¹ Sasudah tu, Yesus manyaborang danau Galilea, yaitu danau Tiberias. ² Banyak orang mangikuti Dia korno orang tu manengok tanda-tanda ajaib nang Dio buat samo orang-orang sakit. ³ Lalu tuh, Yesus naik ka atas bukit dan duduk disana basamo murid-murid-Nyo. ⁴ Waktu tu parayaan Paskah orang Yahudi sudah dokat. ⁵ Sambil manengok disakitar-Nyo dan manengok orang banyak datang ka Dio, Yesus bacakap samo Filipus, "Dimanokah kito biso mamboli roti supayo orang tu dapat makanan?" ⁶ Yesus mambilangkan hal tu buat manguji Filipus korno sabotulnyo Dio sandiri tau apo nang ondak Dio buat. ⁷ Filipus manjawab, "Roti saharga 200 dinar taklah cukup buat orang tu, sakalipun masing-masing hanya mandapat sapotong kocik sajo." ⁸ Ado satu murid-Nyo, yaitu Andreas saudaro Simon Petrus, bacakap samo Yesus, ⁹ "Disini ado saorang anak nang punyo limo roti jelai dan duo ikan, tapi apo artinyo tu buat orang sabanyok ni?" ¹⁰ Yesus bacakap, "Suruhlah samuo orang buat duduk." Ditompat tu banyak rumput, jadi orang-orang tu duduk kiro-kiro limo ribu laki-laki jumlahnyo. ¹¹ Lalu tuh, Yesus mangambek roti-roti tu dan lopas tu mangucap syukur, Dio mambagikan roti-roti tu samo orang nang duduk; bagitu jugolah dibuat-Nyo samo ikan-ikan tu sabanyak nang orang tu mau. ¹² Katiko samua orang sudah konyang, Yesus bacakap samo murid-murid-Nyo, "kumpulkanlah potongan-potongan nang tasiso supayo tak ado nang tabuang." ¹³ Korno tu, samuo murid pun mangumpulkan dan mangisi duo bolas karanjang samo potongan dari limo roti jelai nang ditinggalkan orang nang sudah siap makan. ¹⁴ Katiko orang-orang tu manengok tanda ajaib nang dibuat Yesus, orang tu bacakap, "Dio ni pasti Nabi nang dijanjikan buat datang ka dunio." ¹⁵ Korno dikatahui orang nang banyak tu barancano datang dan mamaksa Dio manjadi Raja atas orang tu, Yesus manyingkir lagi ka bukit saorang diri. ¹⁶ Katiko hari sudah malam, samuo murid turun manuju ke danau ¹⁷ Sawaktu naik ka parahu, orang tu pun manyaborangi danau manuju Kapernaum. Hari sudah golap, tapi Yesus bolum jugo datang manjumpoi orang tu. ¹⁸ Danau pun bagelora korno angin nang sangat kuat barombus. ¹⁹ Lalu, waktu orang tuh mandayung parahu sajauh sakitar 25 ato 30 stadia, orang tu manengok Yesus bajalan di atas danau dan mandokati parahu sahinggo orang tu katakutan. ²⁰ Lalu, Yesus bacakap samo orang tu, "Ini Aku, jangan takut!" ²¹ Sasudah tu, orang tu mau manaikkan Yesus ka dalam parahu dan tiba-tiba parahu itu sudah sampek ka tompat nang orang tu tuju. ²² Besoknyo tu, orang banyak nang masih badiri di saborang danau manengok bahwa tak ado parahu laen disitu, kacuali satu parahu sajo nang murid-murid sudah masuk ka dalamnyo. Tapi, Yesus tak ikut masuk ka dalam parahu itu basamo para murid-Nyo nang sudah brangkat sandiri. ²³ Badatanganlah parahu-parahu laen dari Tiberias ka dokat tompat orang tu makan roti, lopas tu Tuhan mangucap syukur. ²⁴ Katiko orang banyak manengok bahwa Yesus dan para murid-Nyo tak ado lagi disitu, orang