¹ Empei nyain o inye, Yesus ti tai masat singket kota-kota ngan lebu'-lebu', tai bara' Isiu Tuhan. Due sui' pulu' murid A ti, ² ngan ledo-ledo ya' lepek (Iye) pelepo met balei-balei ja'at ngan sakit, yaiti: Maria, ya dulu kume, Magdalena, ya lepek nai puke' met tuju' roh ja'at, tai baya Iye, ³ ufan nai ngan ire, Yohana, ledo Khuza, se kelunan ya pedemon ligit kume Herodes ti, Susana, dan kadu' le'e ledo-ledo ira nai. Mung ledo ira inye, mebo ire ngan ineu-ineu ya' un pala' ire. ⁴ Daleu nai kelunan kadu' met kota-kota, tai kelepeng ngan Yesus ti, sulo A pisiu ngan pekata, ⁵ "Un se dulu tai menufo beni'. Dale a menufo, un balai beni' biti tai labu' neng sare janan. Sulo kelunan sut a ngan manuk-manuk nai uman a pe mo'o. ⁶ Un pa balai, tai labu' unsun tana' ira un bateu. Daleu kenei beni' iti ufa ka murip, sulo tai ra salai, ufanna mengkang, empei un sungai un. ⁷ Un balai le'e, tai labu' ko tana' ira kadu' sua'. Daleu kenai sua'-sua' ti murip sedingan ngan beni' ti, sulo ra mesip iye pe matai. ⁸ Un pa balai le'e tai labu' ko usun tana' ira' tiga, ngan nai murip, ngebua' seato sui'." Lepek A pisiu menginye, sulo Yesus ti ngelalo: "I' ira' un kelinge ufan ra sekening, tiga nira sekening!" ⁹ Sulo murid-murid-A ti puteu, ineu kedep (O') neng pekata inye. ¹⁰ Daau A mipa: "Ikam lepek un karunia apan nem tisen ketu' rahasia Kerajaan Allah ya ence un nai tula', aken tuk kelunan-kelunan ira' ini, Aki kabara kume ire ngan pekata, apan buk ra na'at, empei ra putok un, ngan buk ra sekening, empei ra tisen un. ¹¹ Ini kadep (E') met pekata irai: Beni' inye, kua' ngan isiu Tuhan. ¹² Ira' labu' ko sare jalan, inye kua' ngan kelunan ya' lepek sekening, sulo nai sitan ala' katuk inye met dalem atai a, apan ra ence mengelan ngan ence selamat. ¹³ Un ya' labu' ko tana ira' un bateu, kua ngan kelunan ya' sekening isiu inye, ala' katuk inye ngan bangen, aken empei ra un aka un. Jaki' lu ra mengelan, ineu le'e buk ra tai siu' taru, empei ra mengelan isiu Tuhan (murtad) le'e un. ¹⁴ Ira' labu' ko usun tana ya' kadu' sua', kua' ngan kelunan ya' sekening isiu inye, aken na atai ya' dawa' (kuatir), kekayaan, ngan mung peniga neng usun tana' ni tai mesip urip ra, apan bua' ra ya' sak ence un nai tula'. ¹⁵ Ira' labu' ko tana' ya tiga, kua' ngan kelunan ira' sekening isiu iti, pedemon a dalem atai ra ya tiga, ngan nai ngebua' dalem ketekunan. ¹⁶ Empei un kelunan ya' purip apui, sulo ra mekep ngan tajeu atau menyu'uk a ko enta' tilung un, aken ire ke pelek neng usun kaki dian ti, apanna mung dulu ya' nai ko' dalem lamin sinteng na'at dema a. ¹⁷ Ufanna empei un ineu ya' su'uk ya' ence nai tula' un, ngan empei un se ineu ya' su'uk, ya' ence dulu katisen ngan tai bara' un kume kelunan kadu' un (diumumkan). ¹⁸ Neng inye, ileu lemuto putok ngempei ufan lu sekening. Ufanna i' ya' un