(Parumpamaan Tontang Panabur) ¹ Pas hari tu, Yesus kaluar dari rumah dan duduk di pinggir danau. ² Dan, orang banyak bakumpul samo Dio. Karono tu, Dio naik ka sampan dan duduk, dan samuo orang banyak tu badiri di pinggir danau. ³ Dan Dio mangatokan banyak hal samo orang tu dalam parumpamaan, kato-Nyo, "Ado saorang panabur, pogi ondak manabur, ⁴ Dan pas waktu dio manabur, babarapo bonih tu jatuh di pinggir jalan, trus datang lah burung mamatuknyo sampe abis. ⁵ Bonih nan laen jatuh di tompat babatu, nan tak banyak tanahnyo, dan copat tumbuh karono tak punyo kadalaman tanah, ⁶ sayangnyo, pas sasudah matahari terbit, tanaman tu tasongat panas, dan, karono tak mamiliki akar, tanaman tu pun jadi koring dan mati. ⁷ Bonih nan laen jatuh di antaro somak duri, dan somak duri tu tumbuh dan mangimpitnyo. ⁸ Namun, bonih nan laen jatuh di tanah nan elok dan manghasilkan buah, ado nan saratus kali lipat, ado nan onam puluh kali lipat dan ado nan tigo puluh kali lipat. ⁹ Siapo nan batalingo, bak biarlah dio mandongar. ¹⁰ Dan, murid-murid Yesus datang dan batanyo samo Dio, "Mangapolah Engkau bacakap samo orang tu pakek parumpamoan?" ¹¹ Yesus manjawab orang tu, "Samo kalian dah dikaruniokan untuk tahu rahasio Karajoan Surga, tatapi samo mereka, tak dikaruniokan." ¹² Korno, orang nan mampunyoi, kapadonyo akan dikasihkan dan dio akan bakalimpahan, Namun, siapo nan tak mampunyoi, bahkan, apo nan dio punyoi akan diambil darinyo. ¹³ Korno itulah, aku bacakap samo orang tu pake parumpamoan, karono, pas kito bisa manengok, orang tu tak manengok, orang tu tak mandongar, jugo tak mangorti. ¹⁴ Tontang orang tu, digonapilah nubuat Yesaya nan bakato, 'Dengan pandongaran kamu akan mandongar, tatapi tak akan pornah mangorti, dan dengan manengok, kamu akan manengok, tatapi tak akan mamahami.' ¹⁵ Karono hati bangso ini dah manobal, talingo orang tu malas ondak mandongar, dan orang tu manutup mato orang tu. Kolok tidak, pastilah orang tu dapat manengok pakek mato orang tu, mandongar pakek talingo orang tu, dan dapat mangorti pakek hati orang tu, lalu babalik samo-Ku dan disombuhkan. ¹⁶ Akan tatapi, diborkatilah matomu karono manengok dan talingomu karono mandongar. ¹⁷ Aku mangatokan nan sabonarnyo samo kamu, kolok banyak nabi dan orang-orang botul nan ondak manengok apo nan kamu tengok, tatapi tak manengoknyo, dan ondak mandongar apo nan kamu dongar, tatapi tak mandongarnyo." ¹⁸ "Oleh korno tu, dongarlah arti parumpamoan tontang panabur. ¹⁹ Pas orang mandongar Firman Karajoan dan tak mamahimnya, si jahat datang dan marampas apo nan dah tatabur dalam hati orang tu. Inilah orang nan bonihnyo tatabur di pinggir jalan. ²⁰ Adopun nan tatabur di tompat nan babatu, inilah orang nan mandongar firman dan langsung manarimonyo dengan sukocito . ²¹ Tatapi dio tak mampunyoi akar dalam dirinyo dan batahan sabontar sajo. Dan, pas panindasan ato panganiayoan tajadi karono firman tu, dio langsung tajatuh. ²² Bonih nan jatuh di tongah somak-somak duri adolah nan mandongar firman itu, kamudian kakhawtiran dunio dan tipu daya kakayoan mandosak firman tu sahinggo tak babuah. ²³ Namun, orang nan bonihnyo tatabur di tanah nan elok, diolah orang nan mamndongarkan firman itu dan mamahaminyo. Diolah nan botul-botul babuah dan manghasilkan, ado nan saratus kali lipat, onam puluh kali lipat dan babarapo lagi 30 kali lipat. ²⁴ Yesus manyampekkan parumpamoan nan lainnyo kapado orang tu, kato-Nyo, "Karajoan Surgo tu dapat diumpamokan kayak orang nan manabur bonih nan elok diladangnyo. ²⁵ Akan tatapi, samantaro orang-orang tidur, musuhnyo datang dan manabur bonih lalang di antaro bonih gandum, dan pogi. ²⁶ Pas tanaman batunas dan babulir, kamudian lalang tu tatengok jugo. ²⁷ Maka, hamba-hamba dari pamilik ladang tu datang dan batanyo, tuan, bukannyo engkau manabur bonih nan elok diladangmu? trus, dari manokah datangnyo lalang tu? ²⁸ Dio bacakap samo orang tu, 'saorang musuh dah malakukannyo. 