Parumpamoan tontang Para Pakorjo Ladang Anggur ¹ "Karono, Karajaan Sorgo adolah macam pamilik ladang nang pagi-pagi kali pogi buek mancari pakorjo-pakorjo buek ladang anggurnyo. ² Waktu dio sudah bapokat samo para pakorjo tu buek sadinar sahari, dio manyuruh mareko ka ladang anggurnyo. ³ Dan, kiro-kiro pada jam ka tigo, dio pogi dan manengok nang laennyo tongah togak manganggur di tompat umum. ⁴ Lalu, dio bacakap kepado mareko, 'Kamu, pogilah jugo ka ladang anggur dan apo nang cocok akan aku bagikan kepadomu.' Dan, maareko pun pogi. ⁵ Sakali lagi, kiro-kiro jam kaonom dan jam kasambilan dio pogi dan malakukan hal nang samo. ⁶ Dan, kiro pado jam kasabolas, dio pogi dan manjumpoi nang laennyo tongah togak dan dio bacakap kepado mareko, 'Mangapo kamo togak di sinin manganggur sahari suntuk?' ⁷ Mareko bacakap kepadonyo, 'Korno bolum ado nang mampakorjokan kami.' Pamilik ladang tu bacakap kepado mareko, 'Kamu, pogilah jugo ka ladang anggurku.' ⁸ Pas, hari udah ondak malam, pamilik ladang tu bacakap kepado mandornyo, 'Panggillah para pakorjo dan bayarkan kepado mareko upahnyo, dimuloi dongan nang tarahir sampe nang partamo.' ⁹ Waktu mareko nang dipakorjokan pado jam kasabolas , datang masing-masing orang manarimo 1 dinar. ¹⁰ Pas, mareko nang dipakorjokan partamo kali, datang, mareko mangiro ondak manarimo talobih banyak. Tapi, matreko masing-masing jugo manarimo 1 dinar. ¹¹ Waktu manarimonyo, mareko parotes kepado pamilik ladang. ¹² Mareko bacakap, 'Orang-orang nang tarakhir cumo bakorjo salamo 1 jam sajo, dan engkau mambuek mareko samo dongan kami, nang sudah mananggung boban dan panas manggigit saharian.' ¹³ Tapi, pamilik ladang manjawab dan bacakap kepado satu dari mareko, 'Sudaro, aku tidak basalah kepadomu. Bukannyo kamu sudah sapakat samoku buek satu dinar? ¹⁴ Ambeklah punyomu dan pogilah, tapi aku ondak mambagi kepado orang nang tarahir ni, samo macam kepadomu. ¹⁵ Apokah aku tak dibolehkan buek malakukan apo pun nang kuondak tarhadap punyoku sandiri? Ato apokah matamu jahat karono aku baek?' ¹⁶ Jadi, nang tarahir akan manjadi nang partamo, ddan nang partamo akan manjadi nang tarhir." Yesus Bacakap Lagi tontang Kamatian-Nyo ¹⁷ Waktu Yesus ondak pogi ka Yerusalem, Dio mambawak duo bolas murid-Nyo sacaro tarpisah. Dalam parjalanan, Dio bacakap kepado mareko, ¹⁸ "Tengoklah, kito tongah manuju Yerusalem dan Anak Manusio ondak disorahkan kepado imam-imam kaplo dan ahli-ahli Taurat. Mareko ondak manghukum-Nyo dongan kamatian. ¹⁹ Lalu mareko akan manyorahkan Dio kepado bangso-bangso laen buek diejek. mancambuki, dan manyalibkan-Nyo. Dan, pado hari katigo, Dio akan dibangkitkan." Parmintaan Omak dari Anak-anak Zebedeus ²⁰ Kamudian, ibu dari anak-anak Zebedeus basamo anak-anaknyo datang kepado Yesus dan basujud buek mamintak kepado Yesus. ²¹ Dan, Yesus bacakap kepadonyo, "Apo nang kamu ondak kan?" Ibu tu manjawab, "Parintahkanlah bak supayo kaduo anakku boleh duduk dalam Karajoan-Mu satu di sabolah kanan-Mu dan satu di sabolah kiri-Mu." ²² Tapi, Yesus manjawab, "Kamu tak mangorti apo nang kamu mintak. Apokah kamu sanggup minum dari mangkok nang harus Kuminum?" Mareko bacakap kepado Yesus, "Ya, kami sanggup." ²³ Yesus bacakap kepado mareko, "Kamu memang akan minum dari mangkok-Ku, tapi buek duduk kanak-Ku ato kiri-Ku, bukannyo hak-Ku mambagikannyo, malainkan buek mareko nang udah disiapkan samo AYAH-Ku." ²⁴ Waktu kasapuluh murid nang laen mandongarnyo, mareko marah kepado kaduo sudaro tu. ²⁵ Namun, Yesus mamanggil mareko baduo dan bacakap, "Kamu tau kalo para panguaso bangso-bangso laen mamarentah atas mareko, dan orang-orang bosar mareko manjalankan kuasonyo atas mareko. ²⁶ Tak harus jugo musti bagitu diantaro kamu, tapi siapo nang ondak manjadi bosar di antaro kamu, dio harus manjadi hambamu. ²⁷ Dan, siapo sajo nang ingin manjadi nang partamo di antaro kamu, dio harus manjadi hambamu, ²⁸ samo macam Anak Manusionang datang bukan buek dilayani, tapi buek malayani dan mambagikan nyawo-Nyo sabage tobusan buek banyak orang." Duo Orang Buto Disombuhkan ²⁹ Dan, waktu mareko mninggalkan Yerikho, karumunan orang banyak mangikuti-Nyo. ³⁰ Dan, duo orang buto nang tongah ontok di topi jalan, pas mandongar kalo Yesus lewat, mreko basoru, "Tuhan, Anak Daud, kasihanilah kami!" ³¹ Orang banyak manogur mareko bak supayo orang tu sonyap. Tapi, mareko samangkin koncang batariak, "Tuhan, Anak Daud, kasihanilah kami." ³² Lalu, Yesus baronti dan mamanggil mareko. Dio bacakap, "Apo nang kamu ondak Aku buek untukmu?" ³³ Mareko bacakap kepado-Nyo, "Tuhan, kami ondak mato kami dibukukan." ³⁴ Yesus tagorak oleh karono bolas kasihan kepado mareko, dan mamogang mato mareko, dan saat tu jugo mareko manarimo panengokannyo balek, dan mangikut Yesus.