¹ Ingatan sia akai tunuk agan pamarintah dahan panguasa, patuh dahan siap bakalakuan baik, ² Ntah mamfitnah sopapan, ntah bakalahi, ramah, lalu basikap lomah lomut, ka samua urang. ³ Sobab, kita holu pan bodoh, ntah patuh, sosat, diperbudak bamacam nafsu dahan kasonangan, hidup dalam kajahaian dahan hiri hati, dibonci dahan saling mambonciai. ⁴ Tapi, pas kamurahan dahan kasih Allah, Juru slamat kita, dinyataan, ⁵ Inya manyalamatan kita, bilanya obai pabuatan bonar kita, tapi obai belas kasih-Nya malaluai pambasuan kalahiran lagi dahan pambaharuan Roh Kudus, ⁶ nya Inya curahan malimpah akai kita malaluai Kristus Yesus, Juru slamat kita. ⁷ Maka, jadi dibonaran agan Anugrah-Nya kita nyadi hali waris sasuai agan pangharapan akai hidup kekal. ⁸ Pamaniran ini maha bonar. Mangonaai jolu ini kahonaku kolai bonar-bonar yakin akai sia nya jadi percaya agan Allah rajin malakuan perbuatan baik. Bala jolu uba ini baik dahan baguna akai samua urang. ⁹ Tapi, plaukan tam bala perdebatan, bala silsilah, pasalisihan, dahan paporapan nya bodoh mangonaai Hukum Tuarat obai jolu inyan ntah ada gunanya dahan sia-sia. ¹⁰ Akai urang nya manyobaban persalisihan, dipringatai satu atau dua kali, jadi inyan jauhai tam inya. ¹¹ Sobab kolai tahu ma urang macam inyan jadi sosat dahan ponuh dosa, inya mandatakan hukupan akai dirinya siku. ¹² Jadi aku mautus Artemas dahan Tikhikus ka hunin, bausaha tam akai natakai aku di Nikopolis obai aku jadi mamutusan aka diap di nuhun samanah musim dingin nona. ¹³ Agan sakuat tenaga kolai, tulung tam Zenas, urang ahli hukum inyan, dahan Apolos nya dalam pajalatan akai sia ntah kakurakan bala jolu apa pan. ¹⁴ Kahonanya bala urang kita harus balajar rajin mangarojaan pakarojaan nya baik akai sia dapat mancukupai kaperluan hidup tiap-tiap ari dahan ntah hidup dengan tidak babuah. ¹⁵ Samua urang nya agan aku manyampaian salam akai hunin. Sampaian tam salamku agan sia nya mangasihi kami dalam iman. Anugerah manyarota'ai hunin samua.