tu naik ka parahu-parahu tu dan barangkat ka Kapernaum buat mancari Yesus. ²⁵ Waktu orang banyak tu mandapat Yesus di saborang danau, orang tu batanyo samo-Nyo, "Rabi, kapan Kau sampek disini?" ²⁶ Yesus manjawab orang tu dan bacakap, "Sabotulnyo, Aku bacakap samo mu, kau mancari Aku bukan korno kau sudah manengok tanda-tanda ajaib, malainkan korno kau sudah makan roti sampek konyang. ²⁷ Usah bakarojo buat mancari makanan nang biso binasa, tapi buat makanan nang dapat batahan sampek hidup kokal, nang Anak Manusia akan borikan samo mu korno Anak Manusia tu, Ayah, yaitu Allah, sudah mangkasi pangesahan-Nyo." ²⁸ Lopas tu, orang banyak tu batanyo samo Yesus, "Apo nang harus kami buat supayo kami mangorjokan pakarojoan nang dimaui Allah?" ²⁹ Yesus manjawab dan bakato samo orang tu, "Inilah pakarojoan nang dimaui Allah: porcayolah samo Dio nang sudah disuruh Allah." ³⁰ Orang tu batanyo samo-Nyo, "Kolok bagitu, tanda ajaib apolah nang ondak Kau buat supayo kami manengok dan porcayo samo-Mu? Pakarojoan apo nang Kau buat? ³¹ Nenek buyut kami makan manna di padang balantaro, macam nang tatulis, Dio mangkasi orang tu roti dari surga buat dimakan. ³² Yesus bacakap samo orang tu, "Sabotulnyo, Aku bacakap samo mu, bukan Musa nang mangkasimu roti dari surga, malainkan Ayah-Kulah nang mangkasimu roti nang sajati dari surga. ³³ Sobab, Roti dari Allah iolah Dio nang turun dari surga dan mangkasi hidup ka dunia." ³⁴ Orang tu bacakap samo-Nyo, "Tuhan, kasilah kami roti tu sonantiaso." ³⁵ Kato Yesus samo orang tu, "Akulah roti hidup; orang nang datang samo-Ku takkan lapar lagi, dan orang nang parcayo samo-Ku takkan haus lagi. ³⁶ Tapi, Aku sudah mambilangkan samomu bahwa sakalipun kau sudah manengok Aku, kau totap tak parcayo. ³⁷ Samuo nang dikasi Bapa samo-Ku akan datang samo-Ku, dan nang datang samo-Ku takkan pornah Aku usir. ³⁸ Sobab, Aku turun dari surga bukan buat malakukan kamauan-Ku sandiri, malainkan kamauan Dio nang manyuruh Aku. ³⁹ Dan, inilah kamauan Dia nang manyuruh Aku: supayo samuo nang sudah dikasi-Nyo samo-Ku itu tak ado nang hilang, tapi Aku bangkitkan pada akhir zaman. ⁴⁰ Sobab, inilah kamauan Ayah-Ku, bahwa satiap orang nang manengok Anak dan parcayo samo-Nyo akan mandapatkan hidup kokal, dan Aku akan mambangkitkan dio akhir zaman." ⁴¹ Korno tu, babarapo orang Yahudi mulai manggarutu mangonai Dio korno Dio bacakap, "Akulah roti nang sudah turun dari surga tu." ⁴² Orang tu bacakap, "Bukankah Dio ni Yesus, anak Yusuf, nang ayah dan omaknyo kito konal? Macam mano mungkin Dio biso bacakap, 'Aku sudah turun dari surga?' ⁴³ Yesus manjawab orang tu dan bacakap, "Usah manggarutu diantaro kamu sandiri. ⁴⁴ Tak satupun biso datang samo-Ku, kacuali Ayah nang manyuruh Aku manariknyo, dan Aku akan mambangunkannyo pada akhir zaman. ⁴⁵ Ado tacatat dalam kitab para nabi: 'Dan, orang tu samuo akan diajar oleh Allah.' Satiap orang nang sudah mandongar dan balajar dari Ayah akan datang samo-ku. ⁴⁶ Kolok kegitu, taklah