¹ Pado satu waktu, pas hari Sabat, bajalanlah Yesus malalui satu ladang gandum. Waktu tu, murid-murid Dio mamotik babarapo butir gandum, di gesek-gesek orang tu pakek tangan oarng tu torus dimakanlah. ² Babarapo orang Farisi batanyak,"Knapo kalian korjokan hal nang tak boleh dibuek waktu hari Sabat?" ³ Di jawab Yesus lah orang tu kata-Nya, "Tak paronahkah kamu mambaco apo nang dibuek Daud pas dio samo orang-orang nang basamo dio kalaparan, ⁴ hal macam mano dio masuk ka dalam Rumah Allah, mangambik roti parsombahan, mamakan roti tu, lantas dibagikannyo kepado orang-orang nang basamo Dio, nang tak boleh mamakannyo, kacuali para imam sajo?" ⁵ Lantas, Yesus bacakap kepado orang-orang Farisi tu, "Anak Manusio adolah Tuhan diatas hari Sabat." ⁶ Di hari Sabat nang barikutnyo, Yesus pogi ka sinangoge dan mangajar. Di tompat tu ado saorang nang tangan kanannyo lumpuh. ⁷ Ahli-ahli Taurat samo orang-orang Farisi mamparhatikan Yesus bak manengok apokah Dio ondak manyombuhkan di hari Sabat, bak adolah alasan orang tu ondak manuduh Dio. ⁸ Akan tatapi, Yesus tahi apo nang orang tu pikirkan. Bacakaplah Dio ka orang nang tangannyo lumpuh tu, "Bangun dan badirilah di tongah." ⁹ Yesus bacakap ka orang tu, "batanyolah dulu Aku ka kalian, mano nang boleh di korjokan di hari sabat: babuek nang elok ato babuek nang jahat? Manyalamakan nyawo ato mambinasokannyo?" ¹⁰ Sasudoh manengok ka sakaliling orang tu samuo, Yesus bacakap ka orang nang tangannya lumpuh tu, "Cak ulurkan tangan kau." diulurkannyolah tangannyo dan tangannyo manjadi sombuh. ¹¹ Akan tatapi, orang-orang Farisi dan ahli-ahli Taurat manjadi sangat marah dan basubahat, apo nang ondak mangorjoi Yesus. ¹² Pada hari-hari tu, Yesus naik ka bukit ondak badoa, dan disanan Dio badoa kapado Allah sapanjang malam. ¹³ Besok paginyo, Dio mamanggil murid-murid-Nyo dan mamilih duo bolas orang dari antaro orang tu, nang disobut - Nyo Rosul : ¹⁴ Simon nang jugo dinamainyo "Petrus", Andreas sodaro Petrus, Yakobus, Yohanes, Filipus, Bartolomeus, ¹⁵ Matius, Tomas, Yakobus anak Alfeus, Simon nang disobut orang Zelot, ¹⁶ Yudas anak Yakobus, dan Yudas Iskariot nang manjadi pangkhianat. ¹⁷ Satolah Yesus dan para Rasul turun, Dio badiri di suatu tompat nang datar, torus tu, datanglah kapado-Nyo sarombongan bosar para murid-Nyo dan orang banyak nang datang dari saluruh wilayah Yudea, Yerusalem, sorto dari daerah pantai kota Tirus dan Sidon. ¹⁸ Mereka samuo datang ondak mandongar Yesus dan ondak mandapat kasombuhan dari sagala panyakit orang tu, dan, orang-orang nang dirasuki roh-roh jahat jugo disombuhkan. ¹⁹ Samuo orang barusaho ondak manyontuh Yesus, korno ado kuaso nang kaluar dari Dio dan manyombuhkan orang tu samuo. ²⁰ Yesus manengok ka murid-murid-Nyo samuo dan bacakap, "Diborkatilah kamu nang miskin, korno punyomu lah Karajaan Allah, ²¹ Diborkatilah kamu nang sakarangni lapar, korno kamu akan dikonyangkan. Diborkatilah kamu nang sakarang ni manangis, korno kamu akan tagolak. ²² Diborkatilah kamu pas orang mamboncimu, mangucilkan kau, manghina kau, dan mancomarkan namo baik kau karono Anak Manusio. ²³ Basukocitolah pas hari kau mangalaminyo, dan malompatlah kamogahan, korno upahmu bosar di surgo, korno, pas lah kek gitu nenek moyang orang tu mamparlakukan para nabi. ²⁴ Tapi, cilakolah kamu nang kayo, korno kamu tolah mandapatkan kanyamanan hidup. ²⁵ Cilakolah kamu nang sakarang ni konyang, korno kamu akan kalaparan. Cilakolah kamu nang kinin ni tagolak, korno kamu akan maratap dan manangis. ²⁶ Cilakolah kamu, kolok samuo orang mambilangkan hal-hal nang elok tontang diri kau, kormo kek gitu jugolah nenek moyang orangtu pas bacakap tontang nabi-nabi palsu. ²⁷ Aku kasihtaukan ni samo kalian nang mandingarkan Aku. Sayangilah musuhmu dan