¹ Torus, balalulah hari, pas Yesus datang balek ka Kapernaum, di dongar orang lah kalo Dio tu ado di rumah. ² Jadi bakumpulan lah orang banyak hinggo sosak, lanjar dopan pintu pun tak ado tompat.Salagi bacaramah Dio ka orang-orang tu. ³ Adolah datang orang mambawak nang lumpuh kapado-Nyo, ompat orang mamundaknyo. ⁴ Masalahnyo tak lalu orang tu mambawak kapada-Nyo, kerono sosak, jadi dibuko lah atap rumah pas nang diatas-Nyo tu, barulah di turunkan nang lupuh to tagolek atas tilam. ⁵ Kerono ditengok Yesus motan kali orang tu, bacakaplah Dio kepado nang lumpuh tu, "Oi nakku, udah tarampuni dosomu!" ⁶ Tapi mulo bapikirlah ahli Torat nang ontok disanan dalam hatinyo, ⁷ "Ngapo orang ni bilang bagitu?" Bajayo manghujat dio! Sapo pulak nang biso mangampuni doso salain Allah sajo?" ⁸ Langsung mangortilah Yesus di Roh-Nyo kalo orang tu batanyo dalam hati, hinggo bacakaplah Dio, "Apo susah na hatimu batanyo-tanyo tontang hal itu?" ⁹ ''Mano nang talobih sonang, bacakap ka nang lumpuh tu, 'Doso-dosomu di maafkan', ato 'Bankit, bajalanlah dan bawak tilammu?' ¹⁰ Tapi, bak kamu paham kalo Anak Manusio punyo hak di bumi ni mangampuni doso.'' Bacakaplah Dio ka nang lumpuh tu, ¹¹ "Aku cakapkan yo,: bangkit' bawak tilammu, baleklah ka rumah kau." ¹² Langsung badirilah nang lumpuh tu,dibawaknyo tilamnyo, bajalan didopan orang tu samuo, pogi lah dio. Taconganlah orang tu samuo, sambil manyombah Allah, katonyo, " Nang macam ni tak paronah kami tengok baya!" ¹³ Pogilah Yesus ka topi dano, jadi datanglah baduyun-duyun samuo orang kapado-Nyo, diajari Dio lah orang tu. ¹⁴ Pas waktu Dio sodang bajalan, Di lihat-Nyo lah si Lewi anak Alfeus, ontok dio di tompat pangutip pajak. Dibilang Yesus kepadonyo, "Mo, ikutlah Aku." Torus bangkitnyo si Lewi mangikut Dio. ¹⁵ Katiko Yesus manikmati makan di rumah si Lewi,duduk jogo nang ramean pangutip pajak samo orang pandoso ikut makan basamo Yesus samo murid-murid-Nyo, karono nang ramean orang mangikut Yesus. ¹⁶ Pas ditengok orang-orang ahli Torat dari kalompok Farisi kalo Yesus bakumpul makan samo orang pandoso,pangutip pajak, ditanyo orang tu lah murid-Nyo, "Kenapo bakumpul Dio makan basamo orang pandoso jugo pangutip pajak?" ¹⁷ Katiko di dongar Yesus, bacakaplah Dio ka orang tu, "Orang nang sehat tak butuh dokter, tapi nang sakitnyo baya. Aku datang ni bukannyo ondak mamanggil nang bonar, tapi orang nang badoso." ¹⁸ Murid-murid Yohanes , samo murid-murid orang Farisi bapuaso. Datanglah orang batanyo samo Yesus: "Kenapo murid-murid Yohanes samo murid-murid Farisi bapuaso, tapi murid-murid-Mu tidak?" ¹⁹ Jawab Yesus samo orang tu: "Apo dibolehkan kawan dokat panganten laki-laki bapuaso sodangkan panganten itu basamo orang-orang tu? Sapanjang panganten itu ado basamo-samo orang tu, orang tu tak bapuaso. ²⁰ Tapi akan tibo saatnyo panganten itu dibawak dari orang tu, pas waktu itulah orang-orang tu bapuaso. ²¹ Tak ado orang na manambalkan saculek kain nang bolum kusut ka baju nang udah tuo, karono kalo ondak dikarojokan akan tacabiklah kain tu, nang baru mancabik nang tuo, lanjar bosar kuyaknyo. ²² Bagitu jugolah, tak ado orang nang mancurahkan anggur nang baru kadalam kantong kulit nang tuo, karono kantong kulit nang tuo itu akan takoyak, hinggo tabuang anggur samo kantong kulit tu. Eloknyo, anggur nang baru disimpan kadalam kantong kulit nang baru jugo." ²³ Satu katiko di hari Sabat, Yesus bajalan di ladang gandum, sambil bajalan murid-murid-Nyo mamutik bulir gandum. ²⁴ Jadi bacakaplah orang Farisi samo Dio, "Tengoklah, mengapo orang tu mangorjokan apo nang tak biso di karojokan di hari Sabat?" ²⁵ Jawab-Nyo samo orang tu: "Bolum paronahnyo kau baco apo nang dikorjokan Dau, pas waktu dio sama pangikutnyo kakurangan bokal jugo kalaparan. ²⁶ macam mano dio masuk ka Rumah Allah pas Abyatar manjadi Imam Bosarnyo, torus dilahapnyo roti sajian tu nang tak biso dimakan siapo pun kacuali imam-imam - dan dibagikannyo sama pangikutnyo?" ²⁷ Lantas, bacakaplah Yesus samo orang tu: "Hari Sabat tu diadokan untuk manusio dan bukannyo manusio untuk hari Sabat, ²⁸ jadi Anak Manusio tu dalah jugo Tuhan untuk hari Sabat."