(Herodes Mandongar Berita Tontang Yesus) ¹ Pas waktu tu, Herodes, Rajo Wilayah, mandongar berita-berita tontang Yesus. ² Dan, dio bacakap samo anggota-anggotanyo, "Inilah Yohanes Pembabtis. Dio dah bangkit dari antaro orang mati dan karono tu mukjizat-mukjizat ni bakorjo didalam-Nyo. ³ Korno, Herodes dah manangkap Yohanes, mangikatnyo, dan mamanjarokan dio karono Herodias, istri Filipus sodaro Herodes. ⁴ Karono Yohanes pornah bacakap samo dio, "Tak botul lah kolok kau mangawini Herodias.: ⁵ Dan kolok pun Herodes ondak mambunuh Yohanes, dio takut samo orang banyak, karono orang tu manganggap Yohanes sabage Nabi. ⁶ Sayangnyo, pas hari ulang tahun Herodes, anak parampuan Herodias manari di mukak Herodes, ⁷ Sahinggo dio basumpah ondak mangasihkan apo sajo nan diminta anak gadis tu. ⁸ Korno itulah, sasudah didosak samo omaknyo, gadis tu bacakap, "Kasihkanlah samoku disinin, kapalo Yohanes Pambabtis, diatas nampan." ⁹ Walopun Rajo sodih, tatapi karono sumpahnyo dan karono orang-orang nan makan basamonyo, dio pun mamarintahkan bak supayo dilakukanlah macam tu. ¹⁰ Disuruhnyolah bak supayo mamonggal kapalo Yohanes di panjaro. ¹¹ Dan, kapalo Yohanes dibawak di atas nampan, dikasihkannyo lah samo gadis tu dan di bawaknyolah samo omaknyo. ¹² Abistu, murid-murid Yohanes datang, mangambek tubuhnyo, dan manguburkannyo. Trus, orang tu pogi dan mangasihtaukannyo ka Yesus. ¹³ Pas Yesus mandongar hal ini, Dio manarik diri dari sanan pakek sampan, ka tompat nan sunyi sandirian. Dan, pas orang-orang mandongar ni, orang tu mangikuti-Nyo dengan bajalan kaki dari kota-kota. ¹⁴ Pas Yesus kaluar, Dio manengok karumunan bosar orang, dan kasihanlah Dio samo orang tu, dan manyombuhkan sakit orang tu. ¹⁵ Pas hari dah sonjo, para murid datang samo Yesus dan bacakap, "Tompat ni sunyi dan hari dah sonjo, suruhlah orang tu pogi ka desa-desa dan mamboli makanan untuk orang tu sandiri." ¹⁶ Yesus bacakap samo mereka, "Tak usah pala pogi orang tu. Kamu, kasihlah orang tu makan." ¹⁷ Orang tu manjawab-Nyo, "Kito tak punyo apo-apo disinin, kacuali limo roti dan duo ikan sajo." ¹⁸ Dan, Dio bakato, "Bawaklah kasinin," ¹⁹ Abistu, Dio manyuruh orang banyak tu duduk di rumput, dan Dio mangambek limo roti dan duo ikan tu, trus sambil manengok kalangit, Dio mangucap syukur dan mamocah-mocahkannyo, Abis tu, di kasihkan-Nyo lah samo murid-murid-Nyo, dan murid-murid mambagikannyo ka samuo orang banyak tu. ²⁰ Dan, orang tu samuo makan dan dikonyangkan. Trus, orang tu mangambek potongan-potongan nan sisah, ado duo bolas karanjang ponuh lah sisahnyo. ²¹ Dan, orang tu nan makan, sabanyak limo ribu orang laki-laki, bolum lagi dihitung parampuan dan anak-anak. ²² Yesus mamaksa murid-murid-Nyo masuk kasampan dan manyuruh pogi duluan dari Dio ka saborang, samantaro Dio tongah manyuruh orang banyak tu pulang. ²³ Dan, satolah Yesus manyuruh orang banyak tu pulang, Dio naik ka atas gunung sandirian ondak badoa. Pas dah sonjo, Dio sandirian disanan. ²⁴ Tak taunyo, sampan tu dah jauh dari daratan, dan diombang ambingkan ombak, karono balawanan samo angin. ²⁵ Dan, pas jam tigo malam tu, Dio datang ka murid-murid-Nyo dengan bajalan kaki diatas air. ²⁶ Pas murid-murid-Nyo manengok Dio bajalan diatas air, katakutan lah orang tu dan batariak, "itu anggo!", trus, orang tu manjoriti karono katakutan. ²⁷ Tak taunyo Yesus langsung bacakap samo orang tu, Katonyo, "Kuatkanlah hati kau!, Akunyo ini, tak usah pala takut." ²⁸ Bacakap lah Petrus samo Dio, "Tuhan, kolok botullah itu Kau, ajaklah aku samo Kau diatas air." ²⁹ Yesus manjawab, "Sininlah!" maka, Petrus kaluar dari sampan dan bajalan diatas air, dan datang samo Yesus. ³⁰ Tak taunyo, pas manengok angin, dio pun mulei katakutan dan tanggolam. batariak lah dio, "Tolong salamatkan aku Tuhan!" ³¹ Yesus langsung mangulurkan tangan-Nyo, mamogang Petrus, dan bacakap, "Kanapo pulak lah kau sangsi, kurang iman kau." ³² Pas orang tu masuk kadalam sampan, angin pun barhonti. ³³ Abistu, orang tu nan ado di sampan manyombah Yesus dan bacakap, "Sasungguhnyo, Engkau adolah Anak Allah!" ³⁴ Satolah manyaborang, orang tu sampek di tanah Genesaret. ³⁵ Pas orang-orang di tompat tu mangonali-Nyo, orang tu mangasihtaukan kasaluruh daerah tu, dan mambawa samuo orang sakit samo Yesus. ³⁶ Orang tu mamohon samo Yesus, bak supayo boleh manyontuh ujung jubah-Nyo, dan samuo orang nan manyontuhnyo, manjadi sombuh.