ROH BA LAHATALA ABUNG HOA ¹ kaku naung, na etabit nomi metma iijahi, Roh toang eu, ebele roh emampi angu iini ekang iiomi metma venganamang ekang. Arunge roh angu naung iini malekang eauling aung- aung senge iini ateing hula, ing angu Lahatala abung hoa e niang. se angse neheba sukat Lahatala Aing lavang angu naung toang por alolang ang taang hoa iila angu ebele. ² Roh ba Lahatala abung hoa angu iini ateingse alang; kalo roh ang naung iini mangakut vengbanang hula Yesus Kristus angu ana avaaboit emenghula manusia edadenang bot poralolang anga taang hoa iila, se roh angu Lahatala abung hoa. ³ Roh ba bae Yesus kristus angu Aing mangakut vengbanang aulang niang angu, bae Lahatala abung lahatala abung hoa niang. Roh aulang angu ba Yesus Kristus Aing lavang angu. iini vengmee se hula ening iini hoa. aarunge angase iini ae poralolang anga taang iila. ⁴ Noal naung, ing angu iini Lahatala omimi abeta tila, bot ekavasa angu ue iiomimi . Angu ebele neheba Lahatala Aing lavang angu naung iini ing ening iora vengholang iila. Se Lahatala ERoh mba ue ingveng angu lebe mielet roh ba ae poralolang taang angu iini ataang oa angu ebele. ⁵ Neheba sukat Lahatala Aing Lavanng ang naung ing angu por alolang ekuat eadiri anguba omimi aabeta. Angu ebele, iini mateng se poralolang eomi ajasi angu ba eamulung, base por alolang e nehe ang naung iini sukat ingveng hela. ⁶ Ping anga Lahatala omimi aabeta.Neheba iomi metma Lahatala Aing venganamang ang naung iini pingvenghele , arunge neheba bae Lahatala omimi aabeta niang angu naung iini bae ping venghele niang. Aulange base pi bisa ateing hula a taang ba Roh molo una angu, bot etaang ba roh sukat nehe ening bir veng ahala angu. MAHE PI TOMI METMA TEJAHI ⁷ kaku naung, na etatabit na nomi metma iijashi. Mahe pi aabetat tomi metma tejahi, se tomi tejahi angu Lahatala abung hoa angu ebele. Bot nehe bae iomi iini aabeta bot iini Lahatala angu ateing. ⁸ Nehebaa bae iomi metma nehe ejahi niang ang naung iini bae Lahatala angu ateing niang, Se Lahatala angu Ana omi metma nehe ejahi engu ebele. ⁹ Lahatala Ana omi metma nehe ejahi angu Ana metma piha hama mi atubing iila angu alang; Lahatala Ana oal nu kakolang angu aing gahing poralolang anga taang hoa senge viaukat metma mapinang. Aulang senghe , pi bisa at aabetat ejajehing. ¹⁰ Anga omimi angu ba Lahatala Ana omi metma pijahiangu; Ual hula ping ba tomi metma Lahatala ejahi,arunge Lahatala omi metma pijahi angu ebele Ana oal nu kakolang angu Aing panatut hoa metma sadaka ening senge ping metma Lahatala At toang aaung.bot ping ening iohit metma piahalang piavali ang naung eahalang. ¹¹ Kaku naung ba na nomi iijahi, kalo Lahatala Ana omi metma pijahit aulang iila se , Ping di malekang aabetat tomi metma tejahi. ¹² Nehe iiba bae uuling Lahatala angu ieng taang ateing jedung. Arunge kalo pi aabetat bot omi ba Ana metma pijahi angu Ana ening akanap piabetang omimi. ¹³ Na anga omimi ang ba pi ateing hula ue Lahatala omimi aabetat tila bot Lahatala Ana ping iini aabeta tila, se Lahatala Ana ERoh hamulang angu metma mapinang iila angu ebele. ¹⁴ Bot, ni uling nieng taang ateing iila angu ebele ning metma esaksi ening vengmaring hula, Timang Lahatala Ana oal angu Aing gahing Aing metma poralolang anga eaabetang e eela ening iila. ¹⁵ Nehe emampi ba mangakut vengbanang hula Yesus angu Lahatala Oal se, Lahatala Ana ue aing mi aabete bot andi Lahatala omimi aabeta. ¹⁶ Base, Lahatala omi pijahi ba Aing veng Ana metma Piadana pi ateing iila bot pi tomi metma venganamang iila. ¹⁷ Anga ba, Lahatala Ana omi metma pijahi angu akanap metma piaabetang omimi angu. Base por burang evengtahi Lahatala Ana ue nehe emampi eaabetang. Angu vengparisa se, ping di baranit Lahatala apangadang mi tahi. Se ping ae poralolang taang anga di, eningse ping di aabetat emenghula Yesus Kristus ededenang angu ebele. ¹⁸ Tomi metma tejahi angu tuangmari bae ue omimi niang. Tomi metma tejahi ba emolo angu eningse tuang mari angu aterit metma pi ola. Se tuangmari angu eningse sampe hukung evia mitahi angu ebele. Nehe ba Uang mari angu, omi metma nehe ejahi angu bae molo jedung. ¹⁹ Pi tomi metma nehe ejahi, se Lahatala ematurat omi metma pijahi tila angu ebele. ²⁰ Kalo nehe iiba mateng hula," Na nomi metma Lahatala Ejahi", arunge ana omi metma ekaku eserang angu ealalil se, nehe angu Ana Lahatala Ajajala tila. Se nehe be bae omi metma ekaku eserang ba nan auling entaang ateing angu ejahi niang angu tatalang ateing niang angu ejahi. ²¹ Bot, parenta anga pi Lahatala abung tarima tila; Nehe emampi ba omi metma Lahatala Ejahi angu, iini malekang iomi metma ikaku- iserang ang naung ijahi.