¹ Nako nai paulus, le in jali haefen ka natuin fa mansian ai an boni mansian, mes an boni Kristus Yesus ma Amaf Us Nenog le na fena in nako at nana atoni amates. ² Ma, nako au bia apalsait le na bua nok kau, noi tog aslanit anbi Galatia. ³ At'hoes ma tetus aomina noi ki nako Amaf Us Nenog ma Usif Yesus Kristus, ⁴ Le an fenis in aon nan noi hit sanat-sanat he nafetin kit nako maufinug anbi batan i an matom nok lomit Us Nenog ma hit Ama. ⁵ Lo ala In taliatas talan te nabal-bal. Amin. ⁶ Au malel, lab leuf kun hi misaitan In, le no'en ko an boni at'hoes Kristus, ma noe banjon noi beno alekot le bian. ⁷ Anbi nan, kan mu'i fa beno alekot bian. Mes, an mu'i tuaf fauk-fauk le hen naleun ki ma an lomi he namoe beno alekot Kristus. ⁸ On'nan, kalu hai ai ahake nenog tunan na beno noi ko beno alekot le kan matom fa nok sa le hai mi beno noi ko, in masukat! ⁹ On le haim tonam laljel ka fe ma anbi lekug ij au tona tein kij, kalu an mu'i tuaf le naton noi ko beno alekot le kan matom fa nok sa le haim simom laljel, maut in masukat. ¹⁰ On mel nako ij au he etu oe lomit mansian ai he lomit Amaf Us Nenog? Ai, on mel au fe he sobal he lomi oe mansian? Kalu on nan au fe he sobal he u tuin lomit mansian, nane au ka atel Kristus. ¹¹ Bia benu, au lomi he hit mihin beno alekot le au fekij kanakofa beno mo'et mansian. ¹² Au ka simo fa nako mansian, ai au unoni nako mansian, mes au simog an boni fef belak nako Kristus Yesus. ¹³ Mes, hi lofa am nen an tom aum nekit au monik molof nako agama Yahudi, au uleun tog aknino Us Nenog nok bulalug ma etu lalan he uk lati nis sin. ¹⁴ Au nao mat le'le anbi lasij agama Yahudi, au nao mat an'esi nako tuaf-tuaf nam nes anbi au sukug. Au makoe anbi lasij painotes halat au bab fen. ¹⁵ Mes, Amaf Us Nenog, in es an beti kau nako au inaf in apun nanan ma lofa no'en kau an boni In at'hoen, an matom ¹⁶ naton Anah Nan anbi au henat au u ton In mepug anbi tuaf-tuaf le ka nonot Yahudi fa, au ka totifa fainekat nako sekogem sa. ¹⁷ Aum sa ka nao fa oe kot Yerusalem he eku oksin le sin jalin mafefa aknino nako fe au ka bin, mes au nao lab oe balel Arab ma au fani ten oe kot Damaskus. ¹⁸ Ton tenun ten, au nao oe kot Yerusalem he manhinen ok nai Kefas ma au ubua okan leka nenog boesam nim. ¹⁹ Onane, au ka itaf es nako mafef en bian, kalu nai Yakobus, bia Us Nenog. ²⁰ Au u ki'ab ki an bi Us Nenog in matan natuin sa le au lul noiko ij ka moel fa. ²¹ Nako nan, au nao oe balel siria ma Kilikia. ²² Au kafe nahine kau fe on ameput nako tog aslanit anbi Kristus le anbi balel Yudea. ²³ Sin alafe'es anen, "In, nahunhun a bulalut noe kit, nako in tonas amnekit ahunut in an sobal ki nak lati nisan." ²⁴ Sin an pules Us Nenog natuin au.