¹ Mi a'ainang Fom pa', Fom pa' ho Lahtal a'ra tohuil, med sari Fompa' horor fe Lahtal. ² Sari fom pa' ho mong a' ainang ta honi hee Lahtal a' ra ham ham a' ra am. ³ Lelang ernu a' ten a' home sari horo a' lai. Mang fede' Sari a' ai hee, lelang ernu hodi e' a' ra nene. ⁴ Fetang a' ra sari Ai homi, med sari fetang horo nameno' O' Lel. ⁵ Sari Lel ho mong paka om mi lel, med paka sari lel ho uaneng sah eme e'mota sah. ⁶ Lahtal namenu tahow, sari aiho ani Yohanis. ⁷ Sa ho' sano' name ta'hol ta ma eh, sa lel ho umateng honie, sari aiho mi name tofang o' a' tino' ubang. ⁸ Yohanis hoo, e' Lel ho nene, sobo sa ho' honie sa Lel ho umateng ei. ⁹ Lel so em ba nameno' tofang ulel eiho, ho' pali' mate taho' eham. ¹⁰ Lel ho a' ra pali' mate hoo ta am, med pali' mate hoo Sariso a' ten a' home, honi sobo pali' mate e' a'pong a' hol nene. ¹¹ Sa Sei nafe o'lap ho', sobo na O' Na ho e' satang E'pep A' ri med nene. ¹² Sobo, nameba satang E' pep A' ri medho, Sa kufa' en a' no' Lahtal O' Aibar, sariho nameba Aiho a'ni o' a' tino' bit. ¹³ Supi a' fain ho, e' foi eme, bo'mate eme, lote bar ei omfe lol ho' nene sobo, Lahtal Ei Om fe lol ho'. ¹⁴ Fom pa' ho sano' hir honie a' ra tanai homi mih mitar eh. Pi O'Lel O' madal ho dun a' hol am, sariho O'mang O' Ai pirnu o' lel madal, no' ham med na o' a' bul so afeng. ¹⁵ Yohanis sari Ai hoo ei a' raham sa umateng, sa ulofe ubang ho, "Sari Ai hoo ro ba na bit eh, na ubang ho, Nari no' hee, Aiba mi sotur a'raho foil ho' fede' na e' a'ra dai hee, Sa sotur a' ra". ¹⁶ Ei afeng a' lihing homi, pi barpi no' ham tofang luung md. ¹⁷ Fede, Taurat o' hukung medho; Musa a' lai, sobo no' ham med na o' a'bulho, Yesus Kristus femi ho'. ¹⁸ Name pinudi e' dun Lahtal a' hol dai, sobo Lahtal O' Ai pirnu a' ra tong a' pot ta horo ubang. YOHANIS NAME A' FOIL E'IHO, SA MATENG LURUNG ¹⁹ Sel numi Yahudi hinung supi imam hinung, med Lewi o' name tong Yerusalem miho, a' how ho' Yohanis a' tan ubang ho, "Ariho ano so?" horo Yohanis supi a' ra mateng ubangho; ²⁰ Yohanis e' kalufe nene, sa ubangho,"Nari hoo e' Kristus ho nene." ²¹ Supi a' tan,"Honi hee ariho ano? Ari horo Elia?" Sa ubangho,"Nari e' Elia nene." "Ari horo sari Nabi ho?" "Sa ubang ho, A'ai" ²² No' hee, supi a' ra mateng,"Ari hoo ano, fede' ni o' a' bor fisam name nihow ho' a' ra nateng feho? Honife ari ano soba ho?" ²³ Yohanis sa Yesaya o' mateng fe puin supi ei a'bor ubang ho, "Nari horo name a' mang pa' ba Nabi Yesaya umateng eh, mong men ham la ham mi lofe id eh, "Se' bur a' no' mulang med Lahtal e' re eng!" ²⁴ Yahudi hinung ba name tahow ho Farisi o' name. ²⁵ No' supi Yohanis a' ramateng ubang,"Mang fede' ari hoo e' Mesias nene, e' Elia nene, med e' Nabi ho nene honi hee, naba eife a name a' foil?" ²⁶ Yohanis o' a'bor ubangho, "Na sei puin name a' foil, sobo Name nu a' ra inai homi tufeh i a' hol nene. ²⁷ Nari hoo no' hee, sari Aiho foil ho'. O' sapatu hei horo a' fetang di, na panen sah. ²⁸ Na hoo barpi mong