¹ Kini, manganai kadatangan Tuhan kita, Yesus Kristus, dan saat disatukannyo kito basamo jongon Inyo, kami mamintakkau, Saudaro-saudaro, ² supayo kau jangan lakke bingung dalam pikkiran kau ato galisoh saat mandanga bahwo hari Tuhan ala datang, elok dari roh ato pesan ato surek na saolah-olah dari kami. ³ Jangan padiakan saurang pun manyasekkan kau jongon caro apo pun. Sabab, hari tu indak akan datang sabalum kemurtadan datang dan si manusio jahek dinyatokan, yaitu si anak kabinasoan, ⁴ na malawan dan maninggikan dirinyo tahadok sadonyo na disabut Allah ato na disembah urang; dan inyo akan mangambik tampek duduk di Bait Allah dan manyatokan dirinyo sabage Allah. ⁵ Indak ingatkah kau bahwo katiko ambo masih basamo kau, ambo mambaritaukan hal ko kapado kau? ⁶ Kini, kau tau apo na manahan inyo sahinggo baru pado saatnyo nanti, inyo akan dinyatokan. ⁷ Sabab, misteri ka durhakkoanala sadang bakarajo, hanyo inyo na kini manahannyo akan tetap manahannyo sampe inyo disingkikan. ⁸ Kamudian, manusio jahek tu akan dinyatokan. Namun, Tuhan akan mambunuhnyo jongon napas mulut-Nyo dan malenyapkannyo jongon kadatangan-Nyo. ⁹ Kadatangan si manusio jahek tu akan salaras jongon pakarajoan Iblis, disartoi jongon sagalo maccam kuaso, tando-tando ajaib, dan mukjizat-mukjizat palsu; ¹⁰ dan jongon sadonyo muslihat jahek bagi sidak na akan binaso karano manulak untuk mangasihi kabenaran sahinggo disalamatkan. ¹¹ Oleh karano itu, Allah mangirim kasesatan na hebat ate sidak supayo sidak piccayo pado kabohongan, ¹² sahinggo sidak sadonyo dapek di hakimi, yaitu sidak na indak piccayo pado kabenaran dan sanang jongon kajahekan. Kau Dipilih untuk Disalamatkan ¹³ Saudaro-saudaro na dikasihi Tuhan, kami harus accok basyukur kapado Allah untuk kau. Sabab, Allah ala mamilih kau sajak samulo untuk disalamatkan malalui pangudusan samo Roh dan iman dalam kabenaran. ¹⁴ Untuk itulah Allah mangimbo kau malalui Injil na kami baritokan supayo kau mandapekkan kamulioan Tuhan kito, Yesus Kristus. ¹⁵ Jadi, Saudaro-saudaro, tagaklah teguh dan pacciklah ajaran-ajaran na ala diajarkan kapadokau, elok malalui kato-kato maupun malalui surek kami. ¹⁶ Kini, kironyo Tuhan kito, Yesus Kristus, surang jongon Allah Ayah kito, na tala mangasihi kito dan mangagi kito panghiburan kekal dan pangharapan na indah malalui anugrah, ¹⁷ manghibur dan manguekkan hatikau dalam satiok pakarajoan dan pakatoan na elok.