¹ Pas hari partamo dalam minggu tu, pas hari masih pagi kali, parampuan-parampuan tu pogi ka kuburuan Yesus sambil mambawa rompah-rompah nang tolah orang tu siapkan. ² Di jumpoi orang tu lah batu nang bosar tu dah taguling dari kuburu tu, ³ Jadi, pas orang tu masuk kadalam, tak ado lagi ditengok orang tu mayat Tuhan Yesus. ⁴ Pas orang tu masih taheran-heran, tibo-tibo ado duo orang nang mamake baju nang bakilou-kilouan badiri togak di samping orang tu. ⁵ Parampuan-parampuan tu sangat manggalotar katakutan dan manundukkan mukonyo sampe katanah, bacakaplah kaduo orang tu, "Kanapo pulak kamu mancari nang hidup diantaro orang-orang mati?" ⁶ Tak ado lagi Dio disinin, Dio dah hidup balek. Cak kau ingat dulu tontang apo nang paronah dicakapkan-Nyo ka kamu samuo, pas Dio masih di Galilea. ⁷ Dio bilang, kolok Anak Manusio ni harus di sorahkan ka tangan orang-orang badoso, disalibkan, dan akan bangkit kambali pas hari nang katigo." ⁸ Taringatlah pulak parampuan-parampuan tu ka cakap Yesus. ⁹ Sasudah orang tu balek dari kuburan Yesus, dicaritokan orang tu lah samua kajadian tu samo kasabolas rasul dan jugo para pangikut Yesus nang lainnyo. ¹⁰ Parampuan nang mancaritokan kajadian ka para rosul adolah si Maria Magdalena, Yohana, Maria ibu Yakobus dan babarapo parampuan laen. ¹¹ Sayangnyo, cakap parampuan-parampuan tu dianggap mambongak samo samuo para rosul, dan orang tu samuo tak yakin samo parampuan-parampuan tu. ¹² Tibo-tibo si Petrus badiri dan balari ka kuburan Yesus. Dio mambungkuk dan manengok kadalam, tapi dio hanyo manjumpoi kain kapan pambungkus mayat sajo. Sudah tu, Petrus balek dengan sangat heran dengan kajadian tu. ¹³ Hari tu jugo, duo orang pangikut Yesus pogi kasabuah desa banamo Emaus nang jaraknyo kiro-kiro 60 stadia dari kota Yerusalem. ¹⁴ Kaduo orang tu mambicarokan tontang sagalo paristiwa nang tarjadi. ¹⁵ Pas orang tu lagi bacakap-cakap dan batukar pikiran, Yesus sandiri datang mandokat dan bajalan basamo-samo orang tu. ¹⁶ Sayangnyo, mata orang tu tarhalang, sahinggokan, orang tu tak biso konal samo Dio. ¹⁷ Bacakaplah Yesus ka orang tu, ' Kalian baduo lagi manckapkan apo?, kaduo orang tu pun barhonti dan wajah orang tu nampak sangat sodih. ¹⁸ salah satu dari orang tu banamo Kleopas, dan bacakap ka Dio, "apo Kau orang baru disinin, makonyo Kau tak tau apo nang sodang tajadi disanan baru-baru ni? ¹⁹ Jawab Yesus, "tontang apo ruponyo?, dijawan orang tu pulaklah Dio, "Tontang Yesus dari Nazaret tu, Dio adolah saorang nabi nang ponuh kuaso dalam cakap dan jugo parangai-parangai-Nyo di dopan Allah dan di dopan samuo banga kami. ²⁰ Tapi sayangnyo, imam-imam kapalo dan para pamimpin kami manyorahkan Dio bak supayo di hukum mati, dan orang tu pun manyalibkan Dio. ²¹ Sabotulnyo kami pun baharap, kolok Diolah nang akan mamlopaskan bangsa Israel. Itupun, hari ni dah hari katigo sojak samuonyo tu tajadi. ²² Tapinyo, ado parampuan dari antaro kami tolah mangojutkan kami, pas orang tu di kuburan pagi-pagi sakali, ²³ Orang tu tak manjumpoi jenazah Yesus. Torus tu, orang tu balek dan mambilangkan, kolok orang tu dah manengok panampakan malekat-malekat, nang mambilangkan kolok Dio dah hidup. ²⁴ Torus tu, sabagian dari kami pogi ka kuburan dan manengok, samo kayak nang di cakapkan parampuan-parampuan tu. Tapinyo orang tu tak ado manengok Yesus. ²⁵ Bacakaplah Yesus ka orang tu, "Oh, nang bodohlah kamu dan lambat hati untuk pacayo dengan sagala sasuatu nang tolah di cakapkan samo