Betania femi a' ra, mong Yordan molden Yohanis mi name a' foil homi. LAHTAL O' NUB AI ²⁹ Mi dilel Yohanis dun hee,Yesus ho' o'lap horo Yohanis ubang, "E' dun, Lahtal O' Nub Aiba, pali' mate o' doc luh few horo ba ho! ³⁰ Sari Ai horo ba na ubang ho, Nari no' hee, Ainu so mimate nemota foil ho' fede' na a' ra dai hee Sa sotur a' ra am. ³¹ Turmi Aiho na a' pong a' hol nene, sobo honie Sari Aiho a' no' lel med Israel hinung en fe horoba, na ho' sei puin name a' foil. ³² Med, Yohanis umateng ubang ho, Na dun hee Roh tong burang tahel mang fede' u'lo honi, med Roh ho hel Arita somieh. ³³ Naridi a' pong a' hol nene sobo, Aiba nari tahow ho' sei puin name a' foil horo nara mateng ubang ho, Aiba a' e' dun honi hee Roh hel Ari tamih, Sari horofe Roh puin name a' foil. ³⁴ Nari ho' oro dun a' hol med na umateng, Sari horo Lahtal Ai. YESUS O' SAKOLA A'IBAR AA'INANG ³⁵ Mi dilel Yohanis so sakola pir alo a' ra tufeh hee, ³⁶ sa dun hee Yesus di homi lame eh. Yohanis ubangho," Lahtal O' Nub Ai ho e' dun". ³⁷ Yohanis o' sakola pir alo mateng ho ma eh horo hee, supi Yesus a' ta ain. ³⁸ Yesus sadimang samot midun hee, supi a' ta ain eh, horo Sa supi a' ra mateng, I nabafe lap? Supi a' ra mateng ubang, Rabi (o' lel hee Guru), A taro femi mih mitar eh? ³⁹ Sa supi a' ra mateng, I ma honie e' dun. Horo, supi ma E' leme ho e' dun, no' hee supi A'ra ham ham homi, fede' sel ho a' ra ham maa od tow fed hel. ⁴⁰ Sakola pir alo a'nai homi pirnu ba, Yohanis o' mateng pa' ma eh no' fa Yesus a' ta ain sariho, Andreas, Simon Petrus o' di ail. ⁴¹ Dai ehta hee, Andreas sam so di ail Simon a' bung a' ra mateng ubangho," Ni sam Mesias a' hol am ( o' lel hee Kristus)." ⁴² No' hee, Andreas Simon a'ra sam Yesus a' bung. Yesus sa Simon e'dun a' ra mateng ubang ho,"Ari Simon Yohanis o'ai. Ariho olofe Kefas ( o' lel hee Petrus eme Foi')." ⁴³ Mi dilel hee, Yesus Om sam Galilea leam uma. Sa sam Filipus a' hol, Sa a' ra mateng, "Ma Nata ain!" ⁴⁴ Filipus ho Betsaida o' name, sariho Andreas med Petrus eleme e'lafeng. ⁴⁵ Filipus sam Natanael a' hol a' ra mateng, Aiba Musa o' Taurat hul, med nabi ernu di hul, sariho Yesus Nazaret O' Name, Yusuf o' ai, ni sam a' hol am. ⁴⁶ Natanael a' ra mateng ubang," Na o' no'nu maa Nazaret fe lol ho'?" Filipus a' ra mateng ubang," Ma honie, e' dun." ⁴⁷ Yesus dun hee Natanael ma O' lap ma no' sei sara ham umateng, "E' dun, Israel o' name a' bul, upapain e' a' ra a'fah mi nene!" ⁴⁸ Natanael A' tan, Taro' nife A nahol? Yesus a' ra mateng," Filipus e' olofe dai hee, a mong a' ong far Na dun ahol am." ⁴⁹ Natanael ubang, Guru, Ari horo Lahtal Ai. Ari horo Israel hinung O' Afen. ⁵⁰ Yesus a' ra mateng, Fede' Na ara mateng ubang ho, a mon a' ong e'far Na dun ahol am, honife a o' a' tino' bit eme a' ai? Na ernu somi mate hoo e' mota a uil dun a' hol. ⁵¹ No' Yesus foil hamow, Na so a' tino' a' ra mateng, a maa dun hee burang sari during, Lahtal O' malaikat ernu mid e' hel e', Nameno Aiho ubaleta eh.