Segel di dahi 144.000 Urang Israel ¹ Satala itu, ambo maliek ampek malaikat tagak di ampek panjuru bumi, sadang manahan ka ampek angin bumi supayo indak ado na batiup di darek, di laut, atopun di batang-batang. ² Kamudian, ambo maliek malaikat dari tampek terbitnyo matohari, jongon mambaok segel dari Allah na hidup. Inyo baseru jongon suaro kare kapado kaampek malaikat na ala diagi kuaso untuk marusak bumi jongon laut tadi, ³ "Janganlah marusak bumi, laut, ato batang-batang sabalum kami salase mangangi tando segel pado dahi hamba-hamba Allah kito" ⁴ Ambo mandanga jumlah sidak na disegel sabanyak 144.000 urang. Sidak sadonyo barasal dari satiok suku anak-anak Israel: ⁵ Dari suku Yehuda duo bale ribu na disegelkan, dari suku Ruben duo bale ribu, dari suku Gad duo bale ribu, ⁶ dari suku Asyer duo bale ribu, dari suku Natfali duo bale ribu, dari suku Manasye duo bale ribu, ⁷ dari suku Simeon duo bale ribu, dari suku Lewi duo bale ribu, dari suku Isakhar duo bale ribu, ⁸ dari suku Zebulon duo bale ribu, dari suku Yusuf duo bale ribu, dari suku Benyamin duo bale ribu. na ala disegelkan. Lautan Manusio ⁹ Satala itu ambo maliek, sasunggunyo sajumlah gadang manusio na indak dapek dihitung jumlahnyo, dari sadonyo negara dan suku dan bangsa jongon bahaso, tagak di mukko tahta dan di mukko Anak Domba, mamakke juboh putih jongon dahan-dahan palem di tangan sidak; ¹⁰ dan sidak baseru jongon suaro kare, "Kasalamatan kadi Allah kami na duduk di ate tahta, jongon kadi Anak Domba." ¹¹ Dan, sadonyo malaikat na sadang tagak di sakaliling tahta tu jongon di sakaliling tuo-tuo, jongon ka ampek makhluk tu, sidak sujud di mukko tahta tu jongon manyambah Allah, ¹² jongon mangeccek, "Amin! pujian dan kamulioan dan ucapan syukur dan kaharmotan jongon kakuasoan, dan kaperkasoan kadi Allah kito sampe salamo-lamonyo.Amin!" ¹³ Kamudian, saincek dari tuo-tuo tu mangeccek jongon batanyo kapado ambo, "Siapokah sidak na mamakke juboh putih ko jongon dari mano sidak datang?" ¹⁴ Mako,a mbo mangeccek kapadonyo, "Tuan ambo, kau mangatauhinyo." Lalu, inyo bacakkap kapado ambo, "Sidak iyolah urang-urang na ala kalua dari panganiayoan gadang jongon ala mambasuh jubah sidak jongon mamutihkanyo di dalam darah Anak Domba. ¹⁵ Karano itu, sidak tagak di mukko tahta Allah jongon malayani INyo siang jongon malam di bait-Nyo; dan Inyo na duduk di ate tahta tu akan tingga di antaro sidak. ¹⁶ Sidak indak akan lapa ato haus lai; atopun matohari inda akan manyakkiti sidak atopun hangek terik na lainnyo. ¹⁷ Sabab, Anak Domba na di tanga-tanga tahta tu akan manjadi gambalo sidak dan akan manuntun sidak ka mato a'i kahidupan; dan Allah akan manghapus sagalo a'i mato dari mato sidak."