YESUS ANGBA PI HAMA VALA ¹ Noal naung , na anga naung ba hurak metma mainang anghe iini ekang jasi ahala angu eni ekang. arunge iba have ue jasi ahala angu ening, ping anga pi hama vala ue Timang apang adang mi , benang ba Kristus Yesus ba molo angu. ² Aing angu ba metma ping sai ping vai ae pi ahalang omi anga mi. bot bae pinang kolang pi ahalang niang ee ping ba ae por alolang taang anga pi ahalang. ³ Angu ebele pi hula pi Lahatala angu ateing, angse pi Lahatala e parenta nagu ea mulung. ⁴ Nehe ba veng banang hula naing anga Lahatala ateing, arunge bae Lahatala e parenta angu ea mulung niang, ang veng banang hula akal kabule enehe bot aung hama angu bae ing veng niang. ⁵ Aulang arunge, nubaba bae Lahatala E hur hamulang angu ea mulung angse Lahatala E aung E hama E molo e una angu ue idiri iava bahi omi angu mi. anghe pi ateing se hula pi ue omi angu mi. ⁶ Nehe ba veng banang hula aing angu Lahatala omimi abeta, aing angu ba abeta emeng hula Yesus angu ede denang. TOMI MET TEJAJAHI BOT VENGKARAJANG LAHATALA EJALING OMIMI. ⁷ Ne kaku ne serang ba , na nomi met ijahi bae parenta hi ba hurak mainang niang, senghe parenta e vemang ba iini tura medi tila hue e va ila angu mi. ⁸ Arunge na ae parenta hiba angu hurak met mainang, aing anguba aung ue omimi bot ue iabung angu mi arunge kua kete ba ue ve ila angu bot jara ba ue eva ila angu ae ingveng huring. ⁹ Neheba vengbanang hula ana ue jara mi arunge ana ue omi metma e kaku e serang omi met ealil sehi angse ana jedung ue kua kete omi ming ae anga vengjehi. ¹⁰ Neheba omi metma e kaku e serang ejahi ue jara omimi bot nanu ot aing ening va ila bir vengahala niang. ¹¹ Aulang arunge ing ba iomi metma ia kaku i serang ealil angse iini ue kua kete angu ba mi lamal, iini bae ateing hula iini ue tatalang adang ila arunge kua kete angba ening ieng ot kete. ¹² Nana anga hurak metma mainang, ing ba nimang iimal naung, arunge ijasi i ahalang angu ana veng ampong ila atabit ue Lahatala omimi. ¹³ Nana anga hurat metma mainang, ing ba nimang iimal naung iini turang mi ateing ue eva ila angu mi na hurak metma mainang, ing ba kuar e kaneng arunge iini nehe jasi angu atobang ahibul ila. nana anga hurak metma mainang ing ba kakaneing naung, arunge iing ba Timang Lahatala ateing ila angu. ¹⁴ Nana anga hurat metma mainang, ing ba nimang iimal naung, arunge ing ba ateing ila angu ue va ila angu mi. na hurak metma mainang ing ba kuar e kaneing naung, arunge ing angu daeri, bot Lahatala E hur hamulang angu ue iomimi, bot nehe jasi angu iini atobang ahibul ila. ¹⁵ Poralolang anga ba iomi mi dadanang ekang, bot naba nababa ae poralolang anga tang. senghe nehe nehe ba poralolang anga iomimi dadanang, Lahatala omi pijahi angu bae ue niang. ¹⁶ Arunge emempi bae poralolang tang, angba iomi veng ravak, teng met euling muse tomimi dadanang, bot iava osi atela ue abetang angmi ang bae lahatala abung mi hoa niang arunge poralolang mi hoa. ¹⁷ Poralolang anga bot etama e tenge angu minu mise ue niang, arunge neheba Lahatang angu ea mulung kilang abetat ejehing emeang. NEHEBA KRISTUS AING LAVANG ANGU EAMULUNG ¹⁸ Noal naung, anga se jamang eveng tahi mi ; bot emenghula neheba vengmee se hula neheba Kristus Aing lavang angu ue hoa, senghe nehe Kristus Aing lavang angu toang ae hoa. Angu ebele pi ateing se hula angase jamang e veng tahi mi. ¹⁹ Iini hoa angu pi hahama mi hoa, arunge ing angu bae pi oang mi hoa niang. ²⁰ Aulang arunge, na ba iini medi tila angu ue hamulang angu mi hoa, bot emampi angu iini ateing. ²¹ Nana anga hurak metma mainang ual hula iini bae naung angu ateing niang, aulang arunge iini ateing bot akal kabule angu bae ue aung angu mi hoa niang. ²² Nubaba iiat akal angu have aing angu ba akal hula Yesus angu ba Sang Kristus ? aing angu ba nehe Kristus aing lavang angu, neheba iiat akal hula aing angu Timang Lahatala bot Lahatala oal. ²³ Nubaba Lahatala Oal atakal angu ana bae ue Timang Lahatala abung angu mi niang. aulang arunge, nehena mangakut hula aing angu Lahatala oal, aing angu di ue Timang Lahatala omi angu mi. ²⁴ Kandati nababa iini ue vengmet evaila angu kilang ue omi angu mi bot nababa iini ue vengmet evaila angu kilang ue iomi angu mi, ing angu di kilang ue Lahatala Oal omi angu mi bot Timang Lahatala omimi. ²⁵ Bot anga ba epalai ana metma ma pinang, Aing anguna abetang ejajehing angu. ²⁶ Nababa na hurak met mainang angu eveng hamua angu ing ba hula taatva bir veng ahala. ²⁷ Arunge, naba iini medi tila angu vengkilang ana ue iomi mi, bot iini eke nehe abeung iot ing ajar e iavomung ekang, aulang arunge nababa ana metma mainang ila angu metma ing ajar e iavomung taangmi na angu bot na angu ba vengbanang hula molo, Ual hula akal kabule anga ba ama metma piavomung piapahang ila, kilang ue iomimi. ²⁸ Angase , noal naung kilang angu mi mihi anghe ana avamatuving, pi tomi veng anamang angu e bot tava bae aloring niang ue ehoa ema omi angu mi. ²⁹ Iini have teing se hula aing angu ba aung, ing di ateing se hula nehe ba aung angu veng karajang, aung angu Abung mi oa.