¹ Paulus, diapanggil sabage rasul Yesus Kristus oleh kahondak Allah, dan Sostenes sodaro kito. ² Kapado jamaah Allah nang ado di Korintus, ka orang tu nang dikuduskan dalam Kristus Yesus, nang dipanggil ondak manjadi orang-orang kudus basamo samuo orang di satiap tompat nang mamanggil namo Tuhan kito Yesus Kristus, antah itu di tompat orang tu, bagitu jugo kito. ³ Anugrah untuk kalian dan dame sojahtro dari Allah, Ayah kito dan Tuhan Yesus Kristus. ⁴ Awak salalu mangucap sukur kapado Allah awak, tontang kamu, karono Anugrah Allah nang di kasihkan ka kamu dalam Yesus Kristus. ⁵ Kolok dalam samuo hal, kamu di kayokan dalam Dio, dalam samuo cakap dan samuo pangatahuan. ⁶ Samo kayak kasaksian tontang Kristus, tolah ditoguhkan dalam kamu. ⁷ Korno itulah, kamu tak kan kakurangan satu pun dalam karunio, samantaro tu, kamu manantikan pernyatoan Tuhan kito, Yesus Kristus, ⁸ Nang jugo manoguhkan kamu sampe pado akhirnyo, supayo kamu tak bacolah pado hari Tuhan kito Yesus Kristus. ⁹ Allah tu satio, nang korno-Nyo kamu di panggil ka dalam parkumpulan dengan Anak-Nyo, Kristus Yesus, Tuhan kito. ¹⁰ Kinin, ku nasehatilah kamu, sodaro-sodaro, domi namo Tuhan kito Yesus Kristus, bak supayo kamu samuo mangatakan hal nang samo, supayo tak ado lagi parpocahan-parpocahan diantaro kamu, malainkan bak supayo kamu di parlongkapi dalam pikiran nang samo dan dalam pandapat nang samo jugo. ¹¹ Kinin, tolah dikasihtaukan ka awak, tontang kamu, sodaro-sodaroku, koluargo Kloe, kolok ado partongkaran di antaro kalian. ¹² Maksudku sakarang adolah, kamu masing-masing bacakap," Awak dari paulus," dan, "Awak dari Apolos," dan "Awak dari Kefas," dan, "Awak dari Kristus." ¹³ Apokah Kristus tabagi-bagi? Apokah Paulus disalibkan untuk kalian? ato, apokah kamu dibaptis dalam namo Paulus? ¹⁴ Aku basukur samo Allah, kolok awak tak mambaptis satu orang pun dari kalian, kacuali Krispus dan Gayus. ¹⁵ Bak supayo jangan ado satu pun nang biso bacakap, kolok kamu dibaptis dalam namo ku. ¹⁶ Aku jugo mambaptiskan seisisi rumah Stefanus; salobihnyo, awak tak tahu, antah awak tolah mambaptis orang lain jugo. ¹⁷ Korno, Kristus tak mangutus aku ondak mambaptis. Tatapi ondak manyampekan Injil, bukan korno pintar bacakap, supayo salib Kristus tak jadi sio-sio. ¹⁸ Korno, parkatoan tontang salib adolah kabodohan samo orang tu nang ondak binaso, tapi bagi kito nang di salamatkan, macam tu adolah kakuatan Allah. ¹⁹ Korno ado tatulis, "Aku akan manghancurkan hikmat orang nang bijaksano, dan kapintaran orang nang pande, Aku akan manolaknyo." ²⁰ Dimanonyo orang nang bijak? Dimano pulaknyo ahli Taurat? Dimano jugo ahli debat zaman ni? Bukannyo Allah tolah mambuek bodoh hikmat dunia ni? ²¹ Korno dalam hikmat Allah, dunia malalui hikmatnyo tidak mangonal Allah, korno tu Allah bakonan, lewat kabodohan pambaritaan Injil ondak manyalamatkan nang mamparcayainyo. ²² Korno, orang-orang Yahudi maminta tando-tando dan orang-orang Yunani mancari hikmat. ²³ Tapinyo, kami mambaritokan Kristus nang disalibkan, nang bagi orang-orang Yahudi jadi sabuah batu sandungan, dan bagi orang-orang nang bukan Yahudi, kabodohan jugo. ²⁴ Jadi, ka orangtu nang dipanggil, antah orang-orang Yahudi, antahpun itu orang-orang Yunani, Kristus adolah kakuatan Allah dan hikmat Allah. ²⁵ Karono nang bodoh dari Allah adolah lobih bijaksano dari pado manusio, dan nang lomah dari Allah adolah lobih kuat dari pado manusio. ²⁶ Tengoklah kaadaanmu pas waktu kamu dipanggil, Sodaro-sodaro, tak banyak nang bijaksano manurut daging, tak banyak nang bakuaso, tak banyak nang tarpandang, ²⁷ Tatapi Allah sudoh mamilih nang bodoh dari dunio ondak mamparmalukan nang bijaksano, dan Allah mamilih apo nang lomah dari dunia, ondak mamparmalukan nang kuat. ²⁸ Dan, Allah mamilih nang tak tarpandang dari dunio dan dipandang rondah, bahkan hal-hal nang tak bararti, ondak maniadokan hal-hal nang bararti. ²⁹ Bak supayo satiap manusio tak dapat bamogah di mukak Allah. ³⁰ Korno Dio lah, kamu ado dalam Yesus Kristus, nang untuk kito dijadikan hikmat, kabonaran, kakudusan, dan panobusan dari Allah. ³¹ Bak supayo macam nang tatulis, "Biarlah orang nang mamogahkan diri, barmogah dalam Tuhan."