¹ Hari rayo Roti tak Baragi nang disobut jugo hari Paskah sudah dokat. ² Imam-imam kapalo dan ahli-ahli Taurat mancari caro ondak mambunuh Yesus, korno orang tu takut samo orang banyak. ³ Kamudian, masuklah taun kadalam Yudas, nang disobut jugo Iskariot. Dio adolah salah satu dari kaduobolas murid. ⁴ Lantas, pogilah YUdas dan bapokat samo imam-imam kapalo dan pangawal Bait Allah tontang comano dio biso manyorahkan Yesus ka orang tu. ⁵ Dan, orang tu pun kamogahan dan sapakat ondak mambaginyo duit. ⁶ Mako, sapakatlah Yudas dan mancari kasompatan bak manyorahkan Yesus kepado orang tu pas waktu tak ado orang banyak. ⁷ Kamudian tibolah hjatri rayo Roti tak Baragi, itulah waktunyo ondak mamparsombahkan anak domba Paskah. ⁸ Pado waktu tu, Yesus manyuruhkan Petrus dan Yohanes, kata-Nyo, "Pogilah dan siapkanlah makanan Paskah buek kita makan." ⁹ Kato mareko samo Yesus, "Dimano Engkau ondak bak supayo kami manyiapkannyo?" ¹⁰ Jawab Yesus kepado orang tu, "Pas kamu sudah masuk ka dalam kota, karang kamu bajumpo samo saorang laki-laki nang mambawak kondi aer; ikutilah dio ka rumah nang ondak dimasukinyo, ¹¹ dan bilangkan samo nang punyo rumah tu, "Guru mananyakkan samo kau; Dimanolah bilik tamu Aku biso makan Paskah basamo murid-murid-Ku?'' ¹² Mako, dio akan manunjukkan samo kamu bilik nang bosar di loteng atas, nang udah siap parabotannyo. Parsiapkanlah makanan kito disanan." ¹³ Lalu, Petrus dan Yohanes pogi dan manjumpoi samuonyo tarjadi pas macam nang dibilangkan Yesus dan orang tu pun mamparsiapkan makanan Paskah. ¹⁴ Katiko sudah tibo masanyo, Yesus dan para rasul duduk makan di sakaliling mejo. ¹⁵ Kamudian, Yesus bacakap samo orang tu, "Aku motan ondak kali makan Paskah ni samo kamu samuo, sabolum Aku mandarito. ¹⁶ Karono Aku cakapkan samo kamu, Aku tak akan mamakannyo lagi sampe digonapi parkaro hal ni dalam Karajaan Allah." ¹⁷ Lantas, Yesus mangambil cangkir barisi anggur dan mangucap syukur, lantas bacakap, "Ambillah cangkir ni dan bagikanlah diantaro kamu. ¹⁸ Karono, Aku bacakap samo kamu kalo muloi dari sakarang Aku tak minum anggur sampe Karajaan Allah tibo." ¹⁹ Kamudian Yesus mangambil roti dan mangucap syukur, Dio mamocah-mocahkan roti tu dan mambagikannyo kapado mareko sambil bacakap, "Roti ni adolah badan-Ku nang dibagikan samo kamu; bueklah ni sabage paringatan akan Aku." ²⁰ Bgitu jugo, sasudah makan, Yesus mangambil cangkir anggur dan bacakap, "Cangkir nang dituangkan buek kamu ni adolah Parjanjian Baru dalam darah-Ku." ²¹ Akan tatapi, tengoklah tangan orang nang ondak manyorahkan Aku ado basamo dongan Aku di mejo ni. ²² Korno Anak Manusio ondak pogi dongan caro macam nang sudah ditotapkan, tapi cilakolah orang nang manyorahkan Dio!" ²³ Murid-murid-Nyo batnyak satu samo nang laennyo hal siapo diantaro orang tu nang ondak malakukannyo. ²⁴ Partongkaran jugo tarjadi diantaro para rasul tontang siapolah di antaro mareko nang dianggap paling bosar. ²⁵ Akan tatapi, Yersus bacakap kapado orang tu, "Rajo-rajo bangso nang tak mangonal Tuhan bakuaso tarhadap