PAULUS SURA' TAHOW
ROMA HINUNG EN
ASEL MATE
O' MI ERNU FALING
TALANG
1
Pi u' ding ob Febe, na a' lorang ien, fede' sari hodi jumaat ubaleta ei name nu tong Kengkrea mi.
2
Lahtal om mi itang e' pep a' ri med mang fede' name om bolang ernu honi, med na ernu ba maa sa ibung med fe ho, i eita amotmi, fede' sa name tofang ukarang na ernu md en am, med nari hoo di sa na ernu nen am.
3
No ada mahen hoo, fisam u Priskila med Akwila a' ra mateng, fede' supi hodi tenang el bar Kristus Yesus Om mi nara karesang nu panen,
4
supi so a' eng hodi a' lorang med no fetang ho e' re eng am. Supi ei a' ra ham ho, na e' nolo mahen no' bit nene sobo, jumaat ba Yahudi nene hodi sobarpi.
5
No ada mahen hoodi, i fisam jumaat o' bang mi u supi a' ra mateng. Ada mahen fisam Epenetus ba na nona ukarang hodi u a' ra mateng, sari horo name a' ai nang mong Asia mi Kristus med u sei a' no' ho.
6
Ada mahen hoo fisam u Maria di a' mateng, sari hodi a' titino' karesang med ie re eng.
7
Andronikus med Yunias hadi ada mahen fisam u supi a' ra mateng, supiho no di ail bar nara bangnu, no' hee no nameba nara tahang om mi hodi sobarpi, supi hodi rasul hinung a' nai homi name supi a' hol, supi ho na dai eh honi hee, supi mi sotur a' ra Kristus Om mi.
8
Ampliatus ba na Tuhan Om mi nona ukarang hodi, ada mahen fisan u a' ra mateng.
9
Urbanus hodi ada mahen fisam u a' ra mateng,saridi pi tenang el tara karesang nu Kristus Om mi, med Stakhis ba na ukarang hodi.
10
Ada mahen fisam u Apeles di a' ra mateng, fede' pi ta ahol, sa Kristus Om mi ernu turlo ba ma a' ra ham ho, sa utahang toh.
No ada mahen hoo, fisam Aristobulus med o' bang om sobarpi a' ra mateng.
11
No ada mahen hoo fisam Herodion di ail nara bang nu hodi u a' ra mateng. Ada mahen fisam Narkisus a' ra Lahtal Om mi hodi u a' ra mateng.
12
No ada mahen hoo fisam u Trifena med Trifosa hodi a' ra mateng, fede' supi hodi Lahtal Om mi somin sofetang. Med Persis ba na ukarang hodi a' ra mateng, fede' sari di Lahtal Om mi karesang a' titino'.
13
Rufus hodi ada mahen fisam u a' ra mateng, fede' sari ho Lahtal Om mi utara',me o'fo hodi fede' o'fo ho nari di nife.
14
Ada mahe fisam Asinkritus,Flegon,Hermens, Patrobas, Hermas med di ail bar ba ham ham supi a' ra ho, u supi a' ra mateng.
15
Ada mahen fisam Filogus, med Yulia, Nereus, med o' di ail ob ho, Olimpas med name bolang ernu ba supi a' ra ho, u supi a' ra mateng.
16
A' muning bolang puin ada mahen ho a' r fa nu en a' ra ma nu en. Kristus O' jumaat barpi ada mahen tahoe ien.
17
Fed hoo na idodo di ail bar, Supi ba a' bit a' lil o' name, se a' hal lol o' name ho, i u bu' ang, no' hee name ba na'hol i med am ho supi a' la hain toh ho,i e' let e' lihing.
18
Fede, name o' honi ho, pi Tuhan Yesus Kristus ho supi e' ubaleta nene, honi sobo, supi sei som uma horo ubaleta, supi mateng bala amone mad mateng a' foh a' tel horo puin name ba nameno' om tep sah a' ra kalufe.
19
Fede, i a' lol a' ta ain ho, nameno' barpi a' hol am, horofe na bad herang fede' iri. Honi sobo, nei nom ho i taro' panen med na o' no', med nasah ernu ubolang ho a' ra ham.
20
Lahtal tining talaj no' ham o' asel ho, hano' ang setang ho a' butung med e' fa sel mimeng. Pi Tuhan Yesus o' tofang lu ung a' ra ira tohuil sei masing.
21
Timotius,no tenang el nara karesang nu om mi ho, ada mahen tahow ien, med Lukius, Yason, me Sosipater, di ail bar nara bang nu hodi ada mahen tahow ien.
22
Nari Tertius, nari so sura' hoo hul, Lahtal Om mi na ada mahen tahow med ien.
23
Gayus, sari horo nari ukarang, med jumaat sobarpi ada mahen tahow med ien. Erastus, sari ho bang mate o' na taro' ei, med Kwartus pi di ail, supi ada mahen tahow med ien.
24
( Pi Tuhan Yesus Kristus O' tofang lu ung ira tohuil sobarpi! A' titino')
25
Sari horo ino' kufa' no' Sura' Habar habar Yesus Kristus ei a' raham, na fit ho' umateng med na tafuning a' no' lel ho a' ta ain sari hoo tafuning tapai
o' lufang zamang rat mi rat am ho e' re eng,
26
sobo fed hoo, nabi tofang o' sura' mi ho a' no' lel am, sari ho Lahtal O' parenta so em ba umateng med bang ernu emaring, honie e' puin a' tang puin,
fa udume med a' lol a' ta ain lefa horo a' ta ain.
27
med Lahtal pir nu ba na'hol dil ma eh, om po' at petang afeng Kristus Yesus a' lai horo fe, lel madal em sam so em ho a' meng!
A' titino'