¹ Sagalonyo nang ado sojak samulo, nang sudoh kami dongar, nang sudoh kami tengok dengan mato kami, nang sudoh kami parhatikan dan sontuh dengan tangan kami, Iolah Firman kahidupan. ² Kahidupan tu sudah di nyatokan dan kami sudoh malihat-Nyo. Kami basaksi dan mabaritokan samo mu tontang kahidupan kokal tu, nang sudoh ado basamo Ayah dan sudah di nyatokan samo kami. ³ Tontang apo nang sudah kami tengok dan dongar tu, kami baritokan jugo samo mu, agar kalean jugo punyo parsakutuan basamo kami. Sabotulnya, parsakutuan kami tu, iolah basamo Allah Ayah dan Anak-Nyo, Kristus Yesus. ⁴ Samuo nang mangonoi tontang hal ni kami tuliskan ka kau bak sukocito kau manjadi batambah. ⁵ Baginilah barita nang kami dongar mangonoi Dio dan kami sampekkan ka kau, yaitu Allah, Iolah torang dan didalam Dio samo sakali tak ado kagolapan. ⁶ Jiko mambilangkan bahwa kito mampunyoi parsakutuan ka Dio, tapi kito hidup dalam kagolapan, kito mambongak dan mambuat nang tak elok. ⁷ Tapi kan, Jiko kito bajalan dalam torang samo macam Dio di dalam torang, kito mampunyoi parsakutuan satu ka nang lain, dan darah Yesus, Anak-Nyo, mamborsihkan kito dari samuo doso. ⁸ Jika kito mambilangkan bahwa kito tak badoso, kito mambongai diri kito sandiri dan kabonaran tak ado di diri kito. ⁹ Jiko kito mangakui doso-doso kito, Io adalah satio dan adil, bak mangampuni doso-doso kita dan bak mamborsihkan kito dari samuo kajahatan. ¹⁰ Jika kito mambilangkan bahwa, kito bolum porna mambuat doso, kito mambuat Dio manjadi pambongak dan Firman-Nyo tak ado dalam kito.