(Panjelasan Pandahuluen) ¹ Sudah ada banyak urang bausaha manyusun sabuah catatan tentang kajadien-kajadien nan tolah tajadi di tongah-tongah kita, ² sapaeti halnya catatan nan tolah disampeien kapada kita oleh urang-urang nan sejak samula tolah manjadi saksi mata dan pambarita Firman. ³ Kaena aku tolah mampalajei samunyeh dengan taliti dari awal, baiklah aku juga manulisennyeh sacara teatur bagimu, hai Teofilus nan mulia, ⁴ supaya kamu dapat manontui kaboneen tentang hal-hal nan tolah diajeen kapadamu. (Pambagitontuen tentang Yohanes Pambatis) ⁵ Pada masa pamarintahan Herodes, Raja Yudea, ada saurang iman banama Zakharia nan barasal dai kalompok imam Abia. Bininyeh adalah Elisabet. ⁶ Zakharia dan Elisabet adalah urang-urang nan bobe di mata Allah. Mareka hidup tak becela sasuei dengan samua hukum dan paentah Tuhan. ⁷ Topi, mareka idak mamunyai budak kaena Elisabet mandul dan kadunyeh sudah tuha. ⁸ Katika tiba giliren rombonganyeh untu batugas, Zakharia mandapat tugas untu manjadi imam di hadapen Allah. ⁹ Manurut kabiasaen kaimaman, Zakharia tapilih badasar undian untu masuk ka Bait Allah dan mambake ukupan. ¹⁰ Pada saat ukupan dipasembahen, saluruh umat badoa di lue. ¹¹ Tiba-tiba, malaikat Tuhan manunjuen diri kapada Zakharia dan togak di sabolah kanan altar ukupan. ¹² Katika mandang malaikat otou, Zakharia manjadi legat dan sangat katakuten. ¹³ Topi, malaikat otou bakata kapadanyeh, "Jangan takut, Zakharia, sebab doa pamohonenmu sudah didonge. Binimu, Elisabet, nak malaheen saurang budak jantan bagimu dan kamu nak manamainyeh Yohanes. ¹⁴ Kamu nak senang nian, dan banyak urang juga nak ikut senang nian atas kalaheennyeh. ¹⁵ Dia nak manjadi bose dihadapen Tuhan dan idak nak minum anggur atou minum-minumen koas lainnyeh. Bahkan, sejak dai dalam kandungan omaknyeh dia nak diponuhi oleh Roh Suci. ¹⁶ Dia nak mambuat banyak urag Israel babalik kapada Tuhan, Allah mareka. ¹⁷ Dia nak bajalan mandahului Tuhan dengan roh dan kuasa Elia, untu mambuat hati bapa-bapa babalik kapada anak-anak mareka. Dia juga nak mambuat urang-urang nan idak taat untu babalik kapada hikmat urang-urang bone. Dengan demikian, dia mampasiapen umat nan tolah disediaen bagi Tuhan." ¹⁸ Zakharia bakata kapada malaikat otou, "Bageimonakah aku nak manontui tentang hal ikok? Sebab, aku ikok sudah tuha dan biniku juga sudah lanjut usia. " ¹⁹ Malaikat otou manjawab, "Aku adalah Gabriel malaikat nan togak di hadapen Allah. Aku diutus untu bacakap denganmu dan manyampeien kabe baik ikok kapadamu. ²⁰ Namun, sakaang dongelah! Kamu nak manjadi bisu dan idak dapat bacakap sampei pada hai katika hal-hal ikok tajadi kaena kamu idak pacaya pada pakataenku, nan nak dipenapi pada waktunyeh." ²¹ Samantara otou, umat manunggu Zakharia. Mareka batanya-tanya mangapa Zakharia barada talalu lama di dalam Bait Allah. ²² Katika kalue, Zakharia idak dapat bacakap kapada mareka. Mareka pun tontu bahwa Zakharia tolah mandapat panglihatan di dalam Bait Allah sebab dia teus-maneus mambuat isyarat kapada mareka, topi idak dapat bacakap. ²³ Satolah jangka waktu tugas kaimamannyeh baahir, baliklah Zakharia ka rumahnyeh. ²⁴ Satelah paristiwa otou, Elisabet