Yohanes Manjelaskan tantang Kitab Ko ¹ Panyataan dari Yesus Kristus, na agikan Allah kapado-Nyo untuk ditunjukkan kapado hamba-hamba-Nyo tantang hal-hal na segera harus tajadi. Yesus Kristus mangagikan panyataan ikko malalui malaikat-Nyo untuk disampekan kapado Yohannes, hamba-Nyo. ² Yohanes ala manjadi saksi firman Allah dan pulo Yesus Kristus, ate sagalo sasuatu na ala dilieknyo. ³ Diberkatilah urang na mambacco jongon suaro kare firman nubuatan ko dan diberkatilah pulo sidak na mandangakannyo jongon malakukan apo na tatulis di dalamnyo, karano waktunyo ala dakkek. Salam Yohanes kapado Katujuh Jemaat di Asia ⁴ Dari Yohanes, kapado katujuh jemaat na ado di Asia. Anugrah dan damai sajahtra untuk kau dari Inyo Na Ado, Na ala Ado, dan Na akan Datang; serta dari katujuh roh na ado di mukko tahta-Nyo, ⁵ dan dari Kristus Yesus, Saksi na satio, na duluan bana bangkik dari antaro urang mati jongon panguaso ate rajo-rajo di bumi. Kadi Inyo, na mangasihi kito dan malapekan kito dari doso-doso kito jongon darah-Nyo, ⁶ dan ala manjadikan kito manjadi saincek karajaan, imam-imam kadi Allah jongon Ayah-Nyo, kadi Inyolah kamulioan dan kakuasaan sampe salamo-lamonyo! Amin. ⁷ Lieklah, Yesus datang jongon awan-awan, dan satiok mato akan maliek Inyo, bahkan sidak na ala manyuccuk-Nyo; dan sadonyo bangsa di bumi akan maratap karano Inyo. Ya, ikko akan tajadi! Amin. ⁸ "Ambo iyolah Alfa jongon Omega, firman Tuhan Allah, Na Ado, jongon ala Ado, Na Mahakuaso." Pangliekan Yohanes tantang Anak Manusio ⁹ Ambo, Yohanes, saudaro jongon sasamokau na ambik bagian dalam kasusahan, dalam Karajaan, dan dalam katekunan di dalam Yesus, barado di pulau na di sabut Patmos karano firman Allah dan kasaksian Yesus. ¹⁰ Ambo dikuasai Roh pado Hari Tuhan, jongon ambo mandanga suaro nyaring dari balakkang ambo sakiro bunyi tarompet, ¹¹ "Tuliskanlah sadonyo na kau liek ka dalam sabuah bukku dan jongon kirimkan itu kapado tujuh jemaat: Efesus, Smirna, Pergamus, Tiatira, Sardis, Filadelfia, jongon Laodikia." ¹² Lalu, ambo manoleh untuk maliek suaro na mangeccek kapado ambo. Katiko ambo manoleh, ambo maliek tujuh kaki dian ame, ¹³ dan di tanga-tanga kaki dian tu, ambo maliek sasaurang sakiro Anak Manusio, mamakke jubah sampe ka kaki dan sabuah salempang ame di dado-Nyo. ¹⁴ Kapalo jongon rambut-Nyo putih sakiro bulu domba, saputih salju; dan mato-Nyo sakiro nyalo api. ¹⁵ Kaki-Nyo bakilek sakiro tambago na mambara dalam parapian jongon suaro-Nyo sakiro gemuruh a'i bah. ¹⁶ Di tangan kanan-Nyo, Inyo mamaccik tujuh bintang dan dari mulut-Nyo kalua sabua lading tajam bamato duo, jongon mukko-Nyo bacahayo sakiro matohari na terik. ¹⁷ Katiko ambo maliek Inyo, ambo jatuh di kaki-Nyo sakiro urang mati. Namun, Inyo malatakkan tangan kanan-Nyo ka ate ambo jongon bacakkap, "Jangan takkut; Ambolah Na Duluan jongon na Akhir, ¹⁸ dan Na Hidup. Ambo ala mati, tatapi lieklah Ambo hidup sampe salamo-lamonyo, dan Ambo mamaccik kunci maut jongon kunci Hades. ¹⁹ Karano itu, tuliskanlah hal-hal na ala kau liek, jongon hal-hal na tajadi kini dan hal-hal na kan tajadi sasudahnyo. ²⁰ Ikkolah rahasio tantang tujuh bintang na kau liek ditangan kanan-Ambo jongon tujuh kaki diam ame tu. Tujuh bintang tu iyolah paro malaikat dari tujuh jemaat; dan tujuh kaki dian tu iyolah tujuh jemaat."