babuek eloklah samo orang nang mambonci kau. ²⁸ Borkati orang nang mangutuki kau dan badoalah ka orang tu nang manganiaya kau. ²⁹ Samo orang nang manampar pipimu, kasikan jugo pipimu nang laen. Dan, samo siapopun nang marampas jubahmu, tak usah pala malarangnyo kolok ondak marampas baju kau jugo. ³⁰ Borilah kapado satiap orang nang maminta ka kau, dan kolok sasaorang mangambek milik kau, jangan pulak mamintaknyo balek. ³¹ Bikinlah orang laen, kekmano sapantasnyo kau ingin dibikin samo orang laen. ³² Kolok kau hanyo manyayangi orang nang manyayangi kau, pujian apolah yang ondak dikasihkan ka kau?, korno, orang badoso pun manyayangi orang-orang nang manyayangi orang tu. ³³ Kolok kau hanyo babuek elok samoo orang nang babuek elok ka kau, tak cocok kau mandapat pujian, korno, orang badosopun mambuek hal nang samo jugo. ³⁴ Kolok kau maminjamkan barang samo orang laen dengan mangharapkan imbalan, pujian apolah nang dikasihkan ka kau? korno, orang badosopun maminjamkan barang ka orang badoso lainnyo, bak supayo orang tu dapat manarimo balek dengan jumlah nang samo. ³⁵ Nang saharusnyo, sayangilah musuhmu dan babueklah nang elok, kasihlan pinjaman ka orang lain tanpo mangharapkan imbalan. kolok kek gitu, kau pasti mandapat upah nang bosar dan kamu akan manjadi anak-anak Nang Mahotinggi. Korno, Allah tu baek samo orang-orang nang tak tau batarimo kasih dan nang jahat. ³⁶ Korno tu lah, ondaknyo kalian berbelas kasihanm samo kayak Bapamu nang jugo ponuh dengan belas kasihan. ³⁷ "Jangan manghakimi, bak supayo kamu tidak dihakimi. Jangan manghukum, bak supayo kamu tak dihukum. Ampunilah dan kamu akan diampuni. ³⁸ Borilah dan akan diborikan ka kau: suatu takan nang elok, nang dipadatkan, nang diguncacngkan dan balimpah, dan nang akan dituangkan ka pangkuanmu. Karono dengan ukuran nang samo nang kamu gunakan ondak mangukur, hal itu akan diukurkan balek ka kamu." ³⁹ Yesus mancaritokan kapado orang tu parimpaan ni, "Bisonyo agaknyo orang buto manuntun orang buto? agaknyo orang tu baduo akan jatuh kadalan lubang? ⁴⁰ Saorang murid tak lobih dari pado gurunyo. Akan tatapi, satiap orang nang sudoh tarlatih akan manjadi macam guru orang tu. ⁴¹ Mangapolah kamu manengok serbuk kayu dimato sodaromu, tatapi kau tak tau kalo ado kayu balok di mato kau sandiri? ⁴² Kek mano kau biso bacakap ka sodaromu, "sodaro, bak ku kaluarkan sorbuk kayu tu dari matamu,' sodangkan kau sandiri tak manengok kayu balok di mata kau? woi orang munafik! Kaluarkan dulu kayu balok nang dari mato kau sandiri, sudah tu, kau dapat manengok dengan jolas untuk mangaluarkan sorbuk kayu dari mato sodaromu." ⁴³ "Pohon nang elok tak akan manghasilkan buah nang buruk, dan pohon nang buruk tak akan manghasilkan buah nang elok. ⁴⁴ Satiap pohon ditandoi dari jonis buah nang dihasilkannyo. Orang tak mangumpulkan buah ara dari somak baduri, atau mamotik anggur dari somak balukar. ⁴⁵ Orang nang elok mangaluarkan hal-hal elok dari hatinyo nang elok, dan orang nang jahat mangaluarkan hal-hal nang jahat dari hatinyo nang jahat. Apo nang kaluar dari mulut sasaorang barasal dari apo nang mamonuhi hatinyo. ⁴⁶ Kanapo kau panggil Aku, Tuhan, Tuhan, tatapi tak malakukan apo nang Aku ajarkan? ⁴⁷ Aku akan manunjukkan kapadamu, macam apikah orang nang datang kapada-Ku, mandingan ajaran-Ku dan malakukannyo. ⁴⁸ Dio macam orang nang mambangun sabuah rumah, nang manggali dalam-dalam, lalu malotakkan pondasi diatas batu. Pas banjir datang, air tu manghantam rumah tu, tapi tak biso manggoyahkannyo, korno rumah tu dibangun dengan sangat kokoh. ⁴⁹ Namun, orang nang mandongar ajaran-Ku tatapi tak mamatuhinyo, dio macam orang nang mambangun rumah diatas tanah tanpo pondasi. Pas banjir datang, rumah tuh roboh dan mangalami karusakan nang parah."