¹ Daleu dau Sabat, tai Yesus ti masat ko ume gandum, sulo murid-murid-A ti ala' ngan uman a, ire ngebue' bua' inye ngan usu' ra. ² Aken un kura' use da kelunan Farisi nai pisiu: "Ineu nem uyai puyan ya' dulu miau buk dau Sabat?" ³ Daau Yesus ti mipa ire: "Empei nem baca ineu ya' Daud ngan tuyang a ti uyai daleu releu la'au da un mu, ⁴ mengempei tai a ko dalem lamin Allah, ala' luti' ya' dulu mencai, ngan iye na' pa kume tuyang ira' nai baya' iye, atek lan na empei dulu ira' se sinteng uman luti' inye un, bang imam lu'?" ⁵ Daau Yesus ti bara' kume ire le'e: "Anak Kelunan, Ye Tuen neng usun dau Sabat ini." ⁶ Daleu dau Sabat ira' se, sulo ketai Yesus ti ko' dalam lamin sebayang, ngan na' katuk ko' iti. Ko' inye, un se kelunan ya matai usu' ta'au a. ⁷ Penisen-penisen Taurat peging kelunan-kelunan Farisi pekelung Yesus ti, mena'at dite Iye ka puat dulu neng dau Sabat, apan ra sinteng bara' penyala'-A. ⁸ Aken, Iye lepek tisen ineu ya' un dalem kimet ra, sulo A penco pisiu ngan kelunan ya' matai usu' ta'au inye: "Beti' ngan nengkedeng na ko jume ni!" Sulo kenai kelunan inye beti' ngan nengkedeng. ⁹ Daau Yesus ti pisiu ngan ire: "Aki puteu nem aring: Ya' empei ya ileu sinteng uyai neng dau Sabat, puyan ra ja'at atau puyan ra tiga, menyelamatkan urip dulu atau ngeja'at ire?" ¹⁰ Lepek inye, sulo A mena'at ko' ata ire mung, ngan bara' kume kelunan sakit inye: "Mencai usu' o na kini!" Kelunan inye baya' a, daleu iti kenai usu' a ti tiga. ¹¹ Sulo ra laset, ngan pekua' kimet, ineu ya' ire ufa' ka uyai pala' Yesus ti. ¹² Daleu inye, Yesus ti tai ko' sebayang ko' murung. Seng alem A sebayang pala' Allah ti. ¹³ Daleu dau belua neng mesut a ti, sulo A bai murid-murid-A ti nai pala' Iye ngan menile' met ire, due pulu' sui ira' ka jadi rasul: ¹⁴ Simon ya' ngaran a Petrus, ngan Andreas senganak Simon, Yakobus ngan Yohanes, Filipus ngan Bartolomeus, ¹⁵ Matius ngan Tomas, Yakobus anak Alfeus, ngan Simon ya' dulu kume kelunan Zelot, ¹⁶ Yudas anak Yakobus, ngan Yudas Iskariot, ya' tai pebelei Yesus ti (jadi penghianat), ¹⁷ Sulo kenai A kenta' engan ire, ngelungun ko ufan ira' data: ko' inye ketu' murid-A kelepeng, un pa kelunan kadu' ya' nai met sukung Yudea, Yerusalem, met daerah pantai Tirus ngan Sidon. ¹⁸ Ire nai ufan ra ufa' ka sekening daau A, ngan nebelom apan ra nai muat met sakit ra; un pira' lepek nai muat ngan nai puke met balei ja'at. ¹⁹ Mung kelunan kadu' iti ufa' ka engkang Iye, ufanna un kuasa ya' nai kawang met Iye ngan ketu' kelunan ira' inye nai muat. ²⁰ Sulo Yesus ti mena'at ko ata murid-murid-A ti ngan pisiu: "Tiga tawai na tuk ikam ra' kasip, ikam na ya' un Kerajaan Allah. ²¹ Tiga tawai na tuk ikam ya' la'au na' kini, ufanna ikam ka besuan o inye. Tiga tawai na tuk ikam ira menange na' kini, ufanna ikam ka petawe o inye. ²² Tiga tawai na tuk ikam, buk so'on Anak Kelunan ini dulu keto' ikam, ngan petengen ikam, ngan peja'at ikam, ence ufa' ngaran nem ufan ra na' a ja'at. ²³ Bangen tawai ngan kancet na daleu inye, ufanna ja'au upah nem ko' sorga ti; Ufan menginye ta sepun-sepun ra uyai nabi-nabi lu menaa' da. ²⁴ Aken ke siu' uro naam ya kaya' ufanna dalem kekayaan iti, ikam sinteng ka pesalau (kimet ngan atai nem). ²⁵ Ke siu' uro naam ya' na' kini beso, ufanna ikam ka la'au (o inye). Ikam se ra' na' kini penatawe, tai siu' uro ta'am, ufanna ikam ka ngelumo ngan menange o inye. ²⁶ Ngiri ta kesiu' uro ta'am buk kelunan kadu' ka pempau ikam; ufanna menginye dite sepun-sepun nem uyai nabi-nabi ira' bang na' tira' baka' (palsu)." ²⁷ "Aken tuk ikam ya' sekening daau E, Aki ufa' bara: Lesau na ayau nem, uyai tiga na pala' kelunan ya keto' ikam; ²⁸ nyat na peniga