bunting dan manyauen dirinyeh dewek salama lima bulan. Dia bakata, ²⁵ "Ikoklah nan tolahh Tuhan lakuen kapadaku. Dia mampahatienku dan manghapus aibku dai hantara urang banyak." (Pambagitontuen tentang Yesus Kristus) ²⁶ Pada waktu usia bunting Elisabet barusia enam bulan, Allah mangutus malaikat Gabriel ka sabuah kota di wilayah Galilea, nan banama Nazaret. ²⁷ Dia diutus untu mampasuei saurang parawan nan batunangan dengan saurang jantan nan banama Yusuf, katurunen Daud. Nama parawan otou adalah Maria. ²⁸ Lalu, malaikat otou tiba kapada Maria dan bakata, "Salam, hai kamu nan diberkati! Tuhan basetamu. " ²⁹ Mandonge pakataen otou, Maria manjadi heran. Dia batanya-tanya dalam hatinyeh tentang arti salam otou. ³⁰ Malaikat otou bakata kapadanyeh, "Jangan takut, Maria, kaena Allah tolah mambagien kasih karunia-Nyeh kapadamu. ³¹ Dongelah, kamu nak bunting dan malaheen saurang Budak jantang, dan nak manamai-Nyeh Yesus. ³² Dia nak manjadi bose dan nak disobut Budak Allah Nan Mahatinggi. Tuhan Allah nak mambagien-Nyeh takhta Daud, nenek moyang-Nyeh. ³³ Dia nak mammaentahen atas katurunen Yakub untu salama-lamanyeh dan karajaen-Nyeh idak nak paenah baahir." ³⁴ lalu, Maria bakata kapada malaikat otou, "Bageimona hal ikok nak tajadi sedangen aku bolum balaki?" ³⁵ Malaikat otou manjawab dan bakata kapadanyeh, "Roh Suci nak tiba atasmu dan kuasa Allah Nan Mahatinggi nak manaungimu. Otoulah sebabnyeh, Budak nan nak lahe otou adalah suci dan nak disobut Anak Allah. ³⁶ Dan, tontuilah bahwa Elisabet, dulomu otou, sedang mangandung juga pada usia tuhanyeh. Dia nan dahulu disobut mandul, sakarang sudah bunting salama enam bulan. ³⁷ Sebab, idak ada hal nan mustahil bagi Allah." ³⁸ Dan, Maria bakata, "Sasungguhnyeh, aku ikok hamba Tuhan. Tajadilah padaku sapaeti nan kamu kataen otou." Kamudien, malaikat otou pogi maninggalennyeh. (Maria mangunjungi Elisabet) ³⁹ Pada hai-hai otou, Maria basiap-siap untu sagera pogi ka daerah pegunungen, ka suatu kota di Yehuda. ⁴⁰ Dia masuk ka rumah Zakharia dan mambagien salam kapada Elisabet. ⁴¹ Katika Elisabet mandonge salam dai Maria, anak di dalam kandungannyeh malompat dan Elisabet diponuhi Roh Suci. ⁴² Kamudien Elisabet baseru dengan suara keras, "Diberkatilah kamu di hantara samua batina, dan diberkatilah buah kandunganmu. ⁴³ Siapakah aku ikok sahingga ibu Tuhanku tiba kadapaku? ⁴⁴ Sungguh, katika suara salammu sampei ka talingaku, budak dalam kandungaku malompat kaena senang nian. ⁴⁵ Babahagialah dia nan pacaya bahwa apa nan dikataen Tuhan kapadanyeh nak digenapi." (Pujian Maria Untu Allah) ⁴⁶ Lalu, bakatalah Maria, "Jiwaku mamuliaen Allah, ⁴⁷ dan Rohku basukacita di dalam Allah, Juru Selamatku. ⁴⁸ Sebab, Allah tolah mampaitungen hamba-Nyeh nan hina ikok. Dongelah, mulai sakarang dan sateusnyeh, saluruh katurunen nak manyobutku babahagia. ⁴⁹ Kaena Dia Nan Mahakuasa tolah malakuen hal-hal nan bose kaapdaku, dan sucilah nama-Nyeh. ⁵⁰ Rahmat-Nyeh dibagien dai katurunen ka katurunen kapada urang-urang nan takut pada Dia. ⁵¹ Dia tolah manunjuen kuasa-Nyeh dengan tangan-Nyeh. Dia mancoei-bereien urang-urang nan sombong dalam pikieen hatinyeh. ⁵² Dia manurunen para panguasa