anun, pala iye (dulu) mencai, akenna i' ya' ence un anun, (dulu) ka ala' ineu ya un pala' iye, mung ineu ya ye pekimet un pala' ye. ¹⁹ Sinen ngan senganak-senganak Yesus ti nai pala' Iye, empei ra sinteng ka sebien Iye un, ufanna kadu' ale dulu. ²⁰ Sulo ketai dulu bara kume Iye: "Sinen-O ngan senganak-senganak-O un ko' awang ti, nai ra ufa' ka petegu' ngan Iku. ²¹ Aken daau A mipa ire: "Sinen-E ngan senganak-senganak-E yaiti ire, ya' sekening isiu Tuhan ngan uyai a (dalem urip ra). ²² Un se dau, Yesus peging muri-murid-A ti tai neng se alut, sulo A pisiu pala' ire: "Tiga na teleu tai ko mase dipa beng sungai ni." Sulo ketai ra no'o. ²³ Daleu ra pekalut neng belua' sungai ti, sulo Yesus ti luntu'. Dalem sekejep nai kepo kase ko beng sungai inye, sulo alut releu da sangan so'on sungai ngan dani' ufa' ketai ka'am (dalam bahaya). ²⁴ Tuk kenai murid-murid-A ti menage Iye, un daau ra: "Guru', Guru, ni ketai lu ka matai (binasa)!" Sulo kenai A tage, miau kepo kase ngan lupak ja'au iti. Sulo kepo kase ngan lupak ja'au iti penco tai salai. ²⁵ Sulo A puteu ire: "Ko' empei pengelan (iman) nem?" To takut peging mo'o tawai nira, sulo ra pisiu neng ata ire: "I' kelunan ini, to tunuk lu' na kepo ngan sungai pala' Iye?" ²⁶ Nai Yesus ngan murid-murid-A ti pafi' ko tana' kelunan Gerasa, mase dipa Galilea. ²⁷ Lepek nai Yesus ti ko da'ai, sulo kenai se lakei petegu' ngan Iye; un balei ja'at dalem kelunan inye. Ufan met nya'in nia ence un sapai ngan lamin, ufan turo' ko liang a. ²⁸ Daleu a mena'at Yesus ti, sulo a ngelalo ngan tunuk neng jume-A ngan pisiu so so: "Ineu ya' Iku ka uyai pala' ami', Yesus, Anak Allah ya Empau? Aki' nyat pala' Iku, apan O ence menyakit aki'." ²⁹ Iye bara' mengiri daau, ufanna Yesus ti pesarap balei ja'at iti apanna tai kawang met kelunan iti. Ufan tipan ale' na balei ja'at iti menanit iye, nga ta ufan dulu ngaput iye, akenna muat ale ufan a meneto mung kaput iti ngan balei ja'at iti tai engkin iye ko ufan ra' ngieu. ³⁰ Ngan Yesus ti puteu pala' iye: "I' ngaran o?" Daau a mipa: "Legion," ufanna kadu' ale balei ja'at dalem iye. ³¹ Sulo mung balei ja'at biti nyat pala' Yesus ti, apanna Iye ence pesarap ire tai ko' dalem bila maut (neraka). ³² Un se kelempun bafui nai den penguman neng be murung, sulo ketu' balei ja'at biti nyat pala' Yesus ti, apanna Iye so'on ire tai ko' dalem bafui-bafui inye. Yesus ti na' ineu ya ire nyat. ³³ Sulo ketai mung balei ja'at binye ko dalem bafui-bafui iti. Mung bafui biti tai tepum met sare bila, tai ko dalem beng sungai ngan matai lenyet. ³⁴ Lepek kelunan-kelunan ya' jaga' bafui-bafui iti na'at puyan inye, sulo ketai ra lap, bara' puyan inye kume dulu ko' kota ti, peging lebu'-lebu' ira' dani'. ³⁵ Sulo kenai dulu kawang, ufa' nai mena'at puyan inye. Ire nai pala' Yesus ti ngan tegu' kelunan ya lepek