¹ Pado waktu tu, bakarumun banya orang di sakaliling-Nyo, ondak mandongarkan Firman Allah, topat togak Yesus di topi dano gENESARET, ² dan manengok duo sampan lagi batambat di topi dano tu, cuman lagi para nelayan tu sudah kaluar dari sampan-sampan tu dan lagi mangkirap jalonyo. ³ naeklah Yesus ka salah satu sampan, punyo Simon, dan manyuruh Simon mangkayuhkan balek sampannyo agak ka tongah manjauh dari darat. Lalu dipaduduk Yesus dan mangajar orang banyak dari sampan. ⁴ Pas udah salose bacakap, di bilang Yesus sama Simon, "Pogilah balek ka tompat nang dalam jalolah balek ikan tu," ⁵ Kato Simon lah, "Guru, litak kami samalaman suntuk , barikan pun tidak ! Tapi tak apolah, karono Awak manyuruh, ku paturutpun bak kuserakkan jalo ni." ⁶ Bagitu di karojokan, amak jang, manggariak ikan tu dapat sahinggokan ondak koyak jalo tu. ⁷ Lantas, mangkodelah dio samo kawan-kawannyo ka sampan nang laen supayo datang baya manolong orang tu. Lantas datanglah kawan-kawan orang tu mamuatkan ikan tu kadalam duo sampan tu hinggokan ondak tanggolam sampan tu. ⁸ Bagitu ditengok Simon Petrus hal tu, langsung basujud dio ka dopan Yesus dan katonyolah, "Pogi lah dari ku, Ruan, karono orang nang badoso awak ni!" ⁹ Karono, dio samo samuo nang basamo dio marasa tapalongok manengok banyaknyo ikan nang orang tu dapat. ¹⁰ Bagitu jugo samo Yakobus dan Yohanes, anak-anak Zebedeus, nang bakawan samo Simon. Kata Yesus samo Simon, "Jangan takut yo. Mulai sakarang, kau manjadi panjalo manusio." ¹¹ Sasudah orang tu manarek sampan tu ka darat, ditinggalkan orang tu baya samuo, lanjar ikut Yesus orang tu. ¹² Waktu tu topat Yesus di sabuah kota. Di kota tu, ado sasaorang nang badannyo ponuh kusta. Pas di tengok dio Yesus, basujud lag dio hinggokan mukonyo kono tanah dan mamintak pado-Nyo, "Tuan, andenyo ondak Kau, Engkau boleh mantahirkan aku." ¹³ Lantas, dijulurkan tangan-Nyo dan manyontuh orang tu. Kato-Nyo, "Ondaknyo Aku, jadilah kau tahir." Tiba-tiba, manghilanglah panyakit kusta orang tu. ¹⁴ Tapi, Yesus mambilangkan samo orang tu bak supayo tak dicaritokan samo siapo pun dan kato-Nyo, "Pogilah kasi tengokkan diri kau tu samo imam. Bakurbanlah kau karono kasombuhan kau macam nang di bilang Musa biar ado bukti samo orang-orang tu." ¹⁵ Barito tontang Yesus maluas sahinggo badatangan orang da batumpuk ondak mandongarkan Dio jugo ondak mamintak disombuhkan panyakit orang tu. ¹⁶ Tapi lah baya , ambalan manyolip Yesus katompat-tompat nang sonyap ondak badoa. ¹⁷ Adolah suatu ari, pas Yesus topat mangajar, orang-orang Farisi samo ahli-ahli Taurat nang datang dari samuo kota dari wilayoh Galilea, Yudea, dan Kaota Yerusalem jugo ontok disanan. Dan kuaso Tuhan manyortai Yesus sahinggo Dio bisa manyombuhkan nang banyak orang. ¹⁸ Lantas, tengoklah baya, adolah babarapo orang manggotong orang nang lumpuh di atas tilamnyo, dan orang tu barusaho mambawaknyo masuk dan malotakkan topat di dopan Yesus. ¹⁹ Tapi baya, karono tak didapat orang tu jalan ondak mambawaknyo masuk dikaronokan karumunan orang, naeklah orang tu ka atas atap torus manurunkan