¹ Yesus balek masuk ka Sinagoge, ado saorang nang lumpuh tangan nyo sabolah. Macam tak yakin orang-orang tu samo Yesus apokah di ² sombuhkan-NYO orang tu pas hari sabat supayo ado colah orang tu manuduh DIO. ³ Torus, bacakaplah Yesus samo orang nang lumpuh tangannyo sabolah tu, "togaklah di tongah-tongah." ⁴ Bacakaplah Yesus samo orang-orang tu, "Apokah boleh babuat baek ato babuat jahat pas hari Sabat?" Manolong nyawonyo ato mambunuh nyo?" Tapi tadiam pulak nyo orang tu. ⁵ Abis tu, Goram pulaklah Yesus manengok orang tu. DIO sangat sodih samo kadogilan hati orang tu. torus, Yesus bacakap samo orang nang lumpuh tangan-nyo tu, "Julurkan tanganmu." Dan orang tu manjulurkan tangan nyo, Abis tu sombuh lah tangan nyo. ⁶ Pogilah orang-orang Farisi tu dan mamuloi basubahat samo orang Herodian nang malawan-NYO camano caro mambunuh-NYO. ⁷ Abis tu, Manyingkirlah yesus samo murid-NYO ka danau, dan rame orang Galilea mangikuti DIO jugo dari Yudea. ⁸ Dari Yerusalem,Idumea, daerah saborang sunge Yordan, jugo dari sakitar Tirus, dan Siodon, rame orang mandongarkan semuo nang Yesus lakukan, datang samo DIO. ⁹ Karono rame orang tu, bacakaplah Yesus samo murid-murid-NYO supayo disiapkan orang tu sabijik sampan untuk-NYO supayo tak di desak orang rame tu DIO. ¹⁰ Karono dah banyak di sombuhkan Yesus orang rame tu, mako samuo nang punyo panyakit torus balumbo- lumbo ondak di sontuh-NYO. ¹¹ Dan, ketiko setan manengok Yesus, orangtu manunduk di dopan-NYO dan manjorit, "Diolah anak Allah!" ¹² Tapi, dilarang Yesus ortangtu mambilangkan siapo DIO. ¹³ Torus Yesus naek ka bukit dan mangajak orang-orang nang DIO sukoi-NYO untuk basamo-NYO. ¹⁴ DIO manotapkan duo bolas orang bak dapat orang tu ikut samo-NYO dan bisa manyuruh orang tu untuk bacaramah, ¹⁵ Dan mangkasih kuaso untuk mangusir setan setan. ¹⁶ Yesus menotapkan keduo bolas orang tu: Simon (nang di bori Yesus namo Petrus), ¹⁷ Yakobus, budak Zebedeus, dan Yohanes sudaro Yakobus (nang di bori Yesus samo orangtu namo Boanerges, artinyo "Budak Potir"), ¹⁸ Andreas, Filipus, Bartolomeus, Matius, Tomas, Yakobus, budak Alfeus, Tadeus Simon orang Zelot, ¹⁹ si Yudas Iskariot tu lah, nang manghianati DIO. ²⁰ Abis tu Yesus masuk ka dalam rumah, dan bakarumun balek orang nang bakumpul tadi tu di situ sehinggo Yesus dan murid-murid-NYO tak biso makan roti. ²¹ pas katiko kaluarga-NYO mandongar hal ni, orang tu datang ondak mambawak Yesus balek karono orang tu bacakap bahwa DIO sudah gilo. ²² Dan, Ahli-ahli Taurat nan datang dari Yerusalem mangatokan, "DIO kamasukan Beelzebul!" dan "DIO mangusir setan dongan kakuatan induk setan." ²³ Abis tu, Yesus manggundang orang tu datang samo DIO, dan babicaro manggunakan parumpamaan, " Kek mano biso Iblis mangusir Iblis? ²⁴ Bilo sabuah karajaan bacorai-borai, karajaan tu tak mampu batahan. ²⁵ Dan, bilo sabuah kaluargo bacorai-borai manantang diri nyo sandiri, kaluarga tu jugo tak mampu batahan. ²⁶ Bilo iblis bangkit manantang diri-nyo sandiri dan bacorai borai, DIO tak batahan, tapi tamatlah riwayat nyo. ²⁷ Tak saorangpun nang mampu masuk ka rumah orang nang kuat dan manguras harto kakayaan, kacuali sabolum nyo DIO mangikat orang nang kuat tu, baru lah dio dapat mangkuras di rumah tu." ²⁸ "Aku mangucapkan nang botul samo kau, samuo doso budak budak manusia biso diampuni, dan samuo hinaan nang orang tu cakapkan ²⁹ Lantas siapo nang manghina roh kudus tak kan paronah di ampuni-NYO, malainkan basalah karono dosa kokal." ³⁰ sobab, ahli-ahli Taurat tu bacakap, "Dio kamasukan roh jahat." ³¹ Lalu, omak dan sudaro-sudaro-Nyo Yesus bakunjung dan togak di luar rumah. Orang tu manyuruh orang bak mamanggil-Nyo. ³² Ado orang rame mangarumuni Yesus dan orang tu bacakap samo Dio, "Tengok, omak Mu dan sudaro-sudaro-Mu ado di luar sodang mancarik Kau." ³³ Lalu, Yesus manjawab orang tu dan bacakap, "Siapokah omak-Ku dan sudaro-sudaro-Ku?". ³⁴ Lalu, Dio manengok orang-orang nang duduk mangarumuni-Nyo dan bacakap, "Tengok lah, ini omak-Ku dan sudaro-sudaro-Ku!. ³⁵ Sobab, siapo sajo nang manggarojokan kahondak Allah diolah sudaro bujang-Ku dan sudaro parawan-Ku dan omak-Ku."