puke met balei-balei ja'at ira, uku' dani' taket Yesus ti; ufan un sapai nia ngan nai tiga na kimet a. Sulo ra takut. ³⁶ Kelunan-kelunan ira' mena'at puyan iti, tai puteu pala' ire, ngempei ufan kelunan ya un balei-balei ja'at biti, sinteng tiga. ³⁷ Sulo ketu' kelunan ira' un ko Gerasa ti nyat pala' Yesus, apan A tai lap ire, ufan ra takut. Sulo kenai Yesus ti ko dalem alut, tai pekalut peluet. ³⁸ Kelunan ya' lepek puke met balei-balei ja'at irai, nyat apan a sinteng nai baya' Iye. Aken, Yesus ti so'on ye tai (uli'). Un daau-A: ³⁹ "Tai noo' uli' ko' lamin o ti ngan bara' ketu' ineu ya' Allah lepek uyai kume iku'." Sulo ketai kelunan inye bara' ketu' ineu ya' lepek Yesus ti uyai kume iye. ⁴⁰ Daleu kenai Yesus ti peluet, mung kelunan kadu' tai mafang Iye, ufanna ire bang pekena Iye. ⁴¹ Nai se kelunan, ngara a Yairus. Iye se pengenjaau (kepala) dalem lamin sebayang. Ngan tunuk ko jume taket Yesus ti, sulo anyat pala' Iye, apan Yesus ti nai ko' uma' a ti, ⁴² ufan anak ledo a, ya' lepek due siu' pulu' uman, dani' ke matai. Dalem jalan tai ko inye, Yesus ti pesip so'on kelunan kadu'. ⁴³ Ufan un pa se ledo ya' sakit (pendarahan) ngan empei un dulu ya' sinten na' puat kume iye un. ⁴⁴ Sulo kenai a ngedani' Yesus ti met likut ngan engkang sare sapai A ti. Daleu iti, empei un daa' nai met iye le'e un. ⁴⁵ Daau Yesus ti: "I' ya' nai man Aki ni?" Empei un se dulu ya' ufa' ke bara' puyan inye (mengaku) un, sulo Petrus ti pisiu: "Guru', (empei O na'at dite) kelunan kadu' nai pempun ngan mengau Iku. ⁴⁶ Aken daau Yesus ti mipa: "Un se dulu ya' nai engkang Aki, ufanna Aki tisen, un kuasa ya' nai kawang met Aki." ⁴⁷ Daleu ledo ti mena'at, puyan a ti nai tula', sulo kanai a selegen, tunuk pala' Iye ngan bara' kume kelunan kadu' ineu ufan a tai man sare sapai-A ngan daleu iti a penco nai muat. ⁴⁸ Sulo A pisiu ngan ledo inye: "Anak-E, ufan o un iman, nga too' selamat na, tai noo' ngan bangen!" ⁴⁹ Daleu Yesus ti pisiu, nai se dulu met pengelamin pengenjaau lamin sebayang ti, un kenya: "Matai na anak o da, mo' sa' uyai tusa kume Guru' na le'e!" ⁵⁰ Aken ufan Yesus ti sekening, sulo A pisiu ngan Yairus ti: "Nyem takut, bang mengelan na, anak o ti ka selamat." ⁵¹ Daleu nai Yesus ti pafi' ko Yairus ti, empei Yesus ti ufa' dulu nai kamin ngan Iye un, bang Petrus, Yohanes, ngan Yakobus penging tamen ngan sinen anak inye. ⁵² Mung dulu menirau ngan ngelumo anak inye. ⁵³ Aken na Yesus ti bara' kume ire: "Nyem menange, empei a matai un, luntu' lu a ni." ⁵⁴ Sulo Yesus ti man usu' anak inye ngan ngelalo, un daau-A: "Anak, beti' na!" ⁵⁵ Nai berue anak inye peluet pala use a, ngan iye penco nai nengkedeng. Sulo Yesus ti so'on ra na' penguman kume iye. ⁵⁶ To kejet lu na tu'a anak inye mena'at dite puyan inye, aken empei Yesus ti ufa' ire ka bara' puyan inye kume kelunan kadu' un.