¹ Pado satu hari, Yesus badoa di satu tompat. Katiko Dio salose badoa, sorang dari murid-murid-Nyo bacakap kepado-Nyo, "Tuhan, ajarin kamilah badoa samo macam Yohanes mangajari murid-muridnyo." ² Lantas bacakaplah Yesus kepado mareko, "Waktu kamu badoa, bilanglah macam bagini: "AYAH, disucikanlah namo-Mu. Datanglah karajaan-Mu. ³ Bagikanlah samo kami makanan kami nang sacukupnyo satiap hari, ⁴ dan ampunilah doso-doso kami korno kami jugo mangampuni satiap orang nang basalah samo kami. Dan, janglah pulak bawak kami ka dalam pancuboan." ⁵ Lalu Yesus bacakap samo orang tu, "Sakirionyo salah satu dari kalian ado kawannyo dan kamu pogi ka rumah kawan ko tuh pado tongah malam dan katonyo, "Kawan, bagi aku pinjamkan dulu tigo roti, ⁶ karono ado kawanku nang dalam parjalanan singgah di rumahku, tapi baya tak ado pulak apo-apo nang biso awak jamukan samo dio." ⁷ Lantas, kawan ko manjawab dari dalam rumah, "Janganganggu awak! Pimtu udah tagombok pulak awak samo anak-anakku dah lolap. Awak tak larat bangkit ondak mambagi apopun samo ko." ⁸ Aku bilangkan samo ko biarpun kawan kau tu tak ondak bangkit dan mambagi sasuatu samo kau karono kau tu kawannyo, tapi karono kau bagingging mamintaknyo, dio pasti bangkit jugo dan mambagikan samo ko apo nang kau porlukan. ⁹ Jadi, Aku bilangkan samo kamu mintaklah, kamu akan tarimo. Carilah, kamu akan mandapatkan. Kotuklah, pintu akan dibukokan untuk kau. ¹⁰ Karono siapo pun nang mamintak akan manarimo. Siapo pum nang mancari akan mandapatkan. Dan siapo pun nang mangotuk, pintu akan dibukakkan untuk dio. ¹¹ Apokah ado soarang ayah di antaro kau nang ondak mambagikan ular samo anaknyo bilo dio mamintak ikan? ¹² Ato mambaginyo kalajongking, bilo dio mamintak tolur? ¹³ Bilo kamu nang jahat pun tau macam mano mambagi nang baek samo anak-anakmu, apolagi AYAHmu nang di surgo. Dio ondak mambagikan Roh Kudus kepado orang-orang nang mamintak kepdo-Nyo." ¹⁴ Pado satu hari, Yesus mangusir taun dari sorang laki-laki nang bisu. Sasudah taun tu kaluar, orang nang tadinyo bisu tu boleh bacakap dan banyak orang taheran. ¹⁵ Tapinyo, babarapo orang mambilangkan, "Dio mangusir taun pake kuaso Beelzebul, pamimpin taun." ¹⁶ Babarapo orang nang laen ondak man tes Yesus, orang tu mamintak bak Dio manunjukkan suatu tando dari surgo. ¹⁷ Tapi, Yesus tau apo nang orang tu pikirkan dan bacakaplah samo orang tu, "Satiap karajaan nang tapocah-pocah dan saling manyorang pasti hancur. Dan, kaluargo nang anggota-anggotayo saling batongkar pasti taserak-serak. ¹⁸ Jadi, bilo taun jugo taserak-serak dan manontang dirinyo sandiri, macam mano mungkin karajaannyo biso batahan? Aku mambilangkan bagitu korno kamu bilang kalo awak mamakek kuaso Beelzebul untuk mangusir taun-taun. ¹⁹ Bilo Aku mangusir taun-taun pake Beelzebul, pake kuaso apo pulak anak-anakmu mangusir taun tu? Korno tu, orang tu lah nang manjadi hakimmu. ²⁰ Tapi, bilo Aku mamakek kuaso Allah dek mangusir taun, Karajaan A;lah udah datang kepadomu. ²¹ 21 Bilo sasaorang nang kuat dongan sonjato longkap manjago istananyo sandiri, pastilah hartanyo aman-aman sajo. ²² Taoi, bilo ado orang nang talobih kuat dari dio ondak manyorang dan mangalahkannyo, pasti talobih dulu dirampasnyo sanjato-sanjato nang diandalkan orang tu dan mambagi-bagikan harta rampasannyo. ²³ Siapo pun nang tak basamo mandukung-Ku, dio malawan Aku. Jugo siapo pun nang tidak mangumpulkan basamo Aku, dio mancorekan." ²⁴ Apabilo roh najis kaluar dari badan sasaorang, roh tu pogi raun-raun malewati tompat-tompat nang koring bak mancari rehat, tapi dio tak manjumpoi. Korno tu, dio bacakap, 'Awak ondak balek ka rumah nang udah ku tinggalkan.' ²⁵ Pas dio balek, didapatinyo rumah tu udah tasapi borsih dan cantik taratur. ²⁶ Torus, roh najis tu pogi dan mangajak tujuh roh nang talobih jahat dari dio ondak masuk dan tinggal di rumh tu sahinggokan kaadaan orang tu manjadi jauh makin buruk dari keadaan sabolumnyo." ²⁷ Pas waktu Yesus mambilangkan ini, saorang parompuan nang ado di tongah-tongah orang banyak batariak, "Diborkatilah rahim yang sudah melahirkan kau dan buah dada nang manyusui Engkau. ²⁸ Tapi jugo, bacakaplah Yesus, "Bahagiolah orang-orang