rakyatnyo, dan orang-orang nang bakuaso atas rajo-rajo tu di sobut 'Palindung Rakyat.' ²⁶ Tapi, kamu jangan nang macam tu. Sabaliknyo ,nang paling bosar di antaro kamu ondaknyo batindak macam nang paling mudo, dan pamimpin harus manjadi bak macam palayan. ²⁷ Siapo nang lobih bosar, orang nang duduk makan atau nang malayani? Bukankah orang nang duduk makan? Namun, ASku ado di tongah-tongahmu sabage orang nang malayani. ²⁸ Kalian adolah orang-orang nang ado basamo Aku dalam pancuboan-pancuboan-Ku. ²⁹ Korno tu, Aku mambagikan kepadomu sabuah karajaan, macam nang dibagikan AYAH-Ku kepado-Ku, ³⁰ bak suoayo kamu biso makan samejo samo-Ku dalam Karajaan-Ku. Dan, kamu akan duduk di atas takhta ondak manghakimi kaduo bolas suku Israel." ³¹ "Simon, Simon, dongarkan Aku. Taun manuntut ondak manampi kau macam gandum, ³² tapi Aku sudah badoa buek imanmu bak supayo tak gugur. Dan, sasudah kamu batubat, kuatkanlah sudaro-sudaromu." ³³ Namun, Petrus bacakap samo epado Yesus, "Tuhan, aku siap di panjaro lanjar mati basamo Kau!'' ³⁴ Jawab Yesus kepadonyo, "Aku bacakap samoko, Petrus, hari ni ayam jantan tak ondak bakokok sabolum tigo kali kamu manyangkal kalo kamu mongonal Aku." ³⁵ Kamudian, Yesus batanyak kepado para murid, "Katiko Aku mangutus kamu tanpa kantong duit, tas, ato solop, apokah kamu kakurangan sasuatu?" Jawab orang tu, "tidak.'' ³⁶ Kata-Nyo kepado orang tu, "Namun kinin, siapo pu nang mampunyo kantong duit atau tas, bawaklah. Dan, siapo nang tak punyo podang, biarlah dio manjual jubahnyo dan mamboli podang. ³⁷ Korno, Aku bacakap kepado kamu kalo apo nang tartulis dalam Kitab Suci ni harus dogonap[i di dalam Aku, "Dio akan tarhitung basamo orang-orang pandoso,' Korno, nang tartulis tontang Aku sodang tarjadi sakarang." ³⁸ Lalu orang tu bacakap, "Tengoklah Tuhan, di sini ado duo podang." Dan, Yesus bacakap kepado orang tu, "Itu sudah cukup." ³⁹ Kamudian Yesus dan pogi kek macam ka Bukit Zaitun macam nang biaso dibuek-Nyo; murid-murid-Nyo jugo mangikuti Dio. ⁴⁰ Katiko Yesus sampe di tompat tu, Dio bacakap samo orang tu, "Badoalah bak supayo kamu tak jatuh dalam pancuboan.'' ⁴¹ Lalu, Yesus manjauhkan diri dari orang tu sakiro sapalempar batu jauhnyo. lalu balutut dan badoa, ⁴² "Bapa, bilo ondak Engkau, ambeklah cawan ni dari-Ku. Akan tatapi, janganlah kahondak-Ku nang tajadi, tapinyo kahondak-Mu." ⁴³ Sasudah tu, saorang malaekat dari surgo manampakkan diri kepado-Nyo dan manguatkan-Nyo. ⁴⁴ Dan, dalam pandaritoan-Nyo Dio talobih motan lagi badoa; hinggokan karingat-Nyo manjadi tetesan darah manitik ka tanah. ⁴⁵ Katiko Yesus salose badoa, Dio pogi kapado murid-murid-Nyo dan manjumpoi orang tu talolap karono basodih. ⁴⁶ Kata Yesus samo orang tu, "Mangapo kamu talolap tidur? Bangkitlah dan badoa bak supayo kamu jangan masuk ka dalam pancuboan." ⁴⁷ Katiko Yesus masih bacakap, datanglah sarombongan orang; dan dio nang dipanggil Yudas, salah satu dari kaduo bolas murid tu, mamimpin orang tu. Lalu, Yudas mandokati Yesus ondak mancium Dio. ⁴⁸ Tapinyo, Yesus bacakap