orang lumpuh tusamo tilamnyo ka tongah-tongah topat di dopan Yesus. ²⁰ Waktu ditengok iman orang tu, bacakaplah Yesus, "Hai sudaro, dosomu udah diampini." ²¹ Ahli-ahli Taurat samo orang-orang Farisi mulo banyak-tanyak, "Siapolah orang nang manghujat Allah ni? Siapo nang dapat mangampuni doso-doso salaen Allah sajo?" ²² Waktu Yesus tau pikiran orang tu, Dio bacakap, "Kanapo kamu batanyak macam tu dalam hatimu? ²³ Mano nang talobih gampang, mambilangkan 'Doso-dosomu sudah diampuni' ato 'Bankit dan bajalanlah?' ²⁴ Tapinyo, bak tau sajo kalian kalo Anak Manusio bakuaso di Bumi untuk mangampuni doso," Yesus bacakap samo orang nang lumpuh tu, "Aku bacakap samo kau: Bangkitlah, angkat tilammu, dan baleklah." ²⁵ Sakojap tu jugo, orang tu langsung togak di dopan samuo orang dan mangmbek tompat di tagalotak, lantas bajalan balek sambil mamuji Allah. ²⁶ Samuo rang tu marsa tacongang dan mamuji Allah baya. Samo maraso takut nang sangat tarhadap kuaso Allah, orang bacakap, "Sakarang ni, kami manengok nang heran pakaro nang luar biaso!" ²⁷ Sudah tu, Yesus kaluar dan manengok saorang pangumpul pajak namonyo Lewi nang sodang duduk di tompat pangumpulan pajak. Bacakap Yesus samo dio, "Ikutlah Aku." ²⁸ Lantas togaklah Lewi, maninggalkan samuonyo, lalu mangikuti Yesus. ²⁹ Torus, diadokannyo pesta bosar buek Yesus di rumahnyo. Nang banyakan pangumpul pajak samo orang nang laen bagabung makan samo orang tu. ³⁰ Tapinyo, orang-orang Farisi samo ahli-ahli Taurat mulai manggarutu samo murid-murid Yesus, "Kanapo kalian makan dan minum basamo para pangumpul pajak samo orang-orang badoso?" ³¹ Yesus manjawab dan bacakap samo orang tu, "Bukan orang-orang nang sehat porlu tabib baya e, tapi orang -orang nang sakit. ³² Aku datang bukannyo ondak mamanggil orang botul, tapinyo ondak mamanggil orang nang badoso bak supayo batobat orang tu." ³³ Bacakaplah orang tu samo Yesus, "Murid-murid Yohanes Pambabtis jolak bapuaso dan badoa, samo jugo murid-murid orang Farisi. Tapi baya, murid-murid-Mu salalu makan minum." ³⁴ Bacakap Yesus samo orang tu, "Bisanyo kau suruh bapuaso pangiringpangantinlaki-laki topat masih basamo orang-orang tu pangantin laki-lakinyo?" ³⁵ Tapi baya, kojap ondak datanglah hari-hari tu, waktu pangantin laki-laki tu diambek dari orang tu, dan pas hari-hari itulah orang tu bapuaso." ³⁶ Dicaritokan Yesus parumpamaan ini samo orang tu, "Tak ado saorang pu nang ondak mangkoyakkan sapotong kaen dari baju nang baru ondak manempel baju nang lamo. Karono kalok bagitu, orang tu pasti marusakkan baju nang baru, dan kaen panempel dari baju nang baru tu tak cocok samo baju nang lamo. ³⁷ Bagitu jugo lah baya, tak ado saorang pun nang mancurahkan anggur baru ka dalam kantong kulit nang lamo. Anggur nang baru tu lanjar manguyakkan kantong kulit nang lamo hinggokan tacurahlah anggur tu jugo takuyak hancurlah kantong kulit nang lamo tu. ³⁸ Anggur nang baru harus disimpan kadalam kantong kulit nang baru. ³⁹ Tak ado orang nang udah minum anggur lamo, ondak maminum anggur baru karono orang bacakap 'Anggur nang lamo tu talobih sodap."