berarti ado orang nang pornah manengok Ayah, kacuali Dio nang datang dari Allah; Diolah nang sudah manengok Ayah. ⁴⁷ Aku bacakap samomu, 'Sabotulnyo, satiap orang nang parcayo mampunyoi hidup kokal.' ⁴⁸ Akulah roti hidup. ⁴⁹ Nenek buyutmu sudah makan manna di padang balantaro, tapi orang tu mati. ⁵⁰ Inilah roti nang turun dari surga, supayo satiap orang mamakannyo dan tak mati. ⁵¹ Akulah roti hidup tu nang sudah turun dari surga. Bilo orang makan roti ni, dio akan hidup salamanyo; dan roti nang sudah Kukasikan demi kahidupan dunia tu adolah tubuh-Ku. ⁵² Orang-orang Yahudi batokak satu samo lain, orang tu bacakap, "macam mano bisa orang ni mangkasikan tubuh-Nyo buat dimakan?" ⁵³ Yesus bacakap samo orang tu, "Aku bacakap samo, sabotulnyo bilo kau tak makan tubuh Anak Manusia dan maminum darah-Nyo, kau tak mampunyoi hidup di dalam dirimu. ⁵⁴ Satiap orang nang makan daging-Ku dan minum darah-Ku mampunyoi hidup kokal, dan Aku akan mambangunkan dio pada akhir zaman. ⁵⁵ Sobab, daging-Ku iolah makanan nang sajati dan darah-Ku iolah minuman nan sajati. ⁵⁶ Siapo nang makan daging-Ku dan minum darah-Ku tinggal di dalam Aku dan Aku di dalam dio. ⁵⁷ Macam Ayah nang hidup mangutus Aku, dan Aku hidup oleh korno Ayah, damikian jugo diao nang mamakan Aku, dio akan hidup korno Aku. ⁵⁸ Inilah roti nang turun dari surga, bukan roti macam nang sudah dimakan nenek buyutmu dan orang tu mati, orang nang makan roti ni akan hidup salamo-lamonyo." ⁵⁹ Yesus mambilangkan samuanyo ni di Kapernaum waktu Dio mangajar di sinagoge. ⁶⁰ Waktu banyak dari murid-murid mandongar mangonai ni, orang tu bacakap, "Ajaran ni sangaat koras. Siapo nang sanggup manarimanyo?" ⁶¹ Korno tau kolok pangikutnyo manggurutu mangonai hal ni, Yesus bacakap samo orang tu, "Apokah cakap-Ku ni mambuatmu tasinggung? ⁶² Kolok bagitu, macam mano bilo kau manengok Anak Manusia naik balek ka tompat asal-Nyo? ⁶³ Rohlah nang mangkasi hidup, sedangkan daging tak baguno sama sakali. Parkatoan-parkatoan nang Kucakapkan samomu iolah roh dan hidup. ⁶⁴ Tapi, ado babarapo diantaro kamu nang tak parcayo." Korno, dari awal, Yesus tau siapo nang tak parcayo dan siapo nang akan mangkhianati Dio. ⁶⁵ Yesus bacakap, "Itulah sobabnyo Aku mambilangkan samomu bahwa tak saorang pun dapat datang samo-Ku, kacuali hal tu dikaruniakan samonyo oleh Ayah. ⁶⁶ Semenjak tuh, banyak pangikutnyo mangundurkan diri dan baronti mangikuti Dio. ⁶⁷ Korno tu, Yesus bacakap samo kaduo bolas murid-Nyo, "Apokah kau jugo ondak pogi?" ⁶⁸ Simon Petrus manjawab Dio, "Tuhan, samo siapolah kami akan pogi? Kaulah nang mampunyoi parkatoan kahidupan kokal. ⁶⁹ Kami sudah parcayo dan mangonal Kau, bahwa Kaulah nang Kudus dari Allah. ⁷⁰ Yesus manjawab orang tu, "Tidaklah Aku sandiri nang mamilih kamu, duo bolas orang ni? Dengan damikian, salah satu dari kamu iolah hantu. ⁷¹ Nang Dio maksud iolah Yudas anak Simon Iskariot, sobab Yudas iolah salah satu dari kaduo bolas murid tu, tapi dio akan mangkhianati Yesus.