kume kelunan ira' menunu' ikam; sebayang na kume dulu ya menuro' ikam. ²⁹ I' ira menebeb pinga nem ya' se, na ya se iti pala iye le'e, ngan i' ira ala' sapai nem, neupia ala' a. ³⁰ Mencai na pala' kelunan ira' nai nyat ko ikam; nyem nyat peluet ineu ya' lepek ire ala' met ineu ya' un neng ikam. ³¹ Mengempei nem ufa' dulu uyai se ineu kume ikam, uyai na mengiti pala' ire. ³² Buk ikam lesau dulu ya lesau ikam, ineu jasa nem? Kelunan ya' un penyala' mencai kelesau ra pala' kelunan ya lesau' ire. ³³ Ufanna buk ikam uyai puyan ya' tiga pala' ire ya' mencai peniga a neng ikam, ineu jasa nem? Kelunan ya' un penyala' sinteng uyai puyan ya' kua' keba'an inye. ³⁴ Ngan buk ikam na se kelua kume dulu, ufanna ikam ufa' ka ala' se ineu met iye, ineu jasa nem? Kelunan ya' un penyala' sinteng mencai kelua pala' ire serepe' apan, apan ra sinteng ala' peluet, kua'-kua' kadu (ngan ineu ya' ire ngelua). ³⁵ Aken ikam, lesau na ayau nem ngan uyai na peniga kume ire. Mencai na kelua ngan ngem nebelom sua' a nai peluet, ufanna ja'au upah nem ngan ikam ka jadi anak-anak Allah Ya' Empau, tiga ale A pala' kelunan-kelunan ya' ence un tisen na' terima kasih ngan pala' kelunan-kelunan ira' ja'at. ³⁶ Tiga ne lemuto bara' dite peniga atai nem, kua' ngan Amai nem ya' bang bara' peniga atai A. ³⁷ Iri' bara' penyala' (menghakimi) dulu, buku ikam ence ufa' dulu bara' penyala' (dihakimi) nem. Ngan nyem mukum, buk ikam ence ufa siu' ukum; Nyem ufa ngentawai penyala' dulu (ampunilah), buk ikam ufa' dulu ence ngentawai penyala' nem (akan diampuni). ³⁸ Mencai na buk ikam ufa dulu na' pengencai pala' ikam; se takaran ya tiga ngan padet, ya' sinteng dulu mileng ngan nai pufing pafi' ko sekalung nem. Ufanna, ineu ukuran ya' ikam un ka mengukur, ukuran inye ta dulu un ka mengukur ikam. ³⁹ Yesus ti bara' kume ire ngan ala' kata: "Sinteng kelunan buta' tai asak kelunan ira' buta'? Pasti (Ineu le'e) due tai surop dalem lufang. ⁴⁰ Daleu se kelunan jadi' murid, empei a sinteng tai empau (un enco) neng guru' a un, aken i' ira' lepek pekalai, sinteng tai kua' ngan guru' a. ⁴¹ Ineu nem sinteng na'at pelem dalem mate senganak nem, aken suka' dalem mate nem na tengen, ikam ence tisen? ⁴² Mengempei nem sinteng kume pala' senganak nem: Senganak, neu pe e' ala pelem ya' un dalem mate o na ko awang, aken suka' ya' un dalem mate nem, ikam ence na'at? Pala' kelunan ira ngendue atai (munafik), ala' suka' ya un dalem mate nem na aring, nga lu' nem sinteng mena'at ngan tiga pelem ya un dalem mate senganak nem." ⁴³ "Ufanna empei un pu'un ya' tiga, kenai un bua' ira' ence tiga un, ngiri ta pu'un ira' ence tiga, empei kenai un bua' ira' tiga un. ⁴⁴ Ufanna, singket pu'un, dulu tisen met bua' a. Empei dulu sinteng ala' bua' ara met ngap ira un sua' un, ngiri ta, empei dulu sinteng ala' bua' anggur met sua' un. ⁴⁵ Kelunan ira' tiga, pasti ineu ra' tiga nai kawang met atai ra ngan kelunan ira' ja'at, pasti ineu ira' ja'at nai kawang met atai ra. Ufanna tebara' ya' nai kawang met ba' lu, inye ta ya un dalem atai lu." ⁴⁶ "Ineu nem ngelalo pala' Aki: Tuhan, Tuhan, aken empe nem uyai ineu ya' Aki bara' un? ⁴⁷ Singket kelunan ya' nai pala' Aki, sekening ngan baya' (uyai) daau isiu-E - Aki ke bara' mikam, i' ketai kua' ngan iye -, ⁴⁸ iye kua' ngan kelunan ira' pedeng lamin: Kelunan inye mekat dalem-dalem ngan uyai suka' ko' usun bateu. Daleu kenai sungai meso ngan laleng ko lamin a ti, empei lamin inye ketai piung un. Ufanna takeng ale' lamin inye. ⁴⁹ Akenna kelunan ira' sekening isiu-E, ngan ence baya' daau a, iye kua' ngan kelunan ira' pedeng lamin ira ence un suka'. Daleu kenai sungai meso, lamin inye ketai mapi' ngan ja'at.