¹ Sulo e' sekening se tuyau ya' so nai kawang umet Lamin ya' atek bue' iti, pisiu pala' tusu' ra malaekat biti, " Tai na ngan muving na ku' usun tana' ti tusu' da cawan murka Allah iti." ² Malaekat ya' aring-aring iti tai muving cawan na ku' usun tana'; nenga na kenai bengo' ya' pina' ngan petuyen ketu' kelunan ya' un kedana' sen ngan ya' tunuk pala' udoq. ³ Sulo ketai malaekat ya' kedue ti muving anun na ku' usun laut ti; sungai laut ti tai pekaliu daa' kelunan matay, neng iti matay singket sen ira' murip ku' dalem laut ti. ⁴ Malaekat ya' ke teleu muving anun na ku' sungai-sungai ngan ketu' mate sungai, sulo sungai a pekaliu daa'. ⁵ Neng iti E' sekening daau malaekat ya' un pengaren usun sungai iti pisiu," Adil O', Iku' ya' un ngan lepek un, Iku' ya' bue', ye ufan na Iku' ya lepek pelabu' hukuman ini. ⁶ Ye ufan na ire ya' lepek muving daa' kelunan ira' bue' atay penaway ngan nabi-nabi Yo', ngan Iku' lepek mencay daa' kume ire ke medu'a; puyan inye siu' ta pala' ire." ⁷ Sulo E' sekening daau mezbah iti mipa, " Aa' Tuhan Allah, ya' un kuasa usun ketu' se ineu ni, pengadilan No' atek lan ngan adil." ⁸ Malaekat ya' ke pat iti muving cawan na ku' usun mate dau, ngan kume ye Allah na' kuasa ke pelenyo kelunan neng apui. ⁹ Ire tai lenyo soon pana paang nga ya' dahsyat, ngan ire muto pejaat ngan pesuto' ngaran Allah ya' un pengayeng usun penuyen-penuyen ini, ngan nce un ufa' bertobat ngan nce ufa' pempau pejaau ngaran Na. ¹⁰ Malaekat ya' ke leme muving cawan na ku' usun takhta sen biti, sulo dalem lebu' pengaren ra ku' iti tay mentem. Ire nyemaat jela' ra ufan na sakit ale'. ¹¹ Aken ire pejaat Allah ya' ku ' surga ti lawe ufan tegen na sakit ale' ngan petuyen ya' sengarem ale' iti, ngan ire sa' nce ufa' bertobat umet puyan-puyan ra. ¹² Malaekat ya' ke nem muving cawan na ku' sungai jaau, Efrat, sulo sungai ti mengkang, apan na tay un janan kume pengaren-pengaren ira' nay umet base timur. ¹³ O iti e' menaat teleu ra brue jameng ya' kebaan dite saai ra, nai kawang umet ba' alung unan dan umet sen, ngan umet nabi ya' nyelifo. ¹⁴ Ire ira' brue-brue jaat umet baley jaat ya' uyai kedana'-kedana' ajaib. Sulo ketai ra petegu' pengaren-pengaren umet ketu' usun tana' ke pelepeng ire pengan ke pepatai neng dau jaau Allah ya' pengaren usun ketu' se ineu ni. ¹⁵ "Menaat na ! Aki' kenai ku' kebaan kelasit da ! Bangen taway na i' ya' muto jaga, ya' lemuto un sapai, apan na nce ugai buk ye tai masat ngan nce dura' pesuuk ka ti." ¹⁶ Sulo ra engkin ire kelepeng ku' se ufan ya' ire kume Harmagedon dalem isiu Ibrani. ¹⁷ Malaekat ya' ke tusu' muving cawan na ku' belua' awang ti. Sulo un isiu ya' so nai kawang umet ya' atek bue' ngan usun pengarenNa, petira', " Lepek na." ¹⁸ Sulo bekilet, mengiri pa daau langit, engkau ngan liung tana' ya' sengarem- ya' iti liung tana' ya' nce un menuyan lu' pa umet penaring kelunan un usun tana' ini. Mengiti sengaremma liung tana' iti, ¹⁹ Nenga na lebu' jaau iti tai bese teleu naan, ngan lence na lebu-lebu jaau ira' umet bangsa-bangsa. Nenga na Allah ngetaway neng Babel Jaau, daleu Wa mencai kume lebu iti cawan ya' sangan soon anggur kegeraman murkaNya. ²⁰ Singket pulau deram tai lenyo ngan murung-murung mengiri pa empey lu tegu' a nuun. ²¹ Usan bateu sengim ya' kase, ngan singket naan baat ta se talenta, nay labu' umet langit mencit kelunan. Aken nye ra sa' pejaat Allah ta usun ra siu usan bateu sengim iti, ye ufan na penuyen iti ale' sengaremma.