PAULUS SURA' TAHOW ROMA HINUNG EN ASEL MATE O' ERNU FALING IFI HING

1 Honife, piri ba kufa' am ho, name o' kufa' dai ho eita, sobo haai pi bo' mate horo solo ano' no' nene. 2 Tanai homi name sari' an so beng bar a' no' loil asal med no' ham e' re eng, honi puin laman ei ho a' foh a' tel. 3 Fede, Kristus e' So bo' solo a' no' sanang nene sobo, mang fede' hul ol meng honi, "Supi o' mateng pa' Ebit Eng el ho, nara ham nahol dang am. 4 Fede, nabafe turmi hul am, hooro hul puin tano' na'hol honie, dume toh med loil asal ba Sura' Bolang med ten am homi, piridi udume mate med utei a' no'. 5 Pi udume, Lahtal buj no' pa' bala, loil asal bad herang o' asel, Sa tofang lu ung med ien, honie i puin fetang iom a' no' nu, fa nu a' ra ham ma nu a' ra ham, Yesus Kristus Ei honi, 6 honie sa iom nu imang der sara ham puin Pimang Lahtal med pi Tuhan Yesus Kristus A'ni utarain a' foh a' tel. 7 Honife,itang iepep fa nu a' ra han ma nu a' ra ham,mang fede' Kristus Satang te pep meng honi, puin Lahtal a'ni utarain. 8 Na ira mateng,sariho Kristus Sa Yahudi hinung ba o' a' tino' bit am ho Sa ubaleta, asel Lahtal ei a' bul sari hoo puin Lahtal O' paha' ba med pi bap bale en am ho a' no' dume, 9 med bang ernu ba e' Yahudi nene hodi, honie supi Lahtal utarain, asel Lahtal O' ukarang fa supi a' ra ham. Mang fede' hul ol meng honi, "Honife, bang pali' ba e' Yahudi nene o' a' nai homi na Ani u tarain; med na dal orang o' pa' puin dal orang med Ani ho e' re eng. Mazmur 18 : 50 10 No' sa foil ubang, "Hoi,bang ernu pali' ernu, i Lahtal O' serang tofang a' ra honie bad herang! 11 Hoi, bang ernu, i Lahtal A'ni u tarain! Sei honie, sa Lahtal O' serang so barpi A'ni u tarain. 12 Med Yesaya foil ubang, "Sel numi Isai o' fol o' heb femi ho' med Sa sahir toh bang ernu parenta, med Sari femi, bang ernu pali' ernu udume. 13 Lahtal pi tom puin udume, Sari horofe udume o' asel mate, Sa iudume homi loil asal bad herang ien so mi an honie, Roh Bolang o' kufa' puin i a' danang eh ho med somi a' lihing. PAULUS NAME YAHUDI NENE U BALETA 14 No di ail bar, iei ira ham ho na o' a' tino' a' hol sariho, na o' no' so a' ra irimi, na' hol dil ma eh a' ra irimi afeng, no' hee ibobom ifom ipahang no'. 15 Honi sobo, na ba ang den ei a' raham na e' baroc nene puin sura' hul med ien am honie, ihow foil uma, fede' Lahtal karesang med nen, 16 nano' Yesus Kristus o' name baleta, med bang ernu Yahudi nene ho e' re eng, nano' imam med Lahtal O' Sura' Habar e' re eng honie, bang ernu Yahudi nene ho, sano' nano' med Lahtal a' raham, sariho Roh Bolang a' no' bolang honi sa Lahtal om a' ra ham. 17 Horo ei soba, Yesus Kristus om mi napano' med nabafe na panen Lahtal a' ra ham ho e' re eng. 18 Fede, nabeng nu ei a' ra ham na umateng hono hee na baroc, sei lal ho Kristus u nahow am horo, puin bang ernu Yahudi nene ho a' how a' lol a' ta ain,sariho mateng a'mi med panen a' ten mi, 19 na u tahoir ernu o' kufa', med Roh ei kufa' fe lol horofe, Yerusalem bang med efading homi sam mong Ilirikum ho mimeng ho, na Kristus O' Sura' Habar ho umateng sam a' her am. 20 Na ukufa' toh, honie Sura' habar ho taro femi Kristus name a' pong a' hol dai honi hee, na homi umateng honie, pilang ba name beng med meng am ho, na haai foil med pilang horo ta a' tuhuin e'. 21 Mang fede' a'ra hul ol meng "Supi ba sari Ai ho o' mateng pa' med dai ho dun a' hol, med supi ba e' ma eh dai ho o' lel a' hol. PAULUS OM SAM ROMA PALI' E' DUN UMA 22 Horo ei soba, na sam iedun faleng hee' na ernu nari mi hi' sei masing. 23 Honi sobo fed hoo, pali' hoo miho, eleme a' ai am fede' na ho' iedun feho, o' tun sari tiling lufang am, 24 horo na sam Spanyol leam a' ra ham ho, nom homi eir med na iholfe, honie i neita sam hemo leam, sobo o a' ai nang ho, na ira ham ham loil asal pite'. 25 Honi sobo fed hoo, na sam Yerusalem pali' leam, honie name om bolang tofang na ubaleta fe, 26 fede' Makedonia med Akhaya sapano' puin name sah lahal ukarang name om bolang ernu ba a' ra Yerusalem mieh o' a' nai homi. 27 Supi som sanang sapano' puin naho panen fede, sari naho supi ei karesang asel. Honife mang fede bang ernu ba Yahudi nene ho, supi na ernu ba laman ei, a' ra Yahudi hinung a' bung ho med am honi hee, supidi u'il u'il Yahudi hinung ei oh a' ai fa bo' mate a' ra ham ho, supi ubaleta. 28 Honife, na no karesang hoo panen no', med o'hir o' pa' ho a' no' dume med supi en no' am honi hee, na ipali' lol sam Spanyol leam. 29 Na a' hol, sariho na sam iedun honi hee, na Kristus o' tofang luung afeng afeng fit ho'. 30 Fed hoo, na ibang di ail bar,pi Tuhan Yesus Kristus med Roh o' ukarang om mi honie, i nara ham ham a'ome Lahtal en med ne re eng, 31 honie name a' lol a' ta ain nene ba a' ra Yudea mi o' a' nai homi, name nad natain honie no karesang med Yerusalem e' re eng ho, name bolang ernu om tamuj. 32 Honie, sa Lahtal ei i'nung fe a' ta ain, na loil asal puin iolap ho' no' honie, na inai homi foil na o' habar med. 33 Pi udume honie, sa Lahtal O' tining talaj med O' no' O' ham ira tohuil so barpi. A' titino'.