kapadonyo, "YUdas, apokah kau ondak mayorahkan Anak Manusio pake ciuman?" ⁴⁹ Katiko murid-murid nang badiri di sakaliling-Nyo manengok apo nang ondak tajadi,bacakaplah orang tu, "Tuhan, apo harus akmi manyorang pake podang?'' ⁵⁰ Kamudian, salah satu dari pado murid tu manyorang palayan Imam Agung lanjar manobas talingo kanannyo. ⁵¹ Akan tatapi Yesus bacakap, "Udah cukup!" lalu, Yesus manjamah talingo palayan tu dan manyombuhkannyo. ⁵² Kamudian, Yesus bacakap kepado imam-imam kapalo, kapalo pangawal Bait Allah, dan tatuo-tatuo nang datang ondak manangkap-Nyo, "Mangapo kamu samuo datang pake podang dan pentungan samacam ondak manangkap parampok? ⁵³ Katiko Aku basamo kamu di Bait Allah satiap hari, kamu tak ondak manangkap Aku. Tapi, inilah waktunyo buek kamu dan buek kuadso kagolapan." ⁵⁴ Sasudah manangkap-Nyo, orang-orang tu pun manggiring dab mambawak Yesus ka rumah imam bosar. Akan tatapi, Petrus mangikuti orang tu dari jauh. ⁵⁵ Dan sasudah orang-orang tu manyalakan api di tongah-tongah halaman dan duduk basamo-samo, Petrus jugo duduk diantaro orang tu. ⁵⁶ Namun, saorang palayan parompuan nang manengok Petrus duduk dokat parapian tu mangamati muko Petrus lantas bacakap, "Orang ni jugo basamo dongan-Nyo. ⁵⁷ Akan tatapi, Petrus manyangkal, katanyo, "Hoi parompuan, aku tak mangonal Dio." ⁵⁸ Tak lamo jugo lantas, saorang nang laennyomanengoknyo dan bacakap, "Kau jugo tarmasuk salah satu dari maremo!" Namun Petrus bacakap, "Tidak, aku baukan salah satu dari orang tu!" ⁵⁹ Kiro-kiro satu jam kamudian, sorang nang laen lagi bacakap dongan yakin, "Pasti orang ni jugo basamo dongan-Nyo, korno dio jugo orang Galilea." ⁶⁰ Akan tatapi, Petrus bacakap, "Aku tak tau apo-apo nang kamu cakapkan!" Saat tu jugo, pas Pretrus masih bacakap, bakokoklah ayam jantan. ⁶¹ Lalu, manjerenglah Yesus dan manatap Petrus. Dan, Petrus taringat akan parkataan Yesus, kalo Dio bacakap samanyo, "Sabolum ayam jantan bakokok hari ni, kamu udah manyangkali Aku sabanyak tigo kali." ⁶² Kamudian Petrus pogi ka luar dan manangis dongan sodihnyo. ⁶³ Orang-orang nang manahan Yesus mulo mangejek dan mamukuli-Nyo. ⁶⁴ Orang tu manutup mato-Nyo dan bacakap, "Banubuatlah! Siapo nang mamukul Kau?" ⁶⁵ Mareko jugo mambilangkan banyak hal laen nang manontang-Nyo dongan manghino-Nyo. ⁶⁶ Hari besoknyo, tatuo-tatuo pamimpin Yahudi, imam-imam kapalo, samo ahli-ahli Taurat bakumpul dan mambawak Yesus ka Mahkamah Ugamo orang tu. ⁶⁷ Orang tu bacakap, "Kalo Engkau adol;ah Mesias, bilangkanlah samo kami. " Namun Yesus bacakap samo orang tu, "Kalo Aku mambilangkannyo samo kamu, tak ondak porcayo kamu samo Aku. ⁶⁸ Dan bilo Aku batanyak samo kamu, kamu tak ondak manjawab. ⁶⁹ Akan tatapi, muloi sakarang Anak Manusio akan duduk di sabolah kakan Allah Nang Maha Kuaso." ⁷⁰ Orang tu samuo bacakap, "Kalo bagitu, apokah Engkau Anak Allah?" Yesus manjawab orang tu, "Kamulah nang mambilangkannyo kalo Akulah Dio." ⁷¹ Kamudian oarang tu bacakap, "Kasaksian apo lagi nang kito porlukan? Kito sudah mandongarnyo sandiri dari mulut-Nyo!"