nang mandongarkan firman Allah dan mamatuhinyo." ²⁹ Katiko orang-orang nang bakumpul samakin banyak, bacakaplah Yesus, "Angkatan ini adolah angkatan nang jahat;orang tu manuntut suatu patando, tak tak satu pun nang ondak di tunjukkan samo orang tu salain tando Yunus. ³⁰ Macam Yunus nang manjadi tando buek orang-orang Niniwe, bagitu jugolah Anak Manusio bak manjadi tando buek angkatan ni. ³¹ Di hari kiamat, ratu dari Selatan ondak bangkit basamo orang-orang dari angkatan ni dan dio ondak manghukum orang tu korno dio datang dari ujung bumi ondak mandogarkan hikmat Salomo, sodangkan di sinin ado sasaorang nang talobih bosar daripado Salomo. ³² Pado hari kiamat, orang-orang Niniwe akan bangkit basamo angkatan ni dan manghukumnyo, korno orang-orang Niniwe batubat pas Yunus badakwah di dopan orang tu, sodangkan di sini ado sasaorang nang talobih bosar daripado Yunus." ³³ Tak ado saorang pun nang sasudah manyalakan palito ondak malotakkannyodi tompat nang tasuruk ato dobawah gantang. Sabaliknyo, orang tu malotakkan palito tu di kaki palito sahinggo orang-orang nang masuk biso manengok cahayonyo. ³⁴ Mato adolah palito tubuh. Bilo matomu elok, samuonyo tubuhmu diponuhi torang. Tapi, bilo matomu jahat. saluruh tubuhmu aka diponuhi kagolapan. ³⁵ Korno tu, bajagu-jagulah bak torang di dalam diri kau tidak manjadi golap. ³⁶ Bilo tubuhmu diponuhi dongan torang dan tak ado bahgian nang golap, tubuh kau tuakan torang samuonyo samo macam katiko sabuah palito manorangi kau samo cahayonyo." ³⁷ Sasudah Yesus salose bacakap, saorang Farisi mangundang Dio untuk makan. Dio pun datanglah, lantas duduk dan makan. ³⁸ Tapinyo, taheranlah orang Farisi tu pas manengok Dio tak mancuci tangan-Nyo talobih dulu sabolum makan. ³⁹ 39 Namun, Tuhan bacakap samo dio, "orang-orang Farisi macam kau mamborsihkan cangkir samo pinggan di luarnyo sajo, tapi di dalam diri ko ponuh kasarakohan dan kajahatan. ⁴⁰ Woi orang-orang hoboh! Botul tak kalo Dio mambuek bagian luar Dio jugo mambuek nang sabolah dalamnyo? ⁴¹ Karono tu, bagikan kaulah apo nang ado di dalam kau macam sadokah kau. Jadi macamtu lah sahinggokan kau botul-botul borsih. ⁴² Akan tatapi, cilakolah kamu, orang-orang Farisi! Korno kamu mambagi parsapuluhan dari salasih,ingu, dan sagala macam tanaman ladangmu, tapi kau manyepelekan kaadilan dan bolas kasihan Allah. Samostinyo, kamu mangorjokan samuo hal tu dingan tak malupokan hal-hal nang laennyo. ⁴³ Cilakolah kamu, orang-orang Farisi korno nang sukak kali kau duduk di tompat nang tarbaek di sinagoge dan jugo sukak kali manarimo hormat di psar. ⁴⁴ Cilakolah kamu korno kau macam makam nang tak ado tandonyo, nang di pijak-pijak orang sacaro tak sadar. ⁴⁵ Torus, salah saorang ahli Taurat bacakap kepado Yesus, "Guru,waktu pas Engkau mambilangkan hal-hal ini, kau juga manghino kami." ⁴⁶ Namun, Yesus manjawab, "Cilakolah kamu, hoi ahli-ahli Taurat! Sobabnyo, kamu manaruhkan boban nang borat bak dipundak orang laen, tapi sajontik jari pun kamu tak ondak manyontuh boban tu. ⁴⁷ Cilakolah kamu korno mambangun makam buek nabi-nabi nang udah dibunuh nenek moyang kau. ⁴⁸ Hinggokan, kamu mambilangkan kepado samuo orang kalo kamu mangakui parbuatan nenek moyang kau; orang tu lah nang mambunuh nabi-nabi tu, tapi kamu nang mambangun makamnyo. ⁴⁹ Itulah sobabnyo, Allah dalam himat-Nyo bacakap, 'Aku akan mangkirim nabi-nabijugo rasul-rasul kepado orang tu, tapi babarapo dari orang-orang anang Aku kirim tu akan dibunuh dan disiksa, ⁵⁰ Supayo darah samuo nabi, nang tacurah samonjak dunio dijadikan, dapat dituntut dari angkatan ini, ⁵¹ mulai dari darah Habel sampe darah Zaharia, nang dibunuh di antara altar dan Bait Allah. Ya Aku bilangkan samo kamu kalo angkatan ini batanggung jawab tarhadap parkaro ni. ⁵² Cilakolah kamu, hei ahli-ahli Taurat! Karono kamu sudah mangambek kunci pangatahuan, tapi kamu sandiri tak ondak masuk dan manghalang-halangi orang laen nang ondak masuk. ⁵³ Sasudah Yesus maninggalkan tompat tu, ahli-ahli Taurat dan orang-orang Farisi mulai mamusuhinyo dan mandosak-Nyo dongan baragam partanyoan. ⁵⁴ Orang tu bapakat ondak manangkap Yesus dongan kato-kato nang udah dibilangkan-Nyo.