'lalu, hamba-hamba tu bacakap samonyo, 'apokah engkau mau kami pogi dan mangumpulkannyo?' ²⁹ Akan tatapi, tuan tu bacakap, 'Jangan! korno, pas kamu mangumpulkan lalang-lalang tu, jangan-jangan kamu jugo mancabut gandum tu basamonyo. ³⁰ Biarlah kaduonyo tumbuh basamonyo sampe musim panen. Dan, pas waktu panen aku akan bakato kapado para panabur, "Partamo-tamo, kumpulkanlah lalang-lalang tu dan ikatlah dalam berkas-berkas untuk dibakar. Namun, kumpulkanlah gandumnyo kadalam lumbungku." ³¹ Abistu, Yesus mancaritokan parumpamoan nan laen samo orang tu, katonyo: "Karajoan Surgo tu kayak biji sasawi nan diambek orang dan ditaburkan diladangnyo. ³² Biji tu adolah nan takocik dari samuo jonis bonih, tatapi kolok pas tumbuh, dio lobih bosar dari samuo jonis sayuran, bahkan manjadi pohon bosar, sahinggo burung-burung dilangit datang dan basarang di cabang-cabangnyo." ³³ Kamudian Yesus mancaritokan sabuah parumpamoan nan laen kapado orang tu, "Karajoan Surgo tu kayak ragi, nan diambek samo saorang parampuan dan dimasukkan kadalam adonan topung tarigu sabanyak tigo sukat sampe saluruh adonan tu tacampur ragi. ³⁴ Samuo hal ni Yesus katokan kapado orang banyak dalam parumpamoan-parumpamoan, dan Dio tidak bacakap samo orang tu tanpo parumpamoan. ³⁵ Dengan kek gitu, tagonapilah apo nan disampekan lewat nabi, "Aku akan mambuko mulutku dalam parumpamoan-parumpamoan, Aku akan mangucapkan hal-hal nan tasambunyi sojak dunio dijadikan." ³⁶ Abistu, Yesus maninggalkan orang banyak tu trus masuk rumah. Dan, murid-murid-Nyo datang kapado-Nyo dan bacakap, "Jolaskanlah samo kami, parumpamoan tontang lalang-lalang di ladang." ³⁷ Dan, jawab-Nyo, "orang nan manaburkan bonih nan elok adolah Anak Manusio. ³⁸ Dan ladang tu adolah dunio ni, Bonih nan elok adolah anak-anak Karajoan, dan lalang adolah anak-anak sijahat. ³⁹ Dan musuh nan manaburnyo adolah iblis, dan musim panen adolah akhir zaman, dan para panuai tu adolah para malaikat. ⁴⁰ Jadi, samo macam lalang nan dikumpulkan dan dibakar dalam api, kek gitulah nan akan tajadi pas akhir zaman. ⁴¹ Anak Manusio akan mangutus para malaikat-Nyo, dan orang tu akan mangumpulkan samuo batu sandungan, jugo orang-orang nan malakukan kajahatan dari karajoan-Nyo. ⁴² Dan akan malemparkannyo ka dalam tungku api. Di tompat tu akan ado tangisan dan kortak gigi. ⁴³ Abistu, orang-orang bonar akan basinar kayak matahari dalam Karajoan Ayah orang tu, Siapo nan batalingo, bak biarlah dio mandongar." ⁴⁴ "Karajoan Surgo adolah macam harto nan tapondam di ladang, nan di tomukan orang, trus, dirondokkannyo lagi. Dan, karono sukocitonyo, dio pogi manjual samuo nan dipunyoinyo dan mamboli ladang tu. ⁴⁵ Sakali lagi, Karajoan Surgo adolah kayak saorang padagang nan mancari mutiaro nan indah, ⁴⁶ Pas dio manomukan sabiji mutiaro nan banilai tinggi, dio pogi dan manjual samup nan dipunyoinyo, trus mamboli mutiaro tu." ⁴⁷ Kek gitu jugolah, Karajoan Surgo adolah kayak jala nan ditobarkan kadalam laut, dan mangumpulkan barbage macam ikan. ⁴⁸ Pas jala tu ponuh, orang tu manyeretnyo ka pantai dan duduk, trus mangumpulkan ikan-ikan nan bagus kadalam karanjang-karanjang bosar, tatapi mambuang nan tak bagus. ⁴⁹ Jadi, itulah nan akan tajadi pas akhir zaman. Para malaikat akan kaluar dan mamisahkan nan jahat dari orang-orang bonar. ⁵⁰ Dan malemparkan orang-orang jahat tu kadalam tungku api. Ditompat tu akan ado ratapan dan kortak gigi. ⁵¹ Dah mangortinyo kamu samuo nan Ku torangkan ni? mereka pun manjawab, "Ya". ⁵² Dan, Yesus bacakap samo orang tu, "Karono tu, satiap ahli Taurat nan dah manjadi murid Karajoan Surgo, dio macam tuan rumah nan mangaluarkan harto nan baru dan nan lamo dari kakayoannyo." (Yesus Ditolak Di Kota Asal-Nyo) ⁵³ Pas Yesus dah manyalosekan parumpamoan-parumpamoan tu, Dio pogi dari sanan. ⁵⁴ Dan, pas Dio tibo di kota asal-Nyo, Dio mangajar di sinagoge-sinagoge orang tu, sahinggo orang tu takjub dan bakato, "Dari manonyo orang ni bisa dapat kebijaksanoan dan mukjizat-mukjizat ni? ⁵⁵ Bukannyo Dio ni anak saorang tukang kayu? bukannyo omak-Nyo nan dipanggil Maria, dan sodaro-sodaro-Nyo Yakobus, Yusuf, Simon, dan Yudas? ⁵⁶ Bukannyo sodaro-sodaro-Nyo nan parampuan ado diantaro kito? trus, dari mano Orang ni mandapat samuo hal ni?" ⁵⁷ Dan, orang tu manolak Dio. Namun, Yesus bakato samo orang tu, "Saorang nabi bukannyo tak dihormati, kacuali di tompat asalnyo dan di rumahnyo sandiri. ⁵⁸ Dan, Dio tak malakukan banyak mukjizat disanan, karono katidak percayoan mereka.