¹ Salam dari Paulus, Silwanus, dan Timotius, kapado jemaat di Tesalonika dalam Allah, Ayah kito, dan Tuhan Yesus Kristus. ² Anugrah dan damai sejahtera bagikau dari Allah, Ayah kito, dan Tuhan Yesus Kristus. ³ Kami harus salalu basyukur kapado Allah untuk kau, Saudaro-saudaro, dan memang sapatutnyolah damikian. Sabab, imankau batumbuh jongon malimpah dan kasih na kau punyoi masing-masing tahadok sasamokau samakkin gadang. ⁴ Oleh sabab tu, kami surang mangeccek jongon bangga manganai kau di mukko jamaat-jamaat Allah karano kasabaran dan imankau di tanga sadonyo panganiayoan jongon pandaritoan na kau alami. Tantang Panghakiman Allah ⁵ Ikko iyolah bukti panghakiman na adil dari Allah, bahwo kau dianggap layak bagi Karajaan Allah karano kau juo ala mandarito. ⁶ Lagi pulo, adil bagi Allah untuk mambale jongon panindasan kapado sidak na mambuek kau mandarito, ⁷ tatapi mangagi kalegaan kapado kau na ditinde, saat Tuhan Yesus dinyatokan dari surga basamo paro malaikat-Nyo na dahsyat, ⁸ dalam api na manyalo, untuk malakukan pambalasan kapado sidak na indak manando Allah dan indak taat kapado Injil Yesus, Tuhan kito. ⁹ Sidak akan mangalami hukkuman kabinasoan na kekal, jauh dari hadirat Tuhan dan dari kamulioan kakuasoan-Nyo ¹⁰ katiko Inyo datang untu dimuliokan di antaro urang-urang kudus-Nyo dan untuk dikagumi diantaro sadonyo urang na ala piccayo sabab kasaksian kami kapado kau dipiccayoi. ¹¹ Karano itu, kami accok badoa untuk kau, kironyo Allah kito manganggap kau layak akan panggilan kau dan mamanuhi satiok kainginan untuk babuek elok dan pakarajoan iman jongon kuaso-Nyo, ¹² supayo namo Tuhan Yesus kito dimuliokan di dalam kau, dan kau di dalam Inyo, sasue jongon anugrah Allah kita dan Tuhan Yesus Kristus.