' nabaya' bo dame natumpa' lrumaba' (nahe'me') si kumu' su hu'a'ng pangilra'lra'nnu Mabuduata bo i Yesus, Mabu ngkite. Kasaba' toumata pinokei bo pini'lre'nu Mabuduata. ³ Kaha'mata'Ne kasaba' i tou duata napamihei si kite maya apanu katana'nnu i'dopo' bo salra'mata'nu toumata, su kagagionu patiho'a'n si Sie' kasaba' i Tou namokeite si kite matondei su tinanuman bo kapapi'a'Ne. ⁴ Su ti'ndalrenne, i Sie' napasupu'nu kodou-kodouNe si kite kasaba' ingkalra'mo' bo malragada' palretene' agenu kodou-kodou ene' kumu' makade'a' ti'aha' su duataNe, bo mata'lrede' bua'nu kadada'lraian mu'a'lri' su dunia, yoka kinakalri'mu' su kagagionu sinongou (toumata). ⁵ Su pe'ntelre' ene', bote bo kite mati'ngkuha' agenu atei masa'da'-sa'da mapangi'banu parca'ya kumu' agenu mahimbihe'a'n, mahimbihe'a'n agenu mahinti'ho'an, ⁶ bo mahintiho'a'n agenu mahintotolrannu sinongou, mahintotolra'nnu sinongou agenu kasabaran, kasabaran agenu lro'a'dan (katulridan), ⁷ lro'a'dan agenu hinggilri'dannu singkatuhang, hinggilri'dannu singkatuhang agenu gilri'di' kasaba' ta'ya galre' makahe'kennu a'o' mbatangen. ⁸ Yoka, adabo mayane' iye' paite su a'o' ngkumu' bo humosou mangi'ba-ngi'ba, i'dopo' ngkumu' kasaba' pai katana'nne manga'se' su ti'mpalra'ne, i'dopo' ngkumu' ta'ya mapalro'a'ngnu bu'ane su kagagionu katiho'a'n kumu' su Mabu ngkite, i Cristo Yesus. ⁹ Tou manen ingene, su ha'nusu' toumata kasaba' ta'yaken nakadea mayane' ene', i sie' o'ngkamai toumata belrou bo buta yoka i sie' nakalrupate tou i sie' bino'koute bua'nu dosa-dosa su papo'nane'. ¹⁰ Yoka ingenebo, ha'nusu' tu'hangku, bote bo mangi'baken kumohoa' mapatanga'da tou kumu' tanga'-tangada' pinokeite bo pini'lre'te; yoka adabo kumu' mapakalri'mu'ne, kumu' kasaba' ta'ya mana'bo (mo'ndolro). ¹¹ Agenu ingene, haha'mpede' sasu'a'n su dompakonnu Mabu bo Makasalra'mata' si kite, i Cristo Yesus, kasaba' tumana' su mabi'ka' malra'mpada si kumu'. ¹² Yoka ingenebo, iya' masibi'nu mapata'hunu'ng si kumu' kagagionu mayane' ene', mante ene' katiho'a'nte bo binangonte ngkumu' agenu ta'ya kumiko su kabanaran kasaba' kinadeate ngkumu' su galre'-galre' i. ¹³ Sangkungnu iya' mangi'dopo'ken su hu'a'ngnu dunia iye', iya' mangatei mano'ndo si kumu' su ti'ndalrennu mapata'hunu'ng si kumu', ¹⁴ Yoka katiho'a'nku tou iya' dongka manulrau tampanu dunia iye' ta'ya mano' o'ngkamai pinakiselreitenu Mabu ngkite si sia', i Cristo Yesus. ¹⁵ Bo, iya' dongka mangi'ba su katati'ngkuha'nu a'o'ku mapata'hunu'ngnu mayane' si kumu', su pa'lrusu'nu manindenan si kumu'. Sahi'dinu Mata su Tinanumanni Cristo (Kristus). ¹⁶ Yoka kami ta'ya timu'hu' su o'ngkamai solri'nu bahi'ga' hanga'-hanga'n kasaba' kulre'hi'nu toumata sangkungnu kami mapakiselreinu kaha'mata' bo ka'a'kon naonu Mabu kite, i Cristo Yesus, yoka tanga'-tangada' kami kasaba' sahi'di-sahi'di'nu mata su kagagionu tinanumanNe. ¹⁷ Yoka sadanu i Yesus nakadeate silri' bo tinanuman bua'nu Mabuduata i Yama, kasaba' o'ngkamai pinaba'hi'ga' ni Tou Tinanuman si Sie' kasaba': Iye'tenu Ana'Ku Kagilri'di'Ku, si Sie'tenu IYA' makahe'ken", ¹⁸ Manen kami' nakadi'ngihi'ken talrangnu pu'lrung (kakoboan) ene' si nao bua'nu dompakon sangkungnu kami nahaha'ge'ken ageNe su bu'kidi'nu lro'a'da. ¹⁹ Kami lragi kinatingkuha'e'n agenu bahi'ga' baba'lro', palretene' ene' mu'a'lri' salri'siga'n kumu' agenu dalri'ka, o'ngkamai mapakiselreinu solro' (soga) suma'hansa'ng su tampa malri', maidao su kasupu'a'nnu mahimalrou bo kalrotoannu malrampitei mahimalrou su hu'a'ngnu atei kumu'. ²⁰ Tou mante ingene, apanu sa'humpu'n galre'te salrisigan kumu' kasaba' ta'ya si insaumainu baba'lro' su hu'a'ngnu Kaolro' Lro'a'da sinao bua'nu i'munnu toumata singkatau, ²¹ Yoka ta'ya siinsaunumai bua'nu baba'lro' kasaba' naitumpa bua'nu sibi'nu toumata; yoka su ti'mpalra'ne, toumata-toumata nabahi'ga' su he'ken adennu Mabuduata bo kadingannu MaindotoNe.