di tahta mareka dan maninggalen urang-urang nan rondah hati. ⁵³ Dia tolah mangonyangen urang nan lape dengan kabaiken, topi manguse urang kaya pogi dengan tangan kosong. ⁵⁴ Allah tolah mambagien partolongan kapada Israel, hamba-Nyeh, kaena mangingat rahmat-Nyeh. ⁵⁵ Sabageimona nan tolah Dia kataen kapada nenek moyang kita, kapada Abraham dan katurunannyeh untuk salam-lamanyeh." ⁵⁶ Dan, Maria tunak basama Elisabet kira-kira tiga bulan lamanyeh, lalu dia balik ka rumahnyeh. (Kalaheen Yohanes Pambatis) ⁵⁷ Sakaang tibalah waktunyeh bagi Elisabet untu malaheen saurang budak laki-laki. ⁵⁸ Para tetangga dan kaluargaenyeh mandonge bahwa Tuhan tolah manunjuen rahmat-Nyeh nan bose kapada Elisabet, mereka turut senang nian basama dengannyeh. ⁵⁹ Pada hai nan kadalapan, mareka tiba untu manyunaten budak otou. Mareka hendak manamai budak otou Zakharia, sapaeti nama bopaknyeh. ⁶⁰ Topi, omanyeh bakata, "Idak, dia nak dinamai Yohanes." ⁶¹ urang-urang otou bakata kapada Elisabet, "Idak ada saurang pun di hantara sanak-dulomu nan dinamai dengan nama otou." ⁶² kamudien, mareka mambagien isyarat kapada Zakharia untu mananyaen kapadanyeh, nama apa nan mau dibagiennyeh kapada budaknyeh otou. ⁶³ Zakharia mamintak sabuah papan tulis, dan manulis sapaeti ikok: "Namanyeh Yohanes." Dan samua urang manjadi heran. ⁶⁴ Sakatika otou juga, mulut Zakharia tabuka dan lidahnyeh tabebas. Dia pun mulai bacakap dan mamuji Allah. ⁶⁵ Samua tatangga mareka manjadi takut dan kajadia ikok manjadi bahan pacakapen di saluruh desa pabukiten Yudea. ⁶⁶ Dan, samua urang nan mandonge hal ikok batanya-tanya dalam hati mareka, "Nak manjadi apakah budak ikok nanti?" Sebab, tangan Tuhan manyatainyeh. (Zakharia Mamuliaen Allah) ⁶⁷ Zakahria, bopak Yohanes, juga diponuhi dengan Roh Suci dan banubuat, katanyeh, ⁶⁸ "Tapujilah Tuhan, Allah Israel sebab Dia tolah malawat dan menebus umat-Nyeh. ⁶⁹ Dia tolah mambangkiten tanduk kasalamaten untu kita dai katurunen Daud, hamba-nyeh, ⁷⁰ sapaeti nan dia firmanen malalui nabi-nabi-yeh nan suci sejak dahulu kala ⁷¹ supaya kita disalamaten dai musuh-musuh kita, dan dai tangan samua urang nan mambenci kita. ⁷² Dia malakuennyeh untu manunjuen rahmat kapada nenk moyang kita, dan kaena Dia ingat nak pajanjian-Nyeh nan suci, ⁷³ yaitu sumpah nan Dia ucapen kapada nenek moyang kita Abraham, ⁷⁴ bahwa kita nak dibebasen dai tangan musuh-musuh kita supaya kita dapat malayani-Nyeh tanpa rasa takut, ⁷⁵ dalam kakudusen dan kaboneen di hadapen-Nyeh saumur hidup kita. ⁷⁶ Dan kamu, budakku, nak disobut nabi Allah Nan Mahatinggi, sebab kamu nak bajalan mandahuluei Tuhan, untu mampasiapen jalan bagi-Nyeh. ⁷⁷ Untu mambagien pangetien tentang kasalamaten kapada umat-Nyeh malalui pangampunan atas dosa-dosa mareka. ⁷⁸ Kaena rahmat dan belas kasih Allah kita, sinar Matahari nak manyinari kita dai tompat tinggi ⁷⁹ untu manyinari marek nan tunak dalam kagelapen dan nan barada dalam bayang-bayang maut, untu manuntun kaki kita manuju ka jalan damei sajahtera." ⁸⁰ Maka, budak otou batumbuh samakin bose, dan samakin kuat di dalam roh. Dia tunak di padang balantara sampei tiba waktunyeh untu manunjuen dirinyeh dewek kapada bangsa Israel.