para nabi. ²⁶ Bukannyo Kristus tu harus mangalami pandaritoan ni dan masuk kadalam kamulioan-Nyo." ²⁷ Torus tu, Yesus manorangkan sagalo sasuatu nang tatulis dalam saluruh Kitab Suci mangonoi diri-Nyo, mulei dari Kitab Musa sampe samuo kitab para nabi. ²⁸ Pas orang tu sudah dolat ka desa Emaus, Yesus torus bajalan, seakan-akan ondak manoruskan parjalanan-Nyo. ²⁹ Tak taunyo, orang tu manahan Dio dengan bacakap, "Singgahlah basamo kami, korno hari dah hampir malam dan matahari hampir tabonam." Masuklah Yesus dan tinggal basamo orang tu. ³⁰ Pas Dio bagabung basamo orang tu di meja makan, Yesus mangambil roti dan memberkatinyo. Dio mamocah-mocahkannyo, trus mambagikannyo ka orang tu. ³¹ Saat tu jugo, tabukalah mato orang tu dan orang tu mangonali Yesus. Sayangnyo, tibo-tibo Yesus manghilang dari panengo'an orang tu. ³² Sudah tu, bacakaplah orang tu satu dengan nang laennyo, "Kuraso hati kito bakobar-kobar pas Dio bacakap dengan kito salamo di parjalanan dan pas Dio manorangkan Kitab Suci ka kito? ³³ Pas saat tu jugo, badiri lah orang tu dan balek ka Yerusalem. Orang tu manjumpoi kasabolas murid dan orang-orang nang basamo orang tu nang slagi bakumpul basamo-samo. ³⁴ Bacakaplah murid-murid tu, "Botul-botul lah Tuhan tu dah hidup balek dan manampakkan diri ka si Simon!" ³⁵ Kaduo pangikut tu jugo manaritokan apo nang tolah tajadi dalam parjalanan orang tu Orang tu mancaritokan, kek mano orang tu manandoi Yesus pas Dio mamocahkan roti. ³⁶ Pas kaduo orang tu masih mancaitokan kajadian ni, Yesus badiri di tongah-tongah orang tu dan bacakap ka mereka, "Dame basortomu." ³⁷ Tapi orang tu takojut dan katakutan, disangko orang tu, orang tu sodang manengok anggo. ³⁸ Torus tu, Yesus bacakap ka orang tu, "Mangapo pula kalian takojut dan mangapo pulak ado karaguan timbul di hati kau? ³⁹ Tengoklah tangan-Ku dan kaki-Ku. Aku lah ini nang botul. Pegang kalian lah Aku dan tengoklah, kalo anggo tak punyo daging dan tulang, kalo nang kalian tengok ka Aku, beda ha. ⁴⁰ Satolah Yesus bacakap, Dio manjunjukkan tangan dan kaki-Nyo ka orang tu. ⁴¹ Samantaro orang tu masih bolum pacayo korno kasonangan dan tacongang-congang, Yesus batanyo ka orang tu, "Adonyo nang ondak dimakan disinin? lapar Kuraso jang. ⁴² Dikasihkan orangtu lah saekor ikan panggan ka Dio. ⁴³ Diambek Yesus ikan tu, dan mamakannyo di mukak orang tu samuo. ⁴⁴ Bacakaplah Yesus ka orang tu, "Inilah cakap-Ku nang Aku bilangkan ka kamu, pas Aku masih basamo kamu. Sagalo sasuatu nang tacatat tontang Aku dalam hukum Taurat Musa, kitab para nabi, dan Mazmur harus digonapi." ⁴⁵ Dibukakan Yesuslah pikiran orangtu, sahinggo orang tu biso mangirti Kitab Suci. ⁴⁶ Bacakap lagi Yesus ka orang tu, "Ado tatulis kolok Kristus harus mandarito dan bangkit dari antara orang mati pado hari nang katigo. ⁴⁷ Dan, partonatan untuk pangampunan doso akan dinyatakan dalam nama-Nyo kapado sagalo bangso, mulei dari Yerusalem. ⁴⁸ Kamu adolah saksi-saksi dari samuo ni, ⁴⁹ Bak kalian tau, AKu mangirim janji Bapa-Ku ka kamu. Tapi, tinggal di kota Yerusalem sampe kamu di parlongkapi dengan kuaso dari tompat tinggi. ⁵⁰ Habis tu, Yesus mangajak para pangikut-Nyo kaluar kota sampe di Betania, torus, Dio mangangkat tangg-Nyo dan mamborkati orang tu. ⁵¹ Pas Yesus mamborkati orang tu, Dio bapisah dari orang tu dan tarangkat ka Surgo. ⁵² Dan orang tu pun manyombah-Nyo dan balek ka Yerusalem dengan sangat basukocito. ⁵³ Orang tu salalu ado do dalam Bait Allah dan mamuji Allah.