¹ Ngan Yesus petira’kepalaq murid-murid-Ta: “Un se kelunan kayaq yaq un se bendahara. Kepalaq iye dulu naq kadu, ufanna bendahara iti pebura ineuwa. ² Sulowa bai bendahara iti ngan bara’ kumeye: “Ineu yaq lepeq iku’ sekening nengjo iku’? Naqna pertanggungan jawab usun pemuyannoq, tumanna empei yo’ senteng pegayeng kebaan bendahara da lee. ³ Un daau bendahara iti ko dalem ataia: Ineu yaq senteng aki’ ka uyai? Tuenne’ bet aki’ met gayenge’ neng bendahara. Menyangkun empei e’ tue, nyatpa aki’ see. ⁴ Aki’ tisen ineu yaq aki’ ka uyai. Apanna buk iye mengesu’ aki met gayenge’ neng bendahara, un kelunan yaq ka alaq aki’ ko lamin ra. ⁵ Sulo a bai se-se kelunan yaq un utang kepalaq tuenna. Un dauwa kume yaq nai aring: Kuraq ufan utang o’ kepalaq tuenne’? ⁶ Un daau kelunan iti: Seato tempayan minyak ta. Sulo un dauwa kepalaq kelunan iti: Inina surat utango’, uku’na ngan iyai surat utang ira se naq kini pa: Leme pulu’ tempayan. ⁷ O iti iye bara’ kume yaq kedua: Ngan kura’ utang o’? Un daau kelunan iti mipa: Seato pikun gandum. Un dauwa kume kelunan iti: Inina surat utang o’, uyaina surat utang senaan: Aye pulu’ pikun. ⁸ Sulo tuen iti maaq bendahara yaq nce teneng iti, ufanna iye lepeq pegayeng ngan tudi. Tumanna anak-anak usun tanaq ini unco tudi neng atara selepi’ neng o anak-anak dema. ⁹ Ngan Aki’ bara’ kume ikam: Mengaputna penuyang ngan kanan Mamon yaq nce un teneng, apan na buk mamon iti nce senteng mebo lee, ikam dulu alaq ko dalem lepau yaq nyain. ¹⁰ “I’yaq tangen dalem puyan-puyan ira iut, iye tangen tapa dalem puyan-puyan yaq jaau. Ngan i’yaq nce lan dalem puyan-puyan iut, empei ya lan pa dalem puyan-puyan yaq jaau. ¹¹ Un o buk ikam nce tangen dalem puyan Mamon yaq nce un teneng, i’pa yaq ka kenaq kume ikam ineu yaq ateq lanna? ¹² Ngan buk ikam nce un tangen dalem ineu dulu, i’pa yaq ka kenai ineu nem tengen kume ikam? ¹³ Se ulaq empei a senteng pegayeng kepalaq duwe tuen. Ufanna bukka menginye iye ka suto’ yaq se ngan lesau yaq sena, ngan poo iye ka tangen palaq yaq se ngan nce peduli’ yaq sena. Empei nem senteng pegayeng kepalaq Allah ngan kepalaq Mamon.” ¹⁴ Ketu’ ira iti neng sekening kelunan-kelunan Farisi, ulaq uang iti, ngan ire pesutoq Iye. ¹⁵ sulo A petira’ kepalaq ire: Ikam peteneng use neng jume kelunan, un o Allah ngetisen atai nem. Ufanna ineu yaq kelunan tikab, jadi keto’ koon Allah. ¹⁶ Hukum Taurat ngan ketu’ kitab nabi kakanan pafi’ zaman Yohanes; ngan daleu iti Kerajaan Allah dulu pedenge ngan singket kelunan nengayet punan tai dalema. ¹⁷ Sa’ melai langit ngan tanaq lenyo neng o se titik met hukum Taurat nce un. ¹⁸ Singket kelunan yaq metat ledowa, sulo kawin ngan ledo se naan, iye uyai zinah; ngan i’ yaq kawin ngan ledo yaq ufan lakeiya metat, iye uyai zinah.” ¹⁹ Un se kelunan kayaq yaq lemuto un sapai daru’ ungu ngan belasu’ lanye ngan singket dau iye bangen dalem ineuwa yaq kadu’. ²⁰ Ngan un se kelunan kasip ngaranna Lazarus, usea sangan ngan puweu, megen dani’ bamen lamin kelunan kayaq iti, ²¹ ngan sedepka pelalau laauwa ngan ineu yaq nai labu’ met meja kelunan kayaq iti. Sulo aeu-aseu nai ngan ilaq puweuwa. ²² O iti mataina kelunan kasip iti, sulo tai malaikat-malaikat ilan iye ko usun sekalung Abraham. ²³ Kelunan kayaq iti pa tai matai, sulo mulo iye. Ngan daleuwa den tuyen tegen ko ufan penuyen iti a menaat ko empau, ngan met su’ a dite Abraham, ngan Lazarus uku’ ko usun sekalunga. ²⁴ Sulo a ngelalo, un dauwa: Amai Abraham, lesau nee’ aring. Soonna Lazarus, apanna iye mesep bulan buwaq usu’a ko dalem sungai ngan menasa’ jela’e’, tumanna aki’ tuyen ale’ dalem ang apui ini. ²⁵ Naq pia mengiti un daau Abraham: Anak, ngetawaina, ufanna iku’ lepeq alaq ketu’ yaq tiga seng kasan urip o, bukke Lazarus ketu’ yaq jaat. Naq kini iye alaq penyalau ngan iku’ tuyen ale’. ²⁶ Senaanna lee iti neng aang ami’ ngan iku’ un se ngab dalem yaq ence sinteng ileu ka palawat, apanna ire yaq ufa’ tai met ini kepalaq iku’ nginyeta ire yaq ufa’ nai met iti kepalaq ami’ empei sinteng nai pelawat. ²⁷ Un daau kelunan iti: Bukke menginye, aki’ nyat palak iku’, amai, apan no’ soon inye tai ko lamin tamakti, ²⁸ tumanna sa’ un leme use senganaqe’ apan na iye pekatuk ire ngan lan-lan, apan nyen ra nai ko dalem ufan penuyen ini. ²⁹ Un daau Abraham: Unta palak ire ti tira’ Musa ngan ketu’ nabi; tiga nira sekening daau tira’ iti. ³⁰ Un daau ipa kelunan iti: Uun, Amai Abraham, naq pia mengiti buk un se kelunan yaq tai met nengaang kelunan matai kepalaq ire, ire ka bertobat. ³¹ Un daau Abraham kepalaq iye: Buk ire nce un sekening tira’ Musa ngan ketu’ nabi, ire pa nce ka ufa’ mengelan, naq pia koon se kelunan yaq nai beti